മലയാളികള്‍ ഏറെ നാളായി കാത്തിരുന്ന ദൃശ്യം 3 സിനിമയുടെ ട്രെയ്‌ലര്‍ നാളെ വൈകുന്നേരം പുറത്തെത്തും. മോഹന്‍ലാലിന്റെ പിറന്നാള്‍ ദിനത്തിലാണ് ചിത്രം ലോകമെമ്പാടുമുള്ള തിയറ്ററുകളില്‍ എത്തുക. ചിത്രത്തിന്റെ അഡ്വാന്‍സ് ബുക്കിംഗ് എപ്പോള്‍ ആരംഭിക്കും എന്നത് സംബന്ധിച്ചുള്ള വിവരങ്ങളും തുടര്‍ ദിനങ്ങളില്‍ പുറത്തെത്തും. അതേസമയം ചില വിദേശ മാര്‍ക്കറ്റുകളില്‍ ചിത്രത്തിന്റെ അഡ്വാന്‍സ് ബുക്കിഗ് ഇതിനകം ആരംഭിച്ചിട്ടുണ്ട്.

കേരളത്തില്‍ ഫാന്‍സ് ഷോ ടിക്കറ്റുകളും വില്‍ക്കുന്നുണ്ട്. ദൃശ്യം ഫ്രാഞ്ചൈസിയിലെ ജോര്‍ജുകുട്ടിയും ഭാര്യ ആനിയമ്മയുമൊക്കെ മലയാളി പ്രേക്ഷകര്‍ക്ക് തൊട്ട് അയല്‍പക്കത്തുള്ള ഒരു കുടുംബം പോലെയാണ്. സ്വന്തം കുടുംബത്തിന്റെ രക്ഷയ്ക്കായി ഏതറ്റം വരെയും പോകാനിറങ്ങിത്തിരിച്ച ജോര്‍ജുകുട്ടിക്കു മുന്നില്‍ വലിയ പ്രതിസന്ധികളാണ് എത്തിയത്. എത്ര പ്രതിസന്ധികളുണ്ടായാലും കുടുംബത്തെ രക്ഷിക്കണമെന്ന ഉറച്ച തീരുമാനമുള്ള ഒരു ഗൃഹനാഥന്റെ ആത്മസംഘര്‍ഷങ്ങള്‍. മൂന്നാം ഭാഗത്തെ മുന്നോട്ട് നയിക്കുന്നതും ജോര്‍ജുകുട്ടിയുടെ ഉറച്ച തീരുമാനങ്ങള്‍ ആയിരിക്കും.

ദൃശ്യത്തില്‍ നിന്നും ദൃശ്യം 3 ല്‍ എത്തുമ്പോള്‍ പിന്നിട്ട കാലയളവിന്റെ എല്ലാ മാറ്റങ്ങളും ഉള്‍ക്കൊണ്ടു കൊണ്ടാണ് ജോര്‍ജുകുട്ടിയേയും കുടുംബത്തേയും ജീത്തു ജോസഫ് പ്രേക്ഷകര്‍ക്കു മുന്നിലെത്തിക്കുന്നത്. ചിത്രത്തിന്റെ വന്‍ വിപണിമൂല്യം മുന്നില്‍ കണ്ട് ബോളിവുഡിലെ വമ്പന്‍ സ്റ്റുഡിയോകളും ആശിര്‍വാദ് സിനിമാസിനൊപ്പം മലയാളം ദൃശ്യം 3 ന്റെ ഭാഗമാവുന്നുണ്ട്. ദൃശ്യം 3 ഹിന്ദി പതിപ്പിന്റെ നിര്‍മ്മാതാക്കളായ പനോരമ സ്റ്റുഡിയോസ് ദൃശ്യം 3 മലയാളം ഒറിജിനലിന്റെ ആഗോള തിയട്രിക്കല്‍, ഡിജിറ്റല്‍ റൈറ്റുകള്‍ വാങ്ങിയതായി നേരത്തെ റിപ്പോര്‍ട്ടുകള്‍ എത്തിയിരുന്നു. ബോളിവുഡിലെ മറ്റൊരു പ്രമുഖ ബാനര്‍ ആയ പെന്‍ സ്റ്റുഡിയോസ് പനോരമ സ്റ്റുഡിയോസിലൂടെ ആശിര്‍വാദ് സിനിമാസില്‍ 100 കോടി മുതല്‍മുടക്കുന്നുമുണ്ട്.