കലാഭവന്‍ മണിയുടെ മരണവുമായി ബന്ധപ്പെട്ട് ദുരൂഹതകള്‍ ബാക്കിനില്‍ക്കെ മണിയുടെ മരണത്തെക്കുറിച്ചു തെറ്റിദ്ധാരണാജനകമായ പ്രചാരണം നടക്കുന്നതായി പരാധി. മരണം സ്വാഭാവികമാകാനാണു സാധ്യതയെന്ന പോലീസിന്റെ നിഗമനത്തെ ചോദ്യം ചെയ്യുന്ന തരത്തിലാണ് നവമാധ്യമങ്ങളിലടക്കം പ്രചാരണം നടക്കുന്നത്. മരണത്തില്‍ അസ്വാഭാവികതയുണ്ടെന്ന തരത്തില്‍ നടക്കുന്ന പ്രചാരണം അന്വേഷണത്തെ വഴിതെറ്റിക്കാനാണോയെന്നാണു പോലീസ് സംശയിക്കുന്നത്. മരണത്തില്‍ തമിഴില്‍നിന്നു മലയാളത്തിലെത്തിയ യുവനടനു പങ്കുണ്ടെന്നും 35 കോടിയുടെ ബിനാമി ഇടപാടാണ് ഇതിനു പിന്നിലെന്നുമുള്ള വാട്‌സാപ്പ് പ്രചാരണവും സംശയത്തിനിട നല്‍കുന്നതാണ്.മണിയുടെ മരണവുമായി ബന്ധപ്പെട്ട് ലഭിച്ച പോസ്റ്റുമോര്‍ട്ടം റിപ്പോര്‍ട്ടിലടക്കം ആത്മഹത്യയോ കൊലപാതകമോ എന്ന സൂചന പോലും നല്‍കിയിട്ടില്ല.
കരള്‍രോഗവും മദ്യപാനവും മരണത്തിലേക്കു നയിച്ചെന്നാണ് ഇതുവരെയുള്ള വിലയിരുത്തല്‍. സുഹൃത്തുക്കളടക്കമുള്ളവരെ ചോദ്യം ചെയ്തതില്‍നിന്നും സംശയിക്കത്തക്കതായി ഒന്നും പോലീസിനു കണ്ടെത്താനുമായിട്ടില്ല. മെഡിക്കല്‍ കോളജിലെ ഫോറന്‍സിക് വിദഗ്ധരായ ഡോ. പി.എ. ഷിജു, ഡോ. ഷേക്ക് സക്കീര്‍ ഹുസൈന്‍ എന്നിവര്‍ പോലീസിന് നല്‍കിയ അന്തിമ റിപ്പോര്‍ട്ടിലും മദ്യത്തിലെ വിഷാംശം അപകടകരമായ തോതിലല്ലെന്നാണു പറയുന്നത്. കരള്‍ രോഗം മൂര്‍ഛിച്ച ഒരാളുടെ ശരീരത്തിലെത്തുന്ന മദ്യവും മറ്റും വിഷത്തിനു തുല്യമായ പ്രതിപ്രവര്‍ത്തനമാണു നടത്തുക. മദ്യത്തോടൊപ്പം കഴിച്ചിട്ടുണ്ടാകും എന്നു സംശയിക്കുന്ന പച്ചക്കറിയില്‍ വിഷാംശമുണ്ടെങ്കില്‍ അതും മരണ കാരണമായേക്കാം എന്നാണു വിദഗ്ധരുടെ അഭിപ്രായം. കാക്കനാട്ടെ ഫോറന്‍സിക് ലാബ് ഡയറക്ടര്‍ മുരളീധരന്‍ നായര്‍ പോലീസിനു നല്‍കിയ മൊഴിയില്‍ നേരിയ തോതില്‍ മാത്രമേ കീടനാശിയുടെ അംശം ഉണ്ടാരുന്നുവെന്നാണു പറഞ്ഞിട്ടുള്ളത്.
മണിയുടെ തറവാട്ടുവീട്ടിനടുത്തുനിന്നു വിഷത്തിന്റേതെന്നു സംശയിക്കുന്ന കുപ്പികള്‍ കണ്ടെത്തിയതായി ദുരൂഹത വര്‍ധിപ്പിക്കുന്ന വാര്‍ത്തയും വന്നിരുന്നു. തെളിവുകളൊന്നും ലഭിക്കാത്തതിനാല്‍ ഇതു തുടക്കത്തിലേ പോലീസ് തള്ളിയിരുന്നു. എന്നാല്‍ പ്രചാരണത്തിനെതിരേ മണിയുടെ സഹോദരന്‍ രംഗത്തുവരികയും ചെയ്തു. ഇത്തരമൊരു സാഹചര്യത്തില്‍ മരണത്തില്‍ ദുരൂഹതയുണ്ടെന്നു വരുത്താനും അന്വേഷണം വഴിതിരിച്ചുവിടാനും ചില കേന്ദ്രങ്ങള്‍ ശ്രമിക്കുന്നതായും പോലീസിനു സംശയമുണ്ട്. ഹൈദരാബാദ് ലാബിലെ പരിശോധനാഫലം ലഭിക്കാതെ മരണകാരണം സംബന്ധിച്ച അന്തിമതീരുമാനത്തിലെത്താനാവില്ലെന്ന നിലപാടില്‍തന്നെയാണ് അന്വേഷണസംഘം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha