സംസ്ഥാന അവാര്‍ഡ് പ്രഖ്യാപിച്ച് കഴിഞ്ഞതോടെ ജൂറിക്കെതിരെ രൂക്ഷവിമര്‍ശനങ്ങളാണ് മലയാളത്തിലെ പ്രിയതാരങ്ങള്‍ ഉന്നയിക്കുന്നത്. ഏറ്റവും ഒടുവില്‍ ജൂറിക്കെതിരെ വിമര്‍ശനവുമായി എത്തിയത് മലയാളത്തിന്റെ പ്രിയ നടി മീരാനന്ദനാണ്. ജയസൂര്യയ്ക്ക് എന്ത് കൊണ്ടാണ് സംസ്ഥാന അവാര്‍ഡ് നല്‍കാത്തതെന്നാണ് മീര നന്ദന്‍ ചോദിക്കുന്നത്.

ഫെയ്‌സ് ബുക്കിലൂടെയാണ് താരം വിമര്‍ശനവുമായി എത്തിയത്. നിവിനും നസ്‌റിയയ്ക്കും എബ്രിഡ് ഷൈനും സംസ്ഥാന പുരസ്‌കാരം നേടിയ മറ്റുള്ളവരുടെയും നേട്ടത്തില്‍ വളരെ സന്തോഷവതിയാണെന്നും എന്നാല്‍ എന്തുകൊണ്ട് ജയസൂര്യയുടെ പ്രയത്‌നം ജൂറി കാണാതെ പോയെന്നും അതിന്റെ കാരണം അറിഞ്ഞാല്‍കൊള്ളാമെന്നുണ്ടെന്നും മീര പറഞ്ഞു.
അത് കൂടാതെ, ജൂറിക്കെതിരെ വിമര്‍ശനവുമായി സംവിധായകന്‍ വിനോദ് മങ്കര രംഗത്തെത്തി. ഇത്തവണത്തെ സംസ്ഥാന അവാര്‍ഡ് ഇതുവരെ കാണാത്ത വിധം നാണംകെട്ടു. അവാര്‍ഡ് മാത്രമല്ല അക്കാദമിയും. തിരുവന്തപുരത്ത് ചുറ്റുവട്ടത്തിരിക്കുന്ന ഒരു പണിയുമില്ലാത്ത കുറച്ചു പേര്‍ എങ്ങനെ ജൂറിയാകും. തിരക്കഥാകൃത്താണോ ജൂറി ചെയര്‍മാനായി വരേണ്ടത്.

കഷ്ടം തന്നെയെന്നും വിനോദ് പറഞ്ഞു. ഒറ്റമന്ദാരവും അപ്പോത്തിക്കിരിയും പോലെയുള്ള ചിത്രങ്ങള്‍ പരിഗണിക്കാത്തത് എന്തിന്റെ അടിസ്ഥാനത്തിലാണ്. ജയനും ഭാമയുമാണ് മികച്ച നടനും നടിയും ആകേണ്ടിയിരുന്നത്, കലാമൂല്യമുള്ള എത്രയോ ചിത്രങ്ങള്‍ ഉണ്ടായിരുന്നിട്ടും അവയൊന്നും കാണാത്ത ജൂറി അത്തരം സിനിമകളെ കൊല്ലുകയാണ് ചെയ്യുന്നത്.
ആര്‍ക്കൊക്കെ അവാര്‍ഡ് കൊടുക്കണമെന്ന് ഇവര്‍ നേരത്തെ തന്നെ തീരുമാനിച്ചിരുന്നു. ഇതു ജനങ്ങളോട് ചെയ്യുന്ന അനീതിയാണ്. ഒപ്പം മലയാളസിനിമയോട് കാണിച്ച വഞ്ചനയുമാണെന്ന് വിനോദ് മങ്കര പറഞ്ഞു. ജൂറിയെ പരിഹസിച്ച് സംവിധായകനും നടനുമായ ജോയ് മാത്യുവും രംഗത്തെത്തി.

അവാര്‍ഡ് ലഭിക്കാത്തതില്‍ താന്‍ ശരിക്കും നിരാശന്‍ എന്നു പറഞ്ഞ് ഫേസ്ബുക്കിലൂടെയാണ് ജോയ് മാത്യു പ്രതികരിച്ചത്. മികച്ച നടനായി പ്രഖ്യാപിച്ച നിവിന്‍ പോളിയ്ക്കും മികച്ച നടിയായി പ്രഖ്യാപിച്ച നസ്രിയയ്ക്കും നടന്‍ ജയസൂര്യ അഭിനന്ദനങ്ങള്‍ നല്‍കി ഫെയ്‌സ് ബുക്കില്‍ പോസ്റ്റിട്ടിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha