പ്ലസ് വണ്‍ പ്രവേശനത്തിനുള്ള ട്രയല്‍ അലോട്ട്‌മെന്റില്‍ ഉള്‍പ്പെട്ടത് 2,37,656 കുട്ടികള്‍. ഏകജാലകം വഴിയുള്ള ആകെ മെരിറ്റ് സീറ്റുകള്‍ 2,89,128 ആണ്. ഇതില്‍ ഒഴിവുള്ളത് 51,472 സീറ്റുകള്‍. പൊതുമെരിറ്റിലെ 40 സീറ്റുകള്‍ മാത്രമാണ് മിച്ചം കിടക്കുന്നത്. ബാക്കിയെല്ലാം സംവരണ വിഭാഗങ്ങള്‍ക്കായി മാറ്റിവെച്ചിരിക്കുന്ന സീറ്റുകളാണ്.

ഇത്തവണ ലഭിച്ച അപേക്ഷകള്‍ 4,93,582 ആണ്. ഇവരില്‍ പകുതിയില്‍ താഴെ മാത്രമേ ട്രയല്‍ അലോട്ട്‌മെന്റില്‍ ഉള്‍പ്പെടുന്നുള്ളൂ. എന്നാല്‍, മാനേജ്‌മെന്റ് ക്വാട്ട, കമ്യൂണിറ്റി മെരിറ്റ്, സ്‌പോര്‍ട്ട്സ് ക്വാട്ട, അണ്‍ എയ്ഡഡ് എന്നീ വിഭാഗങ്ങളിലെ സീറ്റുകള്‍ കൂടി ഇത്തവണയുള്ള ആകെ പ്ലസ് വണ്‍ സീറ്റുകള്‍ 4,22,853 ആണ്.

ആദ്യ അലോട്ട്മെന്റ് ജൂണ്‍ 11-ന് പ്രസിദ്ധപ്പെടുത്തും. നേരത്തേ ഇത് ജൂണ്‍ ഒന്നിനാണ് നിശ്ചയിച്ചിരുന്നത്. മേയ് 18 വരെ അപേക്ഷ സ്വീകരിക്കാനാണ് പ്രവേശനത്തിനുള്ള വിജ്ഞാപനത്തില്‍ പറഞ്ഞിരുന്നത്. സി.ബി.എസ്.ഇ. ക്കാര്‍ക്ക് വേണ്ടി മേയ് 31 വരെ പ്രവേശനം നീട്ടേണ്ടിവന്നു. ഇതിനാലാണ് ആദ്യ അലോട്ട്‌മെന്റും പ്ലസ് വണ്‍ പ്രവേശനവും നീട്ടേണ്ടിവന്നത്.