തിരുവല്ലയിലെ പുളിക്കീഴില്‍ മൂന്ന് വര്‍ഷം മുന്‍പ് ചതുപ്പില്‍ നിന്നും മൂന്നുവയസുകാരന്റെ മൃതദേഹം കിട്ടിയ സംഭവം കൊലപാതകമെന്ന് തെളിഞ്ഞു. അമ്മയും ആണ്‍സൂഹൃത്തും തമ്മില്‍ നടന്ന വഴക്കിനിടെയാണ് കൊലപാതക വിവിരം പുറത്തുവന്നത്. അമ്മയുടെ ആണ്‍സുഹൃത്താണ് കൊലനടത്തിയതെന്ന് സൂചന കിട്ടിയതോടെ അമ്മ മഞ്ജുവിനെ പൊലീസ് കസ്റ്റഡിയിലെടുത്തു. ഇവരുടെ ആണ്‍ സുഹൃത്ത് ശിവയാണ് കുഞ്ഞിനെ ശ്വാസംമുട്ടിച്ച് കൊലപ്പെടുത്തിയത്.

പാലക്കാട് മീങ്കര സ്വദേശിയാണ് നാടോടി സ്ത്രീയായ മഞ്ജു (45). 2023 ഓഗസ്റ്റില്‍ പുളിക്കീഴിലെ ചതുപ്പില്‍ നിന്നാണ് കുട്ടിയുടെ മൃതദേഹം കണ്ടെത്തിയത്. ഏതാനും ദിവസത്തെ പഴക്കമാണ് അന്ന് മൃതദേഹത്തിനുണ്ടായിരുന്നത്. പുളിക്കീഴ് സെന്റ് മേരീസ് ഓര്‍ത്തഡോക്‌സ് പള്ളിക്ക് സമീപമുള്ള ചതുപ്പിലാണ് കുട്ടിയുടെ മൃതദേഹം കുഴിച്ചിട്ടത്. മഞ്ജുവും ശിവയും തമ്മിലെ ശാരീരികബന്ധം നടക്കുന്ന സമയത്ത് കുട്ടി കരഞ്ഞതാണ് പ്രതിക്ക് പ്രകോപനമായത്. ചങ്ങനാശേരി കെഎസ്ആര്‍ടിസി ജംഗ്ഷനിലെ കടത്തിണ്ണയില്‍ വച്ചാണ് ക്രൂരകൃത്യം പ്രതി ചെയ്തത്.

കഴിഞ്ഞദിവസം പാലക്കാടുവച്ച് മഞ്ജുവും ശിവയും തമ്മില്‍ വഴക്കുണ്ടായിരുന്നു. ഈസമയം കുഞ്ഞിന്റെ കൊലപാതകം സംബന്ധിച്ചും പരസ്പരം കുറ്റപ്പെടുത്തി. ഇതോടെ പ്രദേശവാസികള്‍ സ്ഥലത്തെ എസ്‌സി പ്രമോട്ടറെ വിവരം അറിയിച്ചു. അവര്‍ പൊലീസില്‍ വിവരം കൈമാറി. അതോടെയാണ് മഞ്ജു പൊലീസ് പിടിയിലായത്. മഞ്ജു തമിഴ്‌നാട്ടിലായിരുന്നു അടുത്തിടെയായി താമസം. ഇവരുടെ അറസ്റ്റ് രേഖപ്പെടുത്തി. പ്രതിയായ ശിവ ഇയാളുടെ സഹോദരന്‍ ശക്തി എന്നിവര്‍ക്കായുള്ള അന്വേഷണം പൊലീസ് ഊര്‍ജിതപ്പെടുത്തി.