എടക്കാട് ബറ്റാലിയനിലെ നീ ഹിമമഴയായി വരൂ എന്ന ഗാനം അടുത്തിടെ ഇറങ്ങിയ പാട്ടുകളില്‍ മികച്ച പ്രണയഗാനമായി വിലയിരുത്തപ്പെട്ട ഒരു ഗാനമാണ്. കൈലാസ് മേനോന്‍ സംഗീത സംവിധാനം നിര്‍വ്വഹിച്ച ഈ ഗാനം പാടിയത് നിത്യാ മാമ്മന്‍ എന്ന പുതുമുഖ ഗായികയായിരുന്നു. നിരവധി പേരാണ് ഗായികയെ അഭിനന്ദിച്ച് രംഗത്ത് വന്നത്.

എല്ലാവരുടെയും പ്രിയ ഗായിക ശ്രേയ ഘോഷാലിനെക്കൊണ്ടാണ് ആദ്യം ഈ പാട്ട് പാടിക്കാന്‍ ഇരുന്നത്. എന്നാല്‍ നിത്യയുടെ പാട്ട് കേട്ടപ്പോള്‍ സംഗീത സംവിധായകന്‍ കൈലാസ് മേനോന്‍ ആ തീരുമാനം മാറ്റുകയായിരുന്നു. നേരത്തെ അന്യഭാഷക്കാരെകൊണ്ട് മലയാളത്തില്‍ പാടിക്കുന്നതിനെതിരെ പലരും രംഗത്ത് വന്നിട്ടുണ്ട്. അത്തരത്തിലുള്ള ഒരു വിമര്‍ശനത്തിന് മറുപടി പറഞ്ഞിരിക്കുകയാണ് കൈലാസ് മേനോന്‍.

നിത്യയെപോലെ കഴിവുള്ള ഗായകര്‍ മലയാളത്തില്‍ ഉള്ളപ്പോള്‍ ബംഗാളിയെക്കൊണ്ട് പാടിക്കുന്നത് ശരിയാണോ എന്ന് സമൂഹമാധ്യമത്തില്‍ ഉയര്‍ന്ന ചോദ്യത്തിന് തന്റെ ഫെയ്സ്ബുക്ക് പേജിലൂടെ മറുപടി നല്‍കിയിരിക്കുകയാണ് കൈലാസ് മേനോന്‍. ഇതായിരുന്നു മറുപടി.

കൈലാസ് മേനോന്റെ ഫെയ്സ്ബുക്ക് കുറിപ്പ് ഇങ്ങനെ: 'അതില്‍ എന്താണ് തെറ്റ്? കലയ്ക്ക് ഭാഷാ അതിര്‍വരമ്പുകളില്ല.. ഒരാളുടെ കഴിവ് നോക്കിയാണ് പാടാന്‍ വിളിക്കുന്നത്, സ്വദേശമോ മാതൃഭാഷയോ നോക്കിയല്ല..ഏറ്റവും കൂടുതല്‍ ആവര്‍ത്തിച്ചു കേള്‍ക്കുന്നതും ചര്‍ച്ച ചെയ്യപ്പെടുന്നതുമായ ഒരു ചോദ്യമാണിത്, മലയാളത്തില്‍ ഇത്ര നല്ല ഗായികമാരുള്ളപ്പോള്‍ എന്തിനാണ് ശ്രേയഘോഷാലിനെ കൊണ്ട് പാടിക്കുന്നത് എന്ന്..എല്ലാ ഭാഷക്കാരും ഇങ്ങനെ ചിന്തിച്ചിരുന്നെങ്കില്‍ യേശുദാസ്, പി.ജയചന്ദ്രന്‍, കെ.എസ്.ചിത്ര, സുജാത, ഉണ്ണിമേനോന്‍, ഉണ്ണികൃഷ്ണന്‍, വിജയ് യേശുദാസ് ഇവരൊന്നും മറ്റ് ഭാഷകളില്‍ പാടില്ലായിരുന്നു. ഒരു പാട്ടിന് ഏറ്റവും ചേരുന്നതും, എത്രത്തോളം ആ പാട്ടിനോട് നീതി പുലര്‍ത്താന്‍ കഴിയുന്ന ഗായകന്‍/ഗായികയാണ് എന്നേ സംഗീതസംവിധായകര്‍ നോക്കാറുള്ളൂ. അത് ഒരു പക്ഷെ ശ്രേയ ഘോഷാലാവാം, മറ്റാരുമാവാം.

കൈലാസ് മേനോന് പിന്തുണയുമായി നിരവധി പേര്‍ എത്തി. കലാകാരന്‍മാരെയും കലാകാരികളെയും ഭാഷയുടെയും സംസ്ഥാനത്തിന്റെയും അടിസ്ഥാനത്തില്‍ വിലയിരുത്തുന്നത് ശരിയില്ല. കൂടാതെ ഒരു പാക് ഗായകനെ കൊണ്ട് ഇന്ത്യയില്‍ പാടിക്കില്ല എന്ന് പറയുന്നതുപോലെ തന്നെയാണ് ബംഗാളിയെ പാടിക്കരുത് എന്ന് പറയുമ്പോഴും. മലയാളത്തില്‍ ശ്രേയ ഘോഷാല്‍ പാടുന്നുണ്ടെങ്കില്‍ അത് അവരുടെ കഴിവ് കൊണ്ടാണെന്നും ആരാധകര്‍ പറഞ്ഞു.