സിനിമയിലെ ഡിഗ്രേഡിങ് (degrading) എല്ലാക്കാലത്തും ഉണ്ടെന്ന് നടന്‍ മമ്മൂട്ടി . ഓരോ കാലത്തും അത്‌ ഓരോ രീതിയിലായിരുന്നു. തന്റെ പുതിയ ചിത്രമായ ഭീഷ്മ പര്‍വ്വത്തിന്റെ പ്രചാരണ പരിപാടിയില്‍ പങ്കെടുത്ത് സംസാരിക്കുകയായിരുന്നു അദ്ദേഹം. ഫാന്‍സ്‌ ഷോ എന്ന പേരില്‍ പ്രത്യേക ഷോയില്ലെന്നും സിനിമയോട് താത്പര്യമുള്ളവരാണ് സിനിമ കാണാനെത്തുന്നതെന്നും മമ്മൂട്ടി പറഞ്ഞു. എല്ലാ സിനിമയും ആസ്വാദകരുടെ സിനിമയാണ്. ഈ സിനിമയ്ക്ക് ഫാന്‍സ്‌ ഷോ ഇല്ലെന്നും മമ്മൂട്ടി വ്യക്തമാക്കി.

തന്റെ മുന്നില്‍ വരുന്ന കഥയില്‍ നല്ലത് തിരഞ്ഞെടുക്കുകയാണ് ചെയ്യുന്നത്. പലതും വേണ്ടെന്നു വെയ്ക്കുന്നുണ്ട്. തന്‍റെ പ്രായത്തിനും ശരീരം അനുവദിക്കുന്നതും ആയ വേഷങ്ങള്‍ തന്നെയാണ് പലപ്പോഴും തെരഞ്ഞെടുക്കുന്നത്. ചെയ്യാന്‍ കഴിയും എന്ന് തോന്നുന്ന കഥാപാത്രങ്ങളെ ഉപേക്ഷിക്കാറില്ല എന്നും മമ്മൂട്ടി കൂട്ടിച്ചേര്‍ത്തു. കാണാന്‍ ആരാധകരുണ്ടെങ്കില്‍ അഭിനയിക്കാന്‍ തയ്യാറാണ്. അതു തുടരുക തന്നെ ചെയ്യും.

അമല്‍ നീരദിന്‍റെ സംവിധാനത്തില്‍ വ്യത്യസ്തമായ കഥയാണ് ഭീഷ്മപര്‍വ്വം. മഹാഭാരതത്തിന്റെ മട്ടാഞ്ചേരി വെര്‍ഷന്‍ അല്ല സിനിമ. മഹാഭാരതം ഇല്ലാത്തൊരു കഥയുണ്ടാകില്ലെന്നും മമ്മൂട്ടി പറഞ്ഞു. ഭീഷ്മപര്‍വ്വം കുടുംബ കഥയല്ല, കുടുംബങ്ങളുടെ കഥയാണെന്നും അദ്ദേഹം പറഞ്ഞു.

ബിഗ് ബി എന്ന സിനിമയ്ക്കു ശേഷം വര്‍ഷങ്ങള്‍ക്ക് ഇപ്പുറം ആണ് അമല്‍ നീരദും ആയി ഒത്തു ചേരുന്നത്. ആദ്യ കൂട്ടായ്മയില്‍ നിന്ന് രണ്ടാമത്തെ ചിത്രത്തില്‍ എത്തുമ്പോള്‍ സിനിമയിലും സാങ്കേതിക വിദ്യയിലും എല്ലാം ഒരുപാട് മാറ്റങ്ങള്‍ ഉണ്ടായിട്ടുണ്ട്. ആ മാറ്റങ്ങള്‍ സ്വാഭാവികമായും സിനിമയിലും ഉണ്ടാകും. ആദ്യ സിനിമയിലെ ബിലാല്‍ അല്ലാതാകാന്‍ ശ്രമിച്ചിട്ടുണ്ട്. പൂര്‍ണ്ണമായും ഇത് പുതിയ കഥപാത്രമാണ്. മമ്മൂട്ടി പറഞ്ഞു.

മെഗാസ്റ്റാര്‍ മമ്മൂട്ടി നായകനായി എത്തുന്ന അമല്‍ നീരദ് ചിത്രം ഭീഷ്മ പര്‍വ്വം വ്യാഴാഴ്ച്ച തിയ്യേറ്ററുകളിലെത്തും. കൊച്ചിയില്‍ നടന്ന ചിത്രത്തിന്റെ പ്രമോഷനില്‍ നടന്‍ മമ്മൂട്ടി അടക്കമുള്ള താരങ്ങള്‍ പങ്കെടുത്തു. ചിത്രം പ്രേക്ഷകര്‍ക്ക് വ്യത്യസ്തമായ ഒരനുഭവം സമ്മാനിക്കുമെന്ന് മമ്മൂട്ടി പറഞ്ഞു.

ബിഗ് ബി പുറത്തിറങ്ങി 14 വര്‍ഷത്തിനു ശേഷം മമ്മൂട്ടി- അമല്‍ നീരദ് കൂട്ടുകെട്ടില്‍ തിയ്യേറ്ററിലെത്തുന്ന ചിത്രമാണ് ഭീഷ്മ പര്‍വ്വം. അതുകൊണ്ട് തന്നെ ഭീഷ്മ പര്‍വ്വത്തിന്റെ പ്രഖ്യാപന സമയം മുതല്‍ പ്രേക്ഷകരും വലിയ ആകാംഷയിലായിരുന്നു. ചിത്രത്തില്‍ മൈക്കിള്‍ എന്ന കഥാപാത്രത്തെയാണ് മമ്മൂട്ടി അവതരിപ്പിക്കുന്നത്.

86 കാലഘട്ടത്തിന്റെ പശ്ചാത്തലത്തിലാണ് ചിത്രം ഒരുക്കിയത്. മലയാളത്തിലെ വന്‍ താര നിര ചിത്രത്തില്‍ അണി നിരക്കുന്നുണ്ട്. സൗബിന്‍ ഷാഹിര്‍, നദിയ മൊയ്‍തു, ഷൈന്‍ ടോം ചാക്കോ, ശ്രീനാഥ് ഭാസി, ദിലീഷ് പോത്തന്‍, നെടുമുടി വേണു, കെപിഎസി ലളിത എന്നിങ്ങനെ നീളും ചിത്രത്തിലെ താര നിര.

നിലവില്‍ തിയേറ്ററുകളില്‍ നൂറു ശതമാനം സീറ്റുകളിലും പ്രവേശനം അനുവദിക്കുന്നതും ചിത്രത്തെ ഗുണകരമായി ബാധിക്കുമെന്ന പ്രതീക്ഷയിലാണ് അണിയറ പ്രവര്‍ത്തകര്‍. ചിത്രത്തിലെ പ്രധാന അഭിനേതാക്കളായ ദിലീഷ് പോത്തന്‍, നദിയാ മൊയ്തു, സൗബിന്‍ തുടങ്ങിയവര്‍ പരിപാടിയില്‍ പങ്കെടുത്ത് സംസാരിച്ചു.