യാത്രകളെയും സാഹസികതയെയും അഗാധമായി പ്രണയിക്കുന്ന താരപുത്രനാരെന്ന ചോദ്യത്തന് മലയാളികൾ നൽകുന്ന ഉത്തരമാണ് പ്രണവ് മോഹന്‍ലാല്‍. നടൻ പലപ്പോഴായി പങ്കുവെക്കുന്ന വിശേഷങ്ങള്‍, മറ്റു താരങ്ങളും സുഹൃത്തുക്കളും പ്രണവിനെക്കുറിച്ച്‌ പറയുന്ന കഥകള്‍, ആദി എന്ന ജിത്തു ജോസഫ് ചിത്രം ഇതെല്ലാം പ്രണവിലെ സാഹസികനായ വ്യക്തിയെ കാണിച്ചുതന്നതാണ്.

സാധാരണക്കാരില്‍ സാധാരണക്കാരനായി പൊതുജനങ്ങള്‍ക്കിടയിലെത്തുന്ന പ്രണവ്, മഹാനടന്‍ മോഹന്‍ലാലിന്റെ മകനാണെന്ന് തോന്നിപ്പിക്കാറില്ലെന്ന കാര്യം സഹതാരങ്ങള്‍ എപ്പോഴും പങ്കുവെക്കാറുണ്ട്.

കാണുന്ന മലയും കുന്നുമെല്ലാം താണ്ടാറുള്ള പ്രണവ് വീണ്ടും സമൂഹമാദ്ധ്യമങ്ങളില്‍ വീണ്ടും ചര്‍ച്ചയായത് പുതിയതായി ഒരു ഇന്‍സ്റ്റഗ്രാം വീഡിയോ പങ്കുവെച്ചതോടുകൂടിയാണ്. 2017ലെ വീഡിയോ ദൃശ്യമാണ് പ്രണവ് ഇപ്പോള്‍ പങ്കുവെച്ചിരിക്കുന്നത്. തായ്‌ലാന്‍ഡിലെ ബോള്‍ഡെറിങ് ഗുഹയില്‍ നിന്നുള്ളതാണ് ദൃശ്യങ്ങള്‍. ടോണ്‍സായ് എന്ന പ്രദേശത്ത് സ്ഥിതിചെയ്യുന്ന ഗുഹയില്‍ സ്‌പൈഡര്‍മാനെ പോലെ സഞ്ചരിക്കുന്ന പ്രണവിനെ കണ്ട് ആരാധകര്‍ക്ക് ഇരിപ്പുറപ്പിക്കാനായില്ല.

കുമ്പാച്ചി മലയില്‍പ്പെട്ടുപോയ ബാബുവിന്റെ രക്ഷാദൗത്യം സിനിമയായാല്‍ മറ്റൊരു ഓപ്ഷനെക്കുറിച്ച്‌ സംവിധായകര്‍ക്ക് ഇനി ചിന്തിക്കേണ്ട എന്നാണ് വീഡിയോക്ക് താഴെ പ്രതികരണങ്ങളെത്തിയത്. റാംബോ മല്ലു വേര്‍ഷന്‍ എന്നും മല്ലു സ്‌പൈഡര്‍മാനെന്നും പലരും വിശേഷിപ്പിച്ചു. ഹൃദയത്തിന് ശേഷം ആരാധാകരുടെ ഹൃദയത്തില്‍ വീണ്ടും സ്ഥാനമുറപ്പിച്ച നടന് ആശംസാപ്രവാഹമാണ് വീഡിയോ പങ്കുവെച്ചതോടെ എത്തുന്നത്.