മലയാളികളുടെ പ്രിയപ്പെട്ട നടന്‍ ബേസിലിനെ കണ്ട ഒരു കുഞ്ഞിന്റെ വീഡിയോയാണ് സോഷ്യല്‍ മീഡിയയില്‍ വൈറലാകുന്നത്. ഏറ്റവും ഇഷ്ടപ്പെട്ട സിനിമാ നടന്‍ ആരാണെന്ന് കുട്ടിയോട് അച്ഛന്‍ ചോദിക്കുന്ന വീഡിയോയാണ് വൈറലായത്. ഇസാന ജെബിന്‍ചാക്കോ എന്ന ഇന്‍സ്റ്റഗ്രാം പേജിലാണ് വീഡിയോ പങ്കുവച്ചിരിക്കുന്നത്.

മോഹന്‍ലാല്‍, മമ്മൂട്ടി, സുരേഷ് ഗോപി, ബേസില്‍ ജോസഫ് ഇവരില്‍ ആരെയാണ് ഏറ്റവും കൂടുതല്‍ ഇഷ്ടമെന്നാണ് ചോദിക്കുന്നത്. അപ്പോള്‍ കുട്ടി ബേസില്‍ ജോസഫ് ആരാണ് അങ്ങനെ ഒരു നടന്‍ ഇല്ലെന്ന് മറുപടി പറയുന്നു. തുടര്‍ന്ന് കുട്ടിയുടെ അച്ഛന്‍ ഗൂഗിളില്‍ നിന്ന് ബേസിലിന്റെ ചിത്രം എടുത്ത് കാണിക്കുമ്പോള്‍ ഇത് സിനിമാ നടന്‍ അല്ലെന്നും മീന്‍ വില്‍ക്കാന്‍ വരുന്ന ആളാണെന്നുമാണ് കുട്ടി പറയുന്നത്.

'ഇത് സിനിമ നടന്‍ അല്ല അച്ഛാ, വീട്ടില്‍ മീന്‍ കൊണ്ടുവരുന്ന ആളാണ്. ഞാന്‍ കണ്ടിട്ടുണ്ട്. ഇയാള്‍ സിനിമാ നടന്‍ അല്ല. ഉറപ്പായിട്ടും മീന്‍ വില്‍ക്കാന്‍ വരുന്ന ചേട്ടന്‍ ആണ്. സ്‌കൂട്ടറിന്റെ പിറകില്‍ പെട്ടി ഓക്കെ വച്ചാണ് വരുന്നത്. ഞാന്‍ കണ്ടിട്ടുണ്ട്' കുട്ടി പറഞ്ഞു. വീഡിയോ വൈറലായതിന് പിന്നാലെ ബേസിലും കമന്റുമായി രംഗത്തെത്തിയിട്ടുണ്ട്. 'എടി മോളെ നീ കേരളത്തിലോട്ട് വാ കാണിച്ചു തരാം. രണ്ടു കിലോ മത്തിയും കൊണ്ടുവരാം' എന്നായിരുന്നു നടന്റെ കമന്റ്.