ആരാധകരെ ആവേശത്തിലാറാടിക്കും എന്ന് ഉറപ്പ് വരുത്തി ബാഹുബലി2 ന്റെ ട്രെയിലര്‍ പുറത്തിറങ്ങി. 250-300 സ്‌ക്രീനുകളില്‍ ട്രെയിലര്‍ പ്രദര്‍ശിപ്പിച്ചു. ഏപ്രില്‍ 28നാണ് 'ബാഹുബലി 2' തിയറ്ററുകളിലെത്തുക. പ്രഭാസ്, റാണാ ദഗ്ഗുപതി, അനുഷ്‌കാ ഷെട്ടി, തമന്നാ ഭാട്ടിയ, സത്യരാജ്, രമ്യാകൃഷ്ണന്‍ എന്നിവര്‍ രണ്ടാം ഭാഗത്തിലുമുണ്ട്. എന്തിനാണ് കട്ടപ്പ ബാഹുബലിയെ കൊന്നത് എന്നത് പിടികിട്ടാത്തെ ചോദ്യമായി ട്രെയിലറിലും ഉയരുന്നു. നിങ്ങള്‍ എന്റെ കൂടെ ഉള്ളടത്തോളം കാലം ഒരുത്തനുമെന്നെ കൊല്ലാന്‍ കഴിയില്ലെന്ന് ബാഹുബലി കട്ടപ്പയോട് പറയുന്നതും അത് കേട്ട് കട്ടപ്പ പരിഭ്രമിക്കുന്ന രംഗവും ട്രെയിലറില്‍ ഉള്‍പ്പെടുത്തിയിട്ടുണ്ട്.

എല്ലാ ദക്ഷിണേന്ത്യന്‍ ഭാഷകളിലും, ഹിന്ദിയിലും ചിത്രം റിലീസ് ചെയ്യുന്നുണ്ട്. നേരത്തെ ഫസ്റ്റ് ലുക്ക് പോസ്റ്ററില്‍ ചില്ലറ പ്രശ്നങ്ങള്‍ ഉണ്ടായിരുന്നു. എന്നാല്‍ അതെല്ലാം പരിഹരിച്ച് ആരാധകരുടെ ആകാംക്ഷ നിലനിര്‍ത്തി രണ്ടാമത് ഒരു പോസ്റ്റര്‍ കൂടി വന്നിരുന്നു. ഇപ്പോഴിതാ ബാഹുബലി ആദ്യ ഭാഗത്തെ കവച്ച് വയ്ക്കുമെന്ന് ഉറപ്പ് പറയാവുന്ന ട്രെയിലറും. കളക്ഷന്‍ റെക്കോര്‍ഡ് നേടിയ ബാഹുബലി ആദ്യഭാഗത്തിന്റെ വിജയത്തുടര്‍ച്ച രണ്ടാം ഭാഗത്തിനും ഉണ്ടാകുമെന്നാണ് അണിയറപ്രവര്‍ത്തകര്‍ കരുതുന്നത്.