സിനിമ മതിയാക്കി പുതിയ ജോലി തേടുന്നതിനെക്കുറിച്ച് ഗൗരവമായ ആലോചനയിലായിരുന്നു താന്‍ എന്നാണ് ഒരു തമിഴ് മാദ്ധ്യമത്തിനു നല്‍കിയ അഭിമുഖത്തില്‍ അമല പറഞ്ഞത്. നായകന്മാരുമായി ഡ്യൂയറ്റ് പാടിയും പ്രണയരംഗങ്ങളില്‍ അഭിനയിച്ചും മടുത്തു. അതോടെയാണ് സിനിമയില്‍ നിന്ന് വിട്ടു നില്‍ക്കുന്നതിനെ കുറിച്ച് കാര്യമായി ചിന്തിച്ചു തുടങ്ങിയത്. അതിനായി മനസിനിണങ്ങിയ മറ്റു ജോലികളെ കുറിച്ച് അന്വേഷണവും നടത്തി. അതിനിടെയാണ് എന്നെത്തേടി ആടൈയുടെ സിനോപ്‌സിസ് എത്തുന്നത്. അതെന്നെ വല്ലാതെ അമ്ബരപ്പിച്ചു. ഇങ്ങനെയും കഥ പറയാം എന്ന് ചിന്തിപ്പിച്ചു. ഉടന്‍ തന്നെ സംവിധായകന്‍ രത്‌നകുമാറിനെ കാണാന്‍ താത്പര്യമുണ്ടെന്ന് അറിയിച്ചു. അങ്ങനെയാണ് ആടൈയിലെത്തിയത്.

തുടര്‍ന്ന് നിരവധി പുതുമയാര്‍ന്ന ചിത്രങ്ങള്‍ തേടി വന്നു. കഡാവറിന്റെ കഥയും അത്തരത്തില്‍ ത്രില്ലടിപ്പിച്ചതാണ്. അതിന്റെ കഥയുമായി സംവിധായകന്‍ പല നായകന്മാരെയും കണ്ടു. പക്ഷേ നായികാ പ്രധാന്യമുള്ള ചിത്രത്തില്‍ സഹകരിക്കാന്‍ പലര്‍ക്കും മടിയായിരുന്നു. തുടക്കത്തില്‍ മറ്റു ചിത്രങ്ങളുടെ തിരക്കു കാരണം ഞാനും ആ പ്രോജക്ട് ഒഴിവാക്കിയതാണ്. പക്ഷേ അതില്‍ ഞാന്‍ തന്നെ നായികയാകണമെന്ന് സംവിധായകന്‍ നിര്‍ബന്ധിച്ചു. അങ്ങനെയാണ് ആ പ്രോജക്ട് ഒ.കെയായത്. പിന്നെ ഫോറന്‍സിക് വിഷയം ആസ്പദമാക്കി ഒരു മുഴുനീള സിനിമ ഇന്ത്യയില്‍ തന്നെ ആദ്യമാണെന്ന് തോന്നുന്നു. ആ സിനിമയുടെ നിര്‍മ്മാതാക്കളില്‍ ഒരാളാകാന്‍ കഴിഞ്ഞതും ഭാഗ്യമായി കരുതുന്നതായും അമല പറഞ്ഞു. അഞ്ചോളം സിനിമകളാണ് അമലയുടേതായി തിയേറ്ററില്‍ റിലീസാകാന്‍ ഒരുങ്ങി നില്‍ക്കുന്നത്.