ബോളിവുഡും കടന്ന് ഹോളിവുഡില്‍ എത്തി നില്‍ക്കുന്ന പ്രിയങ്ക ചോപ്രയുടെ ഓരോ വിശേഷങ്ങളും ആരാധകര്‍ ഏറെ ആവേശത്തോടെയാണ് സ്വീകരിക്കാറുള്ളത്. തന്റെ ജീവിതത്തിലെ പല കാര്യങ്ങളും പ്രിയങ്ക ചോപ്ര തുറന്നെഴുതിയിട്ടുണ്ട്. പല സിനിമകളില്‍ നിന്നും അവസാന നിമിഷം തന്നെ ഒഴിവാക്കിയതിന് കാരണം വെളിപ്പെടുത്തിയിരിക്കുകയാണ് പ്രിയങ്ക. തന്റെ ജീവിതാനുഭവങ്ങള്‍ പങ്കുവച്ച അണ്‍ഫിനിഷ്ഡ് എന്ന പുസ്തകത്തില്‍ പല വെളിപ്പെടുത്തലും പ്രിയങ്ക നടത്തുന്നുണ്ട്.

തന്റെ മൂക്കില്‍ നടത്തിയ സര്‍ജറിയെക്കുറിച്ചും പ്രിയങ്ക ഇതില്‍ പറയുന്നുണ്ട്. തന്റെ മുഖത്തിന്റെ ആകൃതി തന്നെ മാറിപ്പോയ സംഭവത്തെക്കുറിച്ച് പ്രിയങ്ക പുസ്തകത്തില്‍ പാറയുന്നുണ്ട്.
2001ലായിരുന്നു സംഭവം. ദിവസങ്ങളോളം നീണ്ടു നിന്നൊരു കോള്‍ഡ് ആയിരുന്നു തുടക്കം. ആദ്യം കരുതിയത് സൈനസ് ഇന്‍ഫെക്ഷന്‍ ആയിരിക്കുമെന്നാണ്. പിന്നീട് പരിശോധനയിലാണ് പ്രിയങ്കയുടെ നേസല്‍ കാവിറ്റിയില്‍ പോളിപ് കണ്ടെത്തുന്നതും സര്‍ജറിയ്ക്ക് വിധേയയാകുന്നതും. പക്ഷെ സര്‍ജറി പാളുകയായിരുന്നു. ഇതേകുറിച്ച് പ്രിയങ്ക പറയുന്നത് ഇങ്ങനെയാണ്...
''പോളിപ് ഷേവ് ചെയ്ത് മാറ്റുന്നതിനിടെ ഡോക്ടര്‍ അബദ്ധത്തില്‍ എന്റെ മൂക്കിന്റെ പാലവും ഷേവ് ചെയ്തു. അങ്ങനെ മൂക്കിന്റെ പാലം തകര്‍ന്നു. ബാന്‍ഡേജ് മാറ്റിയപ്പോഴാണ് മൂക്കിന് സംഭവിച്ച ഗുരുതര പ്രശ്നം കാണാന്‍ സാധിച്ചത്. ഞാനും അമ്മയും ഭയന്നു പോയി. എന്റെ മൂക്ക് ആകെ മാറിപ്പോയി. എന്റെ മുഖം തന്നെ മാറിപ്പോയി. ഞാന്‍ ഒരിക്കലും ഞാന്‍ അല്ലാതായി. ഓരോ തവണയും ഞാന്‍ കണ്ണാടിയില്‍ നോക്കുമ്പോള്‍ ഏതോ അപരിചിത തിരിച്ച് എന്നെ നോക്കുന്നതായാണ് എനിക്ക് തോന്നിയത്.

ഇതില്‍ നിന്നും എന്റെ ആത്മവിശ്വാസം തിരിച്ചുവരുമെന്ന് എനിക്ക് തോന്നുന്നില്ല. കുറച്ച് വര്‍ഷമെടുത്തു കണ്ണാടിയില്‍ നോക്കുമ്പോള്‍ അപരിചിതയെ കാണുന്നതിനോട് മാനസികമായി പൊരുത്തപ്പെടാന്‍. ഇപ്പോള്‍ കണ്ണാടി നോക്കുമ്പോള്‍ ഞെട്ടാറില്ല. ചെറുതായി മാറിപ്പോയ ഞാനുമായി ഞാന്‍ പൊരുത്തപ്പെട്ടു. ഇത് എന്റെ മുഖമാണ്. ഇത് എന്റെ ശരീരമാണ്.

കുറവുകളുണ്ടാകും. പക്ഷെ ഞാന്‍ ഞാനാണ്'' എന്നും പ്രിയങ്ക ചോപ്ര തന്റെ പുസ്തകത്തില്‍ പറയുന്നുണ്ട്. ഈ സംഭവത്തോടെ മാധ്യമങ്ങള്‍ പ്രിയങ്ക ചോപ്രയെ പ്ലാസ്റ്റിക് ചോപ്ര എന്ന് അധിക്ഷേപിച്ചിരുന്നു. പിന്നീട് പല വട്ടം സര്‍ജറികള്‍ നടത്തിയാണ് പ്രിയങ്ക തന്റെ മൂക്കിന്റെ പ്രശ്നം പരിഹരിച്ചത്. സര്‍ജറി പാളിയതോടെ തന്നെ പല സിനിമകളില്‍ നിന്നും അവസാന നിമിഷം ഒഴിവാക്കിയതിനെക്കുറിച്ച് മുമ്പൊരിക്കല്‍ പ്രിയങ്ക തന്നെ വെളിപ്പെടുത്തിയിരുന്നു.