അടുത്തിടെയാണ് യുവനടൻ ഭഗത് മാനുവൽ വീണ്ടും വിവാഹിതനായത്. കോഴിക്കോട് സ്വദേശിനി ഷെലിൻ ചെറിയാനെയാണ് രണ്ടാമത് വിവാഹം കഴിച്ചത്. ഇവരുടെ വിവാഹ ചിത്രങ്ങളും വീഡിയോയും സോഷ്യൽ വൈറലായിരുന്നു. ഇപ്പോൾ ഒരു സ്വകാര്യ മാധ്യമത്തിന് നൽകിയ അഭിമുഖത്തിൽ താൻ എന്തുകൊണ്ട് സോഷ്യൽ മീഡിയയിൽ സജീവമല്ലെന്ന് വെളിപ്പെടുത്തുകയാണ് ഭഗത് മാനുവൽ. രണ്ട് ലക്ഷത്തിലധികം ഫോളോവേര്‍സുള്ള ഒരു പേജ് തനിക്കുണ്ടായിരുന്നെന്നും പിന്നീട് ആ പേജ് ഹാക്ക് ചെയ്യപ്പെടുകയായിരുന്നെന്നും ഭഗത് പറയുന്നു. ഇതിനിടെ ഷെലിന് ഒരു പരാതി കൂടെ ബോധിപ്പിച്ചു. 

എന്തിനാ ഈ പെണ്‍പിള്ളേരെ ചക്കരേന്നൊക്കെ വിളിക്കുന്നേ എന്നായിരുന്നു ഷെലിന്റെ ചോദ്യം. ഒരു പൊട്ടിച്ചിരിയോടെ ഭഗത് ഇതിനുപിന്നിലുള്ള കാരണവും വെളിപ്പെടുത്തി.

"എന്തിനാണ് എല്ലാവരെയും ചക്കരേന്ന് വിളിക്കുന്നതെന്ന് ഷെലിന്‍ ചോദിക്കാറുണ്ട്. പ്രത്യേകിച്ചും പെണ്‍പിള്ളേരെയെന്നാണ് ഇവളുടെ പരാതി. എന്റെ അമ്മയുടെ അച്ഛന്‍ കൊച്ചുമക്കളെയെയും എല്ലാരെയും മക്കളേ എന്നാണ് വിളിക്കുന്നത്. അത് ഭയങ്കര സ്നേഹത്തോടെയുള്ള വിളിയാണ്. ഞങ്ങളെ കാണാന്‍ വരുമ്പോൾ മടിയില്‍ മിഠായി പൊതിയും ഒരു ഭാഗത്ത് മുറുക്കാന്‍ പൊതിയും കാണും. അത് ഭയങ്കര മധുരമായ ഓര്‍മകളാണ്. അതൊക്കെ കണ്ടാണ് ഞാന്‍ വളര്‍ന്നത്. തുടര്‍ന്നാണ് എല്ലാവരെയും അതായത് കൂട്ടുകാരായാലും ബന്ധുക്കളായാലും ചക്കരെയെന്ന് വിളിക്കുന്നത്. ഫോണ്‍ ചെയ്യുമ്പോഴായാലും ചക്കരെ എന്തുണ്ട് എന്നാണ് സംസാരിച്ച്‌ തുടങ്ങാറ്. അത് ശീലമായി. പക്ഷെ, പെണ്‍കുട്ടികളെ ചക്കരെയെന്ന് വിളിക്കുന്നത് ഇവള്‍ക്കിഷ്ടമല്ല"-ഭഗത് കൂട്ടിച്ചേർത്തു .