ബിഗ് ബോസ് തമിഴ് പതിപ്പിന്റെ മൂന്നാം സീസണിൽ കഴിഞ്ഞ എപ്പിസോഡിനെ അതി രൂക്ഷമായി വിമർശിച്ച് തെന്നിന്ത്യൻ പിന്നണി ഗായിക ചിന്മയി ശ്രീപാദ രംഗത്ത്. മൂന്നാം പതിപ്പിലെ ഒരു മത്സരാർത്ഥിയുടെ പ്രതികരണമാണ് പുതിയ വിവാദങ്ങൾക്ക് തിരി കൊളുത്തിയിരിക്കുന്നത്. ബസ്സ് യാത്രയ്ക്കിടെ സ്ത്രീകളെ ഉപദ്രവിക്കാൻ ശ്രമിച്ചിട്ടുണ്ടെന്ന് ഒരു മത്സരാർത്ഥി തുറന്നു പറയുന്നത് സംപ്രേക്ഷണം ചെയ്ത ചാനലിന് എതിരെ രംഗത്തു വന്നിരിക്കുകയാണ് ചിന്മയി. മല്‍സരാര്‍ത്ഥികളില്‍ ഒരാളായ ശരവണനാണ് താൻ കോളേജില്‍ പഠിക്കുന്ന സമയത്ത് ബസില്‍ കയറുമ്പോള്‍ സ്ത്രീകളെ തോണ്ടുകയും ദുരുദ്ദേശത്തോടെ സ്പര്‍ശിക്കുകയും ചെയ്തിട്ടുണ്ടെന്ന് തുറന്നു പറഞ്ഞത്.

കമല്‍ഹാസന്‍ മല്‍സരാര്‍ത്ഥികളോടെല്ലാം സംസാരിക്കുന്ന സമയത്തായിരുന്നു ശരവണന്‍ ഇക്കാര്യം പറഞ്ഞത്. ശരവണന്‍ പറഞ്ഞതിന് വലിയ കൈയ്യടിയാണ് കാണികള്‍ നല്‍കിയത്. സ്ത്രീകള്‍ക്ക് ബസില്‍ മോശം അനുഭവങ്ങള്‍ എല്ലായ്‌പ്പോഴും നേരിടേണ്ടി വരാറുണ്ടെന്ന് കമല്‍ഹാസന്‍ പറഞ്ഞപ്പോളാണ് ശരവണന്‍ തന്റെ അനുഭവം വെളിപ്പെടുത്തിയത്.

ശരവണന്‍ തന്റെ അനുഭവം ബിഗ് ബോസില്‍ വെളിപ്പെടുത്തിയെങ്കിലും കമല്‍ഹാസന്‍ ഉള്‍പ്പെടെയുളള ആരും അതിനെ വിമര്‍ശിച്ചില്ല. ഇതിനെതിരെയാണ് ചിന്മയി രംഗത്തെത്തിയിരിക്കുന്നത് .

പരിപാടിയുടെ വീഡിയോ ക്ലിപ്പ് പങ്കുവെച്ചുകൊണ്ടായിരുന്നു ചിന്മയിയുടെ ട്വിറ്റർ പോസ്റ്റ്. “താൻ പൊതു ബസ് ഗതാഗത സംവിധാനം സ്ത്രീകളെ ഉപദ്രവിക്കാൻ/ ചൂഷണം ചെയ്യാൻ ഉപയോഗിച്ചുവെന്ന് അഭിമാനത്തോടെ ഒരു മനുഷ്യൻ തുറന്നുപറയുന്നത് സംപ്രേക്ഷണം ചെയ്തിരിക്കുന്നു. ഇതൊരു തമാശയാണ് പ്രേക്ഷകർക്ക്. കയ്യടിക്കുന്ന സ്ത്രീകളോട്… കഷ്ടം.” ചിന്മയി പ്രതികരിച്ചു .

ചിന്മയിയെ കൂടാതെ നിരവധിപേരാണ് സോഷ്യല്‍ മീഡിയയില്‍ ഇതിനെതിരെ വലിയ രീതിയിലുളള വിമര്‍ശനങ്ങൾ ഉന്നയിച്ചിരിക്കുന്നത് . മല്‍സരാര്‍ത്ഥികള്‍ക്കൊപ്പം തന്നെ കമല്‍ഹാസനെ വിമര്‍ശിച്ചുകൊണ്ടും നിരവധിപേര്‍ സമൂഹ മാധ്യമങ്ങളില്‍ എത്തുന്നുണ്ട്.

കഴിഞ്ഞ തവണ സംവിധായകന്‍ ചേരനും നടി മീര മിഥുനും തമ്മിലുളള പ്രശ്‌നമായിരുന്നു ബിഗ് ബോസിന്റെതായി ചര്‍ച്ചയായി മാറിയത്. നടനും സംവിധായകനുമായ ചേരന്‍ ബിഗ് ബോസില്‍ നിന്നും തന്നെ കേറിപിടിച്ചെന്ന ആരോപണവുമായിട്ടായിരുന്നു മീര മിഥുന്‍ എത്തിയിരുന്നത്. ഈ സംഭവത്തിന് ശേഷം സംവിധായകനെ വിമര്‍ശിച്ചുകൊണ്ട് നിരവധി പേര്‍ എത്തിയിരുന്നു. ടാസ്‌കിനിടെ ചേരന്‍ അനുവാദമില്ലാതെ എന്റെ അരയില്‍ ചുറ്റി പിടിച്ചെന്നാണ് നടി പറഞ്ഞത്. സംഭവം വിവാദമായതോടെ ചേരന്‍ നടിയോട് മാപ്പ് പറഞ്ഞ് എത്തുകയും ചെയ്തിരുന്നു.

ടെലിവിഷൻ ദൃശ്യാനുഭവങ്ങൾക്ക് പുത്തൻ മാനങ്ങൾ നൽകിയ പരിപാടിയാണ് ബിഗ് ബോസ് റിയാലിറ്റി ഷോ. വിവിധ രാജ്യങ്ങള്‍ ഏറ്റെടുത്ത, ഡച്ച് ടെലിവിഷന്‍ സീരിസായ ‘സെലിബ്രിറ്റി ബിഗ് ബ്രദര്‍’ എന്ന റിയാലിറ്റി ഷോയാണ് ബിഗ് ബോസ് റിയാലിറ്റി ഷോയുടെ പ്രചോദനം. ഷോയുടെ എല്ലാ പതിപ്പുകള്‍ക്കും മികച്ച സ്വീകാര്യതയാണ് പ്രേക്ഷകര്‍ നല്‍കിയിരുന്നത്. മറ്റു ഭാഷകളിലെല്ലാം ഹിറ്റായ ശേഷമായിരുന്നു ബിഗ് ബോസ് മലയാളത്തിലേക്കും എത്തിയിരുന്നത്. നൂറ് ദിവസങ്ങളിലായി നടക്കുന്ന ഷോയില്‍ സംഭവബഹുലമായ കാര്യങ്ങളാണ് നടക്കാറുളളത്. അടുത്തിടെയാണ് ബിഗ് ബോസ് തമിഴ് പതിപ്പിന്റെ മൂന്നാം സീസണ്‍ ആരംഭിച്ചത്. ആദ്യ രണ്ട് സീസണുകളും വിജയമായ ശേഷമാണ് പുതിയ പതിപ്പും ആരംഭിച്ചിരുന്നത്.കമല്‍ഹാസന്‍ അവതാരകനായി എത്താറുളള ഷോയ്ക്ക് മികച്ച സ്വീകാര്യതയാണ് ലഭിക്കാറുളളത്.