2016 മലയാള സിനിമയ്ക്ക് നീറുന്ന ഓര്‍മ്മകള്‍ സമ്മാനിക്കുകയാണോ?. കല്‍പ്പനയും, ഒ.എന്‍.വിയും, ഛായാഗ്രാഹകന്‍ ആനന്ദക്കുട്ടന്‍ തുടങ്ങി സംവിധായകരായ രാജേഷ് പിള്ളയിലും മോഹന്‍ രൂപിലും എത്തിനിന്ന പ്രമുഖരുടെ പട്ടികയിലേക്ക് ഒടുവില്‍ കലാഭവന്‍ മണിയും. അപ്രതീക്ഷിതമായിരുന്നു ഓരോ വേര്‍പാടുകളും.

കല്‍പ്പനയുടെ വിടവാങ്ങലില്‍ ഞെട്ടിയ മലയാളിയെ വീണ്ടും തളര്‍ത്തുന്നതായിരുന്നു പിന്നീടുള്ള ഓരോ സംഭവങ്ങളും. അവസാനം അഭിനയിച്ച ചാര്‍ലിയിലൂടെ തന്റെ അഭിനയ പാടവം മലയാളിയെ ഒരിക്കല്‍ക്കൂടി ഓര്‍മ്മിപ്പിച്ചുകൊണ്ട് മലയാളത്തിന്റെ ഹാസ്യതാരം ഓര്‍മ്മകളിലേക്ക് മടങ്ങി. ഒരു തെലുങ്ക് സിനിമയുടെ ഷൂട്ടിങ് തിരക്കുകള്‍ക്കിടയില്‍ രാത്രി ഉറങ്ങാന്‍ കിടന്ന കല്‍പ്പന പിന്നീട് ഉണര്‍ന്നില്ല.

സംഗീത സംവിധായകന്‍ ജോണ്‍സണ്‍ മാഷിന്റെ മകള്‍ ഷാനിന്റെ മരണവാര്‍ത്തയാണ് പിന്നീട് മലയാളികളെ തേടിയെത്തിയത്. പിതാവിനെപ്പോലെ ഇമ്പമാര്‍ന്ന ഗാനങ്ങള്‍ മലയാളികള്‍ക്ക് പകര്‍ന്നുനല്‍കിയ ഷാന്‍ ഈണങ്ങള്‍ ബാക്കിയാക്കി പിതാവിന്റെയും സഹോദരന്റെയും ലോകത്തേയ്ക്ക് മടങ്ങുകയായിരുന്നു.

സിനിമാ, സാഹിത്യ, സാംസ്‌കാരിക ലോകത്തെ ഒരുപോലെ ദുഖത്തിലാഴ്ത്തുന്നതായിരുന്നു മഹാകവി ഒ.എന്‍.വിയുടെ വിടവാങ്ങല്‍. അവിസ്മരണീയമായ വരികളിലൂടെ മലയാളിയെ ഓര്‍മ്മകളിലേക്ക് തിരിച്ചുനടത്തിയ മഹാപ്രതിഭ. ഗാനരചനയില്‍ തന്റേതായ ഒരു യുഗം സമ്മാനിച്ചാണ് ഒ.എന്‍.വി മടങ്ങിയത്.

മലയാള സിനിമയിലെ മികച്ച ഛായാഗ്രാഹകന്‍ ആനന്ദക്കുട്ടന്റെയും സംഗീത സംവിധാനത്തിലും പശ്ചാത്തല സംഗീതത്തിലും തനതായ ശൈലി കാത്തുസൂക്ഷിച്ച രാജാമണിയുടെയും വേര്‍പാട് 2016ന്റെ നീറുന്ന ഓര്‍മ്മയായി.

'ട്രാഫിക്' എന്ന സിനിമയിലൂടെ നവസിനിമയുടെ പുതുമ മലയാളിയെ പരിചയപ്പെടുത്തിയ സംവിധായകന്‍ രാജേഷ് പിള്ളയുടെ വിടവാങ്ങലാണ് സിനിമാ ലോകത്തെ ഞെട്ടിച്ച മറ്റൊരു സംഭവം. തന്റെ പുതിയ സിനിമയായ വേട്ടയുടെ വിജയം നേരിട്ടനുഭവിക്കാന്‍ രാജേഷ് പിള്ളയ്ക്ക് വിധി അവസരമൊരുക്കിയില്ല.

സംവിധായകന്‍ മോഹന്‍ രൂപിന്റെ അപ്രതീക്ഷിത വിടവാങ്ങലും മലയാള സിനിമയെ ഈറനണിയിച്ചു. മോഹന്‍ലാല്‍, മമ്മൂട്ടി, ശ്രീനിവാസന്‍ താരനിരയില്‍ പുതുചരിത്രം രചിച്ച 'വേട്ട'യിലൂടെ മലയാള സിനിമയില്‍ തന്റെ സ്ഥാനമുറപ്പിച്ച മോഹന്‍ രൂപിനെ താമസസ്ഥലത്ത് മരിച്ച നിലയില്‍ കണ്ടെത്തുകയായിരുന്നു.

ഒടുവിലിതാ മണിയും. സാധാരണക്കാരുടെ ഇഷ്ടതോഴനായ കലാഭവന്‍ മണി, തന്റെ ഗാനങ്ങളിലൂടെയും മലയാളിയുടെ മനസ്സ് കീഴടക്കിപ്പോന്നിരുന്നു. രണ്ട് ദിവസമായി കൊച്ചിയിലെ ആശുപത്രിയില്‍ ചികിത്സയിലായിരുന്നു എങ്കിലും അദ്ദേഹത്തിന്റെ വിടവാങ്ങള്‍ അപ്രതീക്ഷിതമായിരുന്നു. മണി ആശുപത്രിയില്‍ ചികിത്സയിലാണെന്ന് സിനിമാലോകത്തെ അടുത്ത സുഹൃത്തുക്കള്‍പോലും അറിഞ്ഞിരുന്നില്ല. ഒരുപക്ഷേ നിര്‍വ്വികാരമായ ഒരു യാത്രപറച്ചില്‍ അദ്ദേഹവും ഇഷ്ടപ്പെട്ടിരുന്നില്ലാ എന്ന് വിശ്വസിക്കേണ്ടിവരും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha