വിജയലക്ഷ്മിയുടെ വിവാഹനിശ്ചയം കഴിഞ്ഞു. മലയാളികളുടെ പ്രിയഗായിക വൈക്കം വിജയലക്ഷ്മിയുടെ വിവാഹം മാര്‍ച്ച് 29നു നടക്കും. വൈക്കം മഹാദേവക്ഷേത്രത്തില്‍ രാവിലെ ഒമ്പതിനും പതിനൊന്നരയ്ക്കും ഇടയിലാണു വിവാഹം.
ഇന്നു രാവിലെ വിജയലക്ഷ്മിയുടെ വൈക്കത്തെ വീട്ടില്‍ വച്ചായിരുന്നു വിവാഹനിശ്ചയം നടന്നത്. തൃശൂര്‍ കുന്നത്തങ്ങാടി സ്വദേശിയായ സന്തോഷാണ് വിജയലക്ഷ്മിയുടെ വരന്‍.
ഹോട്ടല്‍ മാനേജ്‌മെന്റ് പഠനശേഷം ബഹ്‌റൈനില്‍ ജോലി നോക്കുകയാണു സന്തോഷ്. വിജയലക്ഷ്മിക്കു വരനെത്തേടുന്നെന്ന പരസ്യം കണ്ടു നിരവധി പേര്‍ വിവാഹത്തിനു സന്നദ്ധരായി പ്രതികരിച്ചിരുന്നു. വിവാഹപരസ്യത്തിലൂടെയാണ് സന്തോഷിന്റെ ആലോചനയും എത്തിയത്.
കഴിഞ്ഞ ദിവസം ഒരു പരിപാടിക്കിടെ മുഖ്യമന്ത്രി പിണറായി വിജയന്‍ വിജയലക്ഷ്മിയുടെ വിവാഹനിശ്ചയത്തെക്കുറിച്ചു പറഞ്ഞിരുന്നു. എല്ലാവരെയും ക്ഷണിക്കണമെന്നു വിജയലക്ഷ്മി ആവശ്യപ്പെട്ടിരുന്നുവെന്നും അതനുസരിച്ച് എല്ലാവരെയും ചടങ്ങിലേക്കു ക്ഷണിക്കുകയായിരുന്നെന്നും പിണറായി പറഞ്ഞിരുന്നു.സെല്ലുലോയ്ഡ് എന്ന കമല്‍ ചിത്രത്തിലൂടെയായിരുന്നു വിജയലക്ഷ്മിയുടെ ആദ്യ സിനിമാ ഗാനം. കാറ്റേ കാറ്റേ എന്ന പാട്ടിലൂടെ സംസ്ഥാന ചലച്ചിത്ര പുരസ്‌കാരത്തില്‍ ആദരം നേടി. തൊട്ടടുത്ത വര്‍ഷം നടന്‍ എന്ന ചിത്രത്തിലെ ഒറ്റയ്ക്കു പാടുന്ന പൂങ്കുയിലേ എന്ന പാട്ടിലൂടെ മികച്ച ഗായികയുമായി. ബാഹുബലി അടക്കമുള്ള ചിത്രങ്ങളില്‍ വിജയലക്ഷ്മി പാടിയിട്ടുണ്ട്.
ഏറെക്കാലത്തെ പ്രാര്‍ത്ഥനയുടെ ഫലം ആണ് ഈ വിവാഹം എന്നായിരുന്നു വിജയലക്ഷ്മിയുടെ അമ്മയുടെ പ്രതികരണം. മറ്റുള്ളവര്‍ കാണുന്ന കാഴ്ചകള്‍ ഉള്‍ക്കണ്ണുകൊണ്ടുമാത്രം കാണാന്‍ കഴിയുന്ന വിജയലക്ഷ്മി സ്വരമാധുരി കൊണ്ടു മലയാളികളുടെ മനസില്‍ ഇടംനേടിയ കലാകാരിയാണ്.