ചാനലുകളില്‍ ഓണസിനിമകളുടെ മാമാങ്കം, ഒരു വടക്കന്‍ സെല്‍ഫിയും എന്നും എപ്പോഴും ഒരുക്കി ഏഷ്യാനെറ്റ്, ലൈല ഓ ലൈലയുമായി മഴവില്‍ മനോരമയും
ഓണത്തിന് ഏത് ടി വി ചാനല്‍ കാണും? അതാണ് മലയാളികളുടെ ഇപ്പോഴത്തെ സംശയം. മലയാളചാനലുകള്‍ എല്ലാം തന്നെ ഓണത്തോടനുബന്ധിച്ച് മത്സരത്തിലാണ്. ഓണം ആഘോഷിക്കാന്‍ ടിവി ചാനലുകളുടെ സാന്നിധ്യം വലുതാണ്. വിനോദ ചാനലുകള്‍ മുതല്‍ വാര്‍ത്താചാനലുകള്‍ വരെ ഓണക്കാലം ആഘോഷമാക്കാനുള്ള തന്ത്രപ്പാടിലാണ്. സിനിമകള്‍ കൊണ്ടുള്ള മാമാങ്കം തന്നെയാണ് ടി വി ചാനലുകളില്ലെലാം.
ഒരുപിടി സൂപ്പര്‍ഹിറ്റ് ചിത്രങ്ങള്‍ കൊണ്ട് ഓണം ആഘോഷിക്കാന്‍ എല്ലാ ചാനലുകളും തയാറായി കഴിഞ്ഞു. ഏതായാലും പ്രേമം സിനിമയോ ബാഹുബലിയോ ടിവി ചാനലുകളില്‍ ഒരിക്കലും പ്രദര്‍ശിപ്പിക്കില്ല. തീയറ്ററില്‍ നിന്നും പണം വാരിയ നിരവധി ബ്ലോക്ബസ്റ്റര്‍ ചിത്രങ്ങളാണ് പ്രേക്ഷകര്‍ക്കായി ചാനലുകാര്‍ ഒരുക്കിയിരിക്കുന്നത്.
എല്ലാ വര്‍ഷവും പോലെ ചാനല്‍ മത്സരത്തില്‍ മുന്നില്‍ നില്‍ക്കുന്നത് ഏഷ്യാനെറ്റ് തന്നെയാണ്. മലയാളികളുടെ പ്രിയജോഡികളായ മോഹന്‍ലാല്‍ മഞ്ജുവാര്യര്‍ ഒരുമിച്ച സത്യന്‍ അന്തിക്കാട് ചിത്രം \'എന്നും എപ്പോഴും\' ആണ് ഏഷ്യാനെറ്റിന്റെ പട്ടികയിലുള്ള പ്രധാന ചിത്രം. നിവിന്‍ പോളി അഭിനയിച്ച വടക്കന്‍ സെല്‍ഫിയാണ് മറ്റൊരു ചിത്രം.
അത് കൂടാതെ തന്നെ നമിത പ്രമോദ് അഭിനയിച്ച \'ഓര്‍മ്മയുണ്ടോ ഈ മുഖം\', റിമി ടോമിയും ജയറാമും ഒന്നിച്ച \'തിങ്കള്‍ മുതല്‍ വെള്ളി വരെ\', ജയസൂര്യയുടെ \'ആമയും മുയലും\' ഫഹദിന്റെ \'മണിരത്‌നം\' എന്നിങ്ങനെ നീളുന്നു ഏഷ്യാനെറ്റിന്റെ ഓണചിത്രങ്ങള്‍. എന്നാല്‍ ഏഷ്യനെറ്റിനെ പിന്നിലായി ഉള്ളത് സൂര്യ ടിവിയാണ്.
നിരവധി ചിത്രങ്ങളാണ് സൂര്യ ടിവിയും പ്രേക്ഷകര്‍ക്കായി ഒരുക്കിയിരിക്കുന്നത്. മെഗാ സ്റ്റാര്‍ മമ്മൂട്ടിക്കൊപ്പമാണ് സൂര്യയുടെ ഓണാഘോഷം. മെഗസ്സ്‌റാര്‍ മമ്മൂട്ടിയും നയന്‍താരയും ഒരുമിച്ചഭിനയിച്ച \'ഭാസ്‌കര്‍ ദി റാസ്‌കല്‍\' ആണ് സൂര്യയുടെ പ്രധാനപ്പെട്ട ചിത്രം.
ഇതുകൂടാതെ മമ്മൂട്ടിയുടെ മകന്‍ ദുല്‍ഖരിന്റെ \'100 ഡേയ്‌സ് ഓഫ് ലവ്\' എന്ന സിനിമയും സൂര്യ ടിവിയില്‍ ഉണ്ട്. കുഞ്ചാക്കോ ബോബന്‍ റീമ കല്ലിങ്കല്‍ താരജോഡിയുടെ \'ചിറകൊടിഞ്ഞ കിനാവുകളാണ് സൂര്യയുടെ മറ്റൊരു പ്രധാന ചിത്രം. ദിലീപിന്റെ \'ചന്ദ്രേട്ടന്‍ എവിടെയാ?\', കാവ്യ മാധവന്‍ അനൂപ് മേനോന്‍ ചിത്രം \'ഷീ ടാക്‌സി എന്നീ ചിത്രങ്ങളും സൂര്യയുടെ ഓണാഘോഷത്തിന്റെ പട്ടികയിലാണ്.
മഴവില്‍ മനോരമയും ഇത്തവണ ഓണം ആഘോഷമാക്കാനുള്ള തയ്യാറെടുപ്പിലാണ്. മോഹന്‍ലാലിന്റെ ചിത്രം തന്നെയാണ് മഴവില്‍ മനോരമയുടെ താരം. മോഹന്‍ലാല്‍ അമലപോള്‍ പ്രധാന കഥാപാത്രങ്ങളില്‍ ജോഷി സംവിധാനം ചെയ്ത ത്രില്ലര്‍ \'ലൈല ഓ ലൈലയാണ് പ്രധാനചിത്രം. ദിലീപിന്റെ \'വില്ലാളിവീര\'നുമാണ് മഴവില്‍ മനോരമയുടെ ഓണച്ചിത്രങ്ങള്‍. ഇവന്‍ മര്യാദരാമന്‍ എന്ന സിനിമയും മഴവില്‍ മനോരമ സ്വന്തമാക്കിയിട്ടുണ്ട്. ഫ്‌ലവേഴ്‌സ് ചാനലും ഓണമാഘോഷിക്കാനുള്ള തയ്യാറെടുപ്പിലാണ്.
ലാല്‍ജോസിന്റെ സംവിധാനത്തില്‍ ദീപ്തി സതി അഭിനയിച്ച \'നീന\'യാണ് ഫ്‌ലവേഴ്‌സിന്റെ ഓണചിത്രം. അമൃത ടിവിയില്‍ ഇത്തവണ ഓണാഘോഷത്തിന് അത്രയ്ക്ക് മാറ്റില്ല. രസം എന്ന ചിത്രം മാത്രമാണ് അമൃതയുടെ പക്കലുള്ള പുതിയ ചിത്രം. കൈരളി ടിവി ഇത്തവണ മൊഴിമാറ്റ ചിത്രങ്ങളുമായാണ് ഓണമാഘോഷിക്കാന്‍ എത്തുന്നത്.
ഉത്തമവില്ലന്‍ , എന്നെ അറിന്താല്‍ , കൊമ്പന്‍ , മദ്രാസ് എന്നീ തമിഴ് ചിത്രങ്ങളും ഓണത്തിന് മലയാളികളെ കാത്തിരിക്കുകയാണ്. മലയാളത്തിലെ എച്ച്ഡി ചാനലുകള്‍ എന്ന നേട്ടം സ്വന്തമാക്കിയാണ് ഏഷ്യാനെറ്റും മഴവില്‍ മനോരമയുമാണ് ഇത്തവണ ഓണം ആഘോഷിക്കുന്നതെന്ന പ്രത്യേകതയും ഉണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
