ആരോഗ്യവകുപ്പും ആശാ വർക്കർമാരും നിരന്തരം ഇടപെട്ടിട്ടും, മാതാപിതാക്കളുടെ കടുത്ത അനാസ്ഥയും നിസ്സഹകരണവുമാണ് കുഞ്ഞ് രാഹുലിന്റെ ജീവൻ നഷ്ടപെടുന്നതിലേയ്ക്ക് കാര്യങ്ങൾ എത്തിച്ചത്. മരിച്ച രാഹുൽ ഉൾപ്പെടെ ഏഴ് കുഞ്ഞുങ്ങളാണ് ഈ ദമ്പതികൾക്കുള്ളത്. "അയ്യോ ടീച്ചറേ, ഒരു രഹസ്യം പറയാം; ആരോടും പറയരുത്, ഒരു കുഞ്ഞ് പോയി..."

തങ്ങളുടെ ആറാമത്തെ കുഞ്ഞ് മരണപ്പെട്ട വിവരം പിതാവായ രാജേഷ് ആശാ വർക്കറെ വിളിച്ചറിയിച്ചത് ഇങ്ങനെയായിരുന്നു. വർഷങ്ങളായി തുടരുന്ന കടുത്ത അനാസ്ഥയുടെയും ഒളിച്ചുകളിയുടെയും ഒടുവിലാണ് കാർത്തികപ്പള്ളി കൈമുട്ടി കോളനിയിൽ ഒരു പിഞ്ചുജീവൻ പൊലിഞ്ഞത്.
ബിരുദധാരിയായ രാജേഷും ഭാര്യ താരയും തങ്ങളുടെ കുഞ്ഞുങ്ങൾക്ക് കൃത്യമായി ഭക്ഷണമോ പരിചരണമോ നൽകിയിരുന്നില്ലെന്നാണ് പുറത്തുവരുന്ന വിവരങ്ങൾ. കോവിഡ് കാലം മുതൽ ആരോഗ്യവകുപ്പും ഗ്രാമപഞ്ചായത്തും ഈ കുടുംബത്തെ നിരന്തരം നിരീക്ഷിച്ചുവരികയായിരുന്നു.

മാലിന്യങ്ങൾ നിറഞ്ഞ, അങ്ങേയറ്റം വൃത്തിഹീനമായ സാഹചര്യത്തിലാണ് കുഞ്ഞുങ്ങളെ ഇവർ പാർപ്പിച്ചിരുന്നത്. ആശാ വർക്കർമാർ നൽകുന്ന പോഷകാഹാരം പോലും ഇവർ കുഞ്ഞുങ്ങൾക്ക് നൽകിയിരുന്നില്ലെന്ന് അയൽക്കാർ ആരോപിക്കുന്നു. അധികൃതർ ഇടപെട്ട് കുഞ്ഞുങ്ങളെ സംരക്ഷിക്കാൻ ശ്രമിക്കുമ്പോഴെല്ലാം ഇവർ താമസം മാറിപ്പോകുകയായിരുന്നു പതിവ്. മുതുകുളം, ചിങ്ങോലി, മാന്നാർ, ഹരിപ്പാട് തുടങ്ങി പലയിടങ്ങളിലായി ഈ കുടുംബം മാറിമാറി താമസിച്ചു. കുടുംബാസൂത്രണ മാർഗങ്ങൾ സ്വീകരിക്കാൻ ആരോഗ്യവകുപ്പ് ജീവനക്കാർ പലതവണ ആവശ്യപ്പെട്ടെങ്കിലും ഇരുവരും അതിന് തയ്യാറായില്ല.

കഴിഞ്ഞ ഓഗസ്റ്റ് മുതൽ ആരോഗ്യപ്രവർത്തകർ ദിവസവും ഇവരുടെ വീട്ടിലെത്തി സ്ഥിതിഗതികൾ വിലയിരുത്തിയിരുന്നു. രണ്ടു ദിവസം മുൻപ് താര ഏഴാമത്തെ കുഞ്ഞിന് ജന്മം നൽകി ആശുപത്രിയിൽ കഴിയുമ്പോഴാണ്, വീട്ടിൽ അവശേഷിച്ച കുഞ്ഞ് രാഹുൽ മരണപ്പെടുന്നത്. മരണസമയത്ത് വെറും 7 കിലോ മാത്രമായിരുന്നു ഈ കുഞ്ഞിന്റെ ഭാരം! കുഞ്ഞിന് കട്ടൻചായയിൽ ബിസ്കറ്റ് കലക്കി നൽകിയതായും വിവരമുണ്ട്. അന്ധവിശ്വാസങ്ങളുടെ ഭാഗമാണോ ഈ അവഗണന എന്നതിലും പോലീസ് അന്വേഷണം ആരംഭിച്ചിട്ടുണ്ട്. നിലവിൽ ഇവരുടെ നാല് പെൺകുട്ടികൾ ചൈൽഡ് ലൈനിന്റെ സംരക്ഷണയിലാണ്.

സംവിധാനങ്ങളുടെയും നിയമങ്ങളുടെയും കണ്ണുവെട്ടിച്ച് മാതാപിതാക്കൾ നടത്തിയ ഒളിച്ചുകളി ഒടുവിൽ ഒരു കുഞ്ഞിന്റെ ജീവനാണ് കവർന്നത്. അധികൃതരുടെ ഇടപെടലുകളിൽ എവിടെയാണ് വീഴ്ച സംഭവിച്ചതെന്ന ചോദ്യം ബാക്കിയാവുകയാണ്. നിലവിൽ ശേഷിക്കുന്ന കുഞ്ഞുങ്ങളുടെ സുരക്ഷ ഉറപ്പാക്കാനുള്ള അടിയന്തര നടപടികളിലാണ് ചൈൽഡ് ലൈനും ആരോഗ്യവകുപ്പും.