ഇന്ത്യയിലെ ആദ്യ റെയില്‍ ആന്‍ഡ് ട്രാന്‍സ്പോര്‍ട്ടേഷന്‍ യൂണിവേഴ്സിറ്റിയില്‍ (എന്‍ആര്‍ടിഐ) റസിഡന്‍ഷ്യല്‍ ബിരുദ പ്രോഗ്രാമുകളിലേക്ക് പ്രവേശനം ആരംഭിച്ചു. ബിഎസ്സി ട്രാന്‍സ്പോര്‍ട്ടേഷന്‍ ടെക്നോളജി, ബിബിഎ ട്രാന്‍സ്പോര്‍ട്ടേഷന്‍ മാനേജ്മെന്റ് എന്നീ കോഴ്സുകളിലേക്കാണ് അഡ്മിഷന്‍ ആരംഭിച്ചത്.

ബിഎസ്സി കോഴ്സിലേക്ക് പ്ലസ് ടു സയന്‍സ് സ്ട്രീം (കണക്ക് നിര്‍ബന്ധിത വിഷയം) വിദ്യാര്‍ത്ഥികള്‍ക്കും ബിബിഎ കോഴ്സിലേക്ക് ഏതു സ്ട്രീമിലെയും (കണക്ക് നിര്‍ബന്ധിത വിഷയം) പ്ലസ് ടു വിദ്യാര്‍ത്ഥികള്‍ക്കും അപേക്ഷിക്കാം.

അപേക്ഷകര്‍ക്ക് പ്ലസ് ടു പരീക്ഷയ്ക്ക് കുറഞ്ഞത് 55 ശതമാനം മാര്‍ക്കുണ്ടായിരിക്കണം. (പിന്നാക്ക, പട്ടികജാതി, പട്ടികവര്‍ഗ വിദ്യാര്‍ത്ഥികള്‍ക്ക് 50 ശതമാനം). പ്രായം 2018 ഓഗസ്റ്റ് ഒന്നിന് 25 ല്‍ താഴെയായിരിക്കണം. ഓഗസ്റ്റില്‍ ക്ലാസുകള്‍ ആരംഭിക്കും. www.nrti.in എന്ന വെബ്സൈറ്റ് വഴി 2018 ജൂണ്‍ 30വരെ ഓണ്‍ലൈനായി റജിസ്റ്റര്‍ ചെയ്യാം.

റജിസ്റ്റര്‍ ചെയ്ത വിദ്യാര്‍ത്ഥികളെ പ്ലസ് ടു മാര്‍ക്കിന്റെ അടിസ്ഥാനത്തില്‍ ചുരുക്കപ്പട്ടികയില്‍ ഉള്‍പ്പെടുത്തി അഡ്മിഷന്‍ അഭിരുചി പരീക്ഷയ്ക്ക് ക്ഷണിക്കും. രാജ്യത്തെ വിവിധ കേന്ദ്രങ്ങളില്‍ 2018 ജൂലൈയില്‍ പരീക്ഷ നടക്കും. ഈ പരീക്ഷയുടെ അടിസ്ഥാനത്തില്‍ അവസാന റാങ്ക് പട്ടിക പ്രസിദ്ധീകരിക്കും. 100 വിദ്യാര്‍ത്ഥികള്‍ക്കാണ് ഒരു ബാച്ചില്‍ പ്രവേശനം നല്‍കുക.

ഗുജറാത്തിലെ വഡോദരയിലുള്ള 55 ഏക്കര്‍ സ്ഥലത്താണ് കല്‍പിത സര്‍വകലാശാലയായ നാഷനല്‍ റെയില്‍ യൂണിവേഴ്സിറ്റി. ഗതാഗത മേഖലയിലെ പഠനത്തിനായി ഇന്ത്യയില്‍ ആവിഷ്‌ക്കരിച്ച ആദ്യ സര്‍വകലാശാലയാണ് ഇത്. പ്രാക്ടിക്കല്‍ ലാബുകളും പരിശീലന കേന്ദ്രങ്ങളും ഒരുക്കി ഇന്ത്യന്‍ റെയില്‍വേയും എന്‍ആര്‍ടിഐയെ പിന്തുണയ്ക്കുന്നുണ്ട്.

കൂടുതല്‍ വിവരങ്ങള്‍ക്ക് 07306378198 എന്ന നമ്പറിൽ ബന്ധപ്പെടാവുന്നതാണ്