മലയാള ടെലിവിഷന്‍ ലോകത്തെ മാതൃകാ ദമ്പതികളാണ് ശ്രീനിഷും - പേളി മാണിയും. പേളിഷ് എന്ന ഇരുവരുടെയും ദാമ്പത്യ ജീവിതത്തിന്റെ ആരാധകരാണ് കൂടുതല്‍. സോഷ്യല്‍ മീഡിയയില്‍ പേളിയും ശ്രീനിയും പങ്കുവയ്ക്കുന്ന കുടുംബ വിശേഷങ്ങള്‍ക്ക് വേണ്ടി കാത്തിരിയ്ക്കുന്ന ആരാധകരുമുണ്ട്. ഇപ്പോഴിതാ ശ്രീനിയോട് പ്രണയം തോന്നിയ ആ ഒരു നിമിഷയത്തെ കുറിച്ച് തുറന്ന് പറഞ്ഞിരിയ്ക്കുകയാണ് പേളി.

ബിഗ്ഗ് ബോസ് റിയാലിറ്റി ഷോയില്‍ വച്ചാണ് പേളിയും ശ്രീനിയും പ്രണയത്തിലായത്. ആ പ്രണയം പരസ്പരം തിരിച്ചറിഞ്ഞ ഒന്ന് രണ്ട് നിമിഷങ്ങള്‍ ഉണ്ടായിട്ടുണ്ട് എന്ന് ഒരു യുട്യൂബ് ചാനലിന് നല്‍കിയ അഭിമുഖത്തില്‍ സംസാരിക്കവെ പേളി മാണി പറഞ്ഞു.

അതില്‍ ഒന്ന് ബിഗ്ഗ് ബോസ് ടാസ്‌കിന് ഇടയില്‍ ഒരു വട്ടമേശ സമ്മേളനം ഉണ്ടാവും. ശരിക്ക് മീറ്റിങ് എന്നാണ് പറയുന്നത്. എന്നാല്‍ പലപ്പോഴും അടിയാണ് നടക്കുന്നത്. ചിലപ്പോള്‍ നമ്മള്‍ ഒന്നിനും ഉണ്ടാവില്ല. വെറുതേ അവിടെ നടന്നുകൊണ്ടിരിയ്ക്കുന്നത് കണ്ട് നിന്നാല്‍ മാത്രം മതി. അങ്ങനെ ഒരു മീറ്റിങിലാണ് ഞാന്‍ ശ്രീനിയെ നോക്കിയപ്പോള്‍ അവന്‍ എന്നെ നോക്കുന്നതായി കണ്ടത്. അപ്പോള്‍ എനിക്ക് വയറ്റില്‍ ഒരു ഇക്കിളി തോന്നി. ചുറ്റിലും പൂമ്പാറ്റ പറക്കുന്നത് പോലെ. അപ്പോള്‍ ഞാന്‍ കരുതി എനിക്ക് തോന്നിയതായിരിയ്ക്കും എന്ന്.

പിന്നെ ഇടയ്ക്ക് ആ നോട്ടം ഞങ്ങള്‍ക്ക് സ്പാര്‍ക്ക് ചെയ്തു. പിന്നെ നോട്ടമായി സ്ഥിരം പരിപാടി. പിന്നെ ഞങ്ങള്‍ ഒരുമിച്ച് കുറേ ടാസ്‌കുകള്‍ ചെയ്യാന്‍ തുടങ്ങി. പഴയതിലും അധികം കൂടുതല്‍ സംസാരിക്കാന്‍ തുടങ്ങി. അങ്ങനെയാണ് ആ പ്രണയം തുടങ്ങിയത്- പേളി പറഞ്ഞു.

ബിഗ്ഗ് ബോസ് റിയാലിറ്റി ഷോയുടെ റേറ്റിങ് ഗെയിമുകളാണ്, സ്‌ക്രിപ്റ്റഡ് ആണ് പേളിയുടെയും ശ്രീനിയുടെയും പ്രണയം എന്ന് തുടക്കത്തില്‍ ഗോസിപ്പുകള്‍ ഉണ്ടായിരുന്നു. എന്നാല്‍ റിയാലിറ്റി ഷോ കഴിഞ്ഞപ്പോഴും പേളിയും ശ്രീനിയും തങ്ങളുടെ പ്രണയത്തില്‍ ഉറച്ച് നിന്നു. 2019 ല്‍ ആണ് രണ്ട് വീട്ടുകാരുടെയും സമ്മതത്തോടെയും അനുഗ്രഹത്തോടെയും പേളിയുടെയം ശ്രീനിയുടെയും വിവാഹം കഴിഞ്ഞത്. 2021 ല്‍ പേളി നില ബേബിയ്ക്ക് ജന്മം നല്‍കുകയും ചെയ്തു.