മമ്മൂട്ടിയും മോഹന്‍ലാലും തന്റെ ചിത്രത്തിലൂടെ വീണ്ടും ഒന്നിച്ചഭിനയിക്കുന്നുവെന്ന വാര്‍ത്ത നിഷേധിച്ച് ഉദയ്കൃഷ്ണ. പുലിമുരുകന്‍ എന്ന സിനിമയുടെ തിരക്കഥാകൃത്തായ ഉദയ്കൃഷ്ണ ആദ്യമായി സംവിധാനം ചെയ്യുന്ന ചിത്രത്തിലൂടെ ഇരുവരും ഒന്നിക്കുന്നൂവെന്നായിരുന്നു പുറത്ത് വന്ന വാര്‍ത്തകള്‍.

എന്നാല്‍ അത്തരത്തിലുള്ള വാര്‍ത്തകള്‍ നിഷേധിച്ച് ഉദയ്കൃഷ്ണതന്നെ രംഗത്തെത്തിയിരിക്കുകയാണ്. മമ്മൂട്ടിയെ നായകനാക്കി ഒരുങ്ങുന്ന സിനിമയുടെ തിരക്കഥ രചിക്കുന്ന ജോലിയിലാണെന്നും മറ്റുള്ള വാര്‍ത്തകളെല്ലാം തെറ്റാണെന്നും ഉദയ്കൃഷ്ണ അറിയിച്ചു. മമ്മൂട്ടിയേയും മോഹന്‍ലാലിനേയും പോലെയുള്ള വലിയ താരങ്ങളോടൊപ്പം പ്രവര്‍ത്തിക്കുക എന്നത് എല്ലാ സംവിധായകരുടേയും വലിയ ആഗ്രഹമാണ്, എന്നാല്‍ ഇപ്പോള്‍ പുറത്ത് വരുന്ന വാര്‍ത്തകള്‍ ശരിയല്ല.

ഇത്തരം വാര്‍ത്തകള്‍ നല്‍കുമ്‌ബോല്‍ സിനിമയിലെ സൗഹൃദങ്ങളെ അത് എങ്ങനെ ബാധിക്കുമെന്ന കാര്യം ആലോചിക്കണമെന്നും ഉദയ്കൃഷ്ണ ഓര്‍മപ്പെടുത്തി. മമ്മൂട്ടിയും മോഹന്‍ലാലും ഒന്നിക്കുന്ന ചിത്രം ആന്റണി പെരുമ്ബാവൂരം ആന്റോ ജോസഫും ഒരുമിച്ച് നിര്‍മിക്കുമെന്നായിരുന്നു റിപ്പോര്‍ട്ട്.
മമ്മൂട്ടി നായകാനാകുന്ന ചിത്രത്തിന് വേണ്ടിയാണ് ഇപ്പോള്‍ തിരക്കഥ എഴുതുന്നത്. അതിന് ശേഷം ദിലീപീന്റേയും ജയറാമിന്റേയും സിനിമകളുടെ തിരക്കഥാ രചനകള്‍ ആരംഭിക്കുമെന്നും അദ്ദേഹം പറഞ്ഞു.