ഒരു കാലത്ത് നിരന്തരം ട്രോളുകളും പരിഹാസങ്ങളും ഏറ്റു വാങ്ങിയത് കന്നഡ സിനിമകളും താരങ്ങളും ആയിരുന്നു. ഇപ്പോൾ അതേ കന്നഡ സിനിമകൾ ഇന്ത്യൻ ബോക്സ് ഓഫീസുകൾ അടക്കി വാഴുന്ന കാഴ്ചയാണ്. കന്നഡ സിനിമാ രംഗത്ത് നിന്നും വന്ന പ്രധാന പാൻ ഇന്ത്യൻ താരങ്ങളിൽ ഒരാളാണ് നടൻ യാഷ്. 2007 ൽ ജംബഡ ഹുഡുംഗി എന്ന സിനിമയിലൂടെ അഭിനയ രംഗത്തെത്തിയ യാഷ് കെജിഎഫ് എന്ന സിനിമയിലൂടെയാണ് പ്രശസ്തനായത്.

2015 ൽ പുറത്തിറങ്ങിയ സിനിമ സൂപ്പർ ഹിറ്റ് ആയിരുന്നു. ഇതിന് ശേഷം കെജിഎഫ് ചാപ്റ്റർ ടുവും ഹിറ്റായി. ഇപ്പോഴിതാ യാഷിന്റെ സാമ്പത്തിക വിവരങ്ങളാണ് പുറത്ത് വരുന്നത്. ബാഗ്ലൂരിൽ ആറ് കോടി രൂപയുടെ ബംഗ്ലാവിലാണ് യാഷും ഭാര്യ രാധിക പണ്ഡിറ്റും കുട്ടികളായ ഐറയും യർഥവും കഴിയുന്നത്. അത്യാഡംബരം നിറഞ്ഞ ബംഗ്ലാവാണിത്.

ആഡംബര കാറുകളുടെ ശേഖരവും യാഷിനുണ്ട്. 80 ലക്ഷം രൂപ വില വരുന്ന റേഞ്ച് റോവർ ഇവോക്, 78 ലക്ഷത്തിന്റെ മെർസിഡെസ് ജിഎൽസി 250 ഡി, ഓഡി ക്യു 7, ബിഎംഡബ്ല്യു, പജേറോ സ്പോർട് തുടങ്ങിയ വാഹനങ്ങൾ യാഷിന് സ്വന്തമായുണ്ട്. 60 ലക്ഷം മുതൽ ഒരു കോടി വരെയാണ് ഒരു പരസ്യത്തിന് യാഷ് കൈപ്പറ്റുന്ന പ്രതിഫലം. റിപ്പോർട്ടുകൾ പ്രകാരം 53 കോടി രൂപയാണ് യാഷിന്റെ ആസ്തി.

കെജിഎഫ് ഒന്നാം ഭാഗത്തിന് 15 കോടി രൂപയാണ് യാഷ് കൈപറ്റിയ പ്രതിഫലം. രണ്ടാം ഭാഗത്തിനാവട്ടെ 25 കോടി രൂപയും. കെജിഎഫിന് ശേഷം യാഷിന്റെ മറ്റൊരു സിനിമയും പുറത്തിറങ്ങിയിട്ടില്ല. നിലവിലെ താരത്തിളക്കത്തെ ഒരു ചെറിയ പരാജയം പോലും ബാധിക്കും. അതിനാൽ വളരെ സൂക്ഷ്മതയോടെയാണ് യാഷ് സിനിമകൾ തെരഞ്ഞെടുക്കുന്നത്. കന്നഡ സിനിമാ രംഗത്ത് നിന്നും നടൻ പുനീത്, സുദീപ് തുടങ്ങിയവരെ ആയിരുന്നു മലയാളി പ്രേക്ഷകർക്കുൾപ്പെടെ അറിയുമായിരുന്നുള്ളൂ.

എന്നാലിപ്പോൾ ഋഷബ് ഷെട്ടി, യാഷ് തുടങ്ങി വൻ താര നിര കന്നഡയിൽ നിന്നും രാജ്യാന്തര തലത്തിൽ പ്രശസ്തർ ആയിരിക്കുന്നു. കാന്താര ആണ് കന്നഡയിൽ നിന്നും ഒടുവിൽ വന്ന സൂപ്പർ ഹിറ്റ് സിനിമ. ഋഷബ് ഷെട്ടിയുടെ സിനിമയ്ക്ക് മികച്ച പ്രേക്ഷക പ്രതികരണം ആണ് ലഭിച്ചത്. കേരളത്തിലുൾപ്പെടെ നിറഞ്ഞ തിയറ്ററുകളിൽ കാന്താര പ്രദർശിപ്പിക്കപ്പെട്ടു. കഴിഞ്ഞ ദിവസമാണ് കാന്താര ഒടിടിയിലും പുറത്തിറങ്ങിയത്.

ഇന്ത്യൻ സിനിമയുടെ വാണിജ്യ മുഖമായി തന്നെ കന്നഡ തെലുങ്ക്, സിനിമാ ലോകം മാറിക്കഴിഞ്ഞു. തെന്നിന്ത്യൻ മാസ് മസാല സിനിമകൾ ഉത്തരേന്ത്യൻ തിയറ്ററുകൾ വരെ അടക്കി വാഴുന്ന കാഴ്ചയാണ് അരങ്ങേറുന്നത്. ഒരു കാലത്ത് ബോളിവുഡിനുണ്ടായിരുന്ന സ്ഥാനം ഇന്ന് തെന്നിന്ത്യൻ സിനിമാ ലോകം കൈക്കലാക്കി. ബോളിവുഡ് ആവട്ടെ തെന്നിന്ത്യൻ സിനിമകളുടെ റീമേക്കുകൾ ഒരുക്കുന്ന സിനിമാ മേഖലയായി ചുരുങ്ങി.