സി.ബി.എസ്.ഇ നടത്തുന്ന ദേശീയ പ്രവേശന യോഗ്യത പരീക്ഷയുടെ അപേക്ഷ സമര്‍പ്പിക്കാനുള്ള വെബ്‌സൈറ്റ് മുടങ്ങി; അപേക്ഷകര്‍ വലഞ്ഞു
സി.ബി.എസ്.ഇ നടത്തുന്ന ദേശീയ പ്രവേശന യോഗ്യത പരീക്ഷയുടെ അപേക്ഷ സമര്‍പ്പിക്കാനുള്ള വെബ്‌സൈറ്റ് മുടങ്ങിയത് അപേക്ഷകരെ വലച്ചു. ശനിയാഴ്ച രാത്രി എട്ടുമുതല്‍ അപേക്ഷകള്‍ സമര്‍പ്പിക്കാന്‍ കഴിയാത്ത സാഹചര്യമാണ്. ഞായറാഴ്ച വൈകിയിട്ടും സെര്‍വര്‍ തകരാര്‍ നേരെയാക്കിയിട്ടില്ല.
കഴിഞ്ഞ വെള്ളിയാഴ്ചയാണ് നീറ്റ് പ്രവേശനപരീക്ഷ വെബ്‌സൈറ്റ് തുറന്നത്. തൊട്ടടുത്ത അവധിദിവസങ്ങളില്‍ അപേക്ഷ നല്‍കാന്‍ ശ്രമിച്ചവര്‍ പരാജയപ്പെടുകയായിരുന്നു. കേരളത്തില്‍ 10 ജില്ലകളിലാണ് നീറ്റ് പരീക്ഷാകേന്ദ്രങ്ങളുള്ളത്.
അപേക്ഷകരുടെ രജിസ്‌ട്രേഷന്‍ നടത്താന്‍ സാധിക്കുന്നുണ്ടെങ്കിലും പിന്നീട് അപേക്ഷ സമര്‍പ്പിക്കാനുള്ള ലിങ്കില്‍ പ്രവേശിക്കുമ്പോള്‍ 'സെഷന്‍ ടൈം ഔട്ട്' സന്ദേശമാണ് ലഭിച്ചുകൊണ്ടിരിക്കുന്നത്.
പരീക്ഷയുടെ ഹെല്‍പ്‌ഡെസ്‌ക് നമ്പറുകളും ടോള്‍ ഫ്രീ നമ്പറുകളും പ്രവൃത്തിദിവസങ്ങളില്‍ മാത്രമാണ് പ്രവര്‍ത്തനനിരതമാവുക.
സൗകര്യപ്രദമായ പരീക്ഷാകേന്ദ്രങ്ങള്‍ തേടിയാണ് അപേക്ഷകര്‍ ആദ്യദിവസങ്ങളില്‍തന്നെ അപേക്ഷ സമര്‍പ്പിക്കുന്നത്. പരീക്ഷാകേന്ദ്രം സംബന്ധിച്ച മൂന്ന് ഓപ്ഷനാണ് അപേക്ഷകര്‍ നല്‍കേണ്ടത്. വെബ്‌സൈറ്റ് തകരാര്‍മൂലം പരീക്ഷാ കേന്ദ്രങ്ങള്‍ ഇല്ലാത്ത കാസര്‍കോട്, വയനാട്, പത്തനംതിട്ട, ഇടുക്കി ജില്ലകളിലുള്ളവര്‍ക്കാണ് കൂടുതല്‍ പ്രയാസം ഉണ്ടാവുക.
https://www.facebook.com/Malayalivartha
