തെന്നിന്ത്യൻ സിനിമാ ലോകത്തെ പ്രിയ താരങ്ങളില്‍ ഒരാളാണ് അപര്‍ണ ബാലമുരളി. ഇപ്പോഴിതാ അപര്‍ണ ബാലമുരളിക്ക് യുഎഇയുടെ ഗോള്‍ഡൻ വിസ ലഭിച്ചിരിക്കുകയാണ്. ദുബായിയലെ മുൻനിര സര്‍ക്കാര് സേവന ദാതാക്കളായ ഇസിഎഒ ഇഖ്‍ബാല്‍ മാര്‍ക്കോണിയില്‍ നിന്ന് അപര്‍ണ ബാലമുരളി ഗോള്‍ഡൻ വിസ ഏറ്റുവാങ്ങിയിരിക്കുന്നു. സൂരരൈ പൊട്ര് എന്ന തമിഴ് ചിത്രത്തിലൂടെ മികച്ച നടിക്കുള്ള ദേശീയ അവാര്‍ഡ് ലഭിച്ച താരമാണ് അപര്‍ണ ബാലമുരളി.

അതേസമയം അപര്‍ണ ബാലമുരളി നായികയായി ഏറ്റവും ഒടുവില്‍ പ്രദര്‍ശനത്തിന് എത്തിയ ചിത്രം 'നിതം ഒരു വാനം' ആണ്. രാ കാര്‍ത്തികാണ് ചിത്രത്തിന്റെ രചനയും സംവിധാനവും നിര്‍വ്വഹിച്ചിരിക്കുന്നത്. അശോക് സെല്‍വൻ ആണ് ചിത്രത്തില്‍ നായകനായത്. റിതു വര്‍മ്മയും ശിവാത്മികയും മറ്റു രണ്ട് പ്രധാന കഥാപാത്രങ്ങളെ അവതരിപ്പിക്കുകയുണ്ടായി.

അതോടൊപ്പം തന്നെ അപര്‍ണാ ബാലമുരളിയുടേതായി ഏറ്റവും ഒടുവില്‍ റിലീസ് ചെയ്‍ത മലയാള ചിത്രം 'ഇനി ഉത്തരം' ആണ്. ഏറെ അഭിനയപ്രാധാന്യമുള്ള കഥാപാത്രമായിരുന്നു ചിത്രത്തില്‍ അപര്‍ണാ ബാലമുരളിക്ക്. സുധീഷ് രാമചന്ദ്രനാണ് ചിത്രം സംവിധാനം ചെയ്‍തത്. ഹരീഷ് ഉത്തമൻ, സിദ്ധാർത്ഥ് മേനോൻ, സിദ്ദിഖ്, ജാഫർ ഇടുക്കി, ഷാജു ശ്രീധർ, ജയൻ ചേർത്തല, ബിനീഷ് പി, ഭാഗ്യരാജ് തുടങ്ങിയവരാണ് മറ്റു പ്രധാന താരങ്ങൾ. രഞ്ജിത് ഉണ്ണിയുടേതാണ് തിരക്കഥ, സംഭാഷണം. ഛായാഗ്രഹണം രവിചന്ദ്രൻ നിർവ്വഹിച്ചിരിക്കുന്നു. വിനായക് ശശികുമാർ എഴുതിയ വരികൾക്ക് ഹിഷാം അബ്‍ദുൽ വഹാബ് സംഗീതം പകരുന്നു.