നടിമാരായ ഉര്‍വശി,കല്പന, കലാരഞ്ജിനി എന്നിവരുടെ സഹോദരനും സിനിമ സീരിയല്‍ അഭിനേതാവുമായ കമല്‍ റോയ് അന്തരിച്ചു. ചെന്നൈയിലായിരുന്നു അന്ത്യം. സായൂജ്യം, അന്തപ്പുരം, കോളിളക്കം, മഞ്ഞ്, കിങ്ങിണി, യുവജനോത്സവം , കല്യാണസൗഗന്ധികം, വാചാലം, ശോഭനം, ദ് കിംഗ് മേക്കര്‍, ലീഡര്‍ തുടങ്ങിയ ചിത്രങ്ങളിലും നടി വിനയ പ്രസാദ് മുഖ്യവേഷമിട്ട 'ശാരദ' തുടങ്ങി ഒട്ടേറെ സീരിയലുകളിലും അഭിനയിച്ചിട്ടുണ്ട്. ഭാര്യയും ഒരു മകനുമുണ്ട്.

ചവറ വി പി നായരുടെയും വിജയലക്ഷ്മിയുടെയും മകനാണ്. അന്തരിച്ച നടന്‍ നന്ദു പ്രിന്‍സിന്റെ സഹോദരനാണ്. മോഹന്‍ലാലും ഉര്‍വശിയും വേഷമിട്ട യുവജനോത്സവം എന്ന സിനിമയില്‍ കമല്‍ റോയ് പാടി അഭിനയിച്ച ഇന്നുമെന്റെ കണ്ണുനീരില്‍... എന്ന ഗാനവും പ്രശസ്തമാണ്. 'കല്യാണസൗഗന്ധികം' സിനിമയിലെ വില്ലന്‍ വേഷവും ഏറെ ശ്രദ്ധേയമായിരുന്നു.

സംവിധായകന്‍ വിനയന്‍ കമല്‍ റോയിക്ക് അന്ത്യാഞ്ജലി അര്‍പ്പിച്ചിട്ടുണ്ട്. ഫേസ്ബുക്കില്‍ കുറിപ്പ് പങ്കുവച്ചായിരുന്നു അദ്ദേഹം അനുശോചനം രേഖപ്പെടുത്തിയത്. 'ആദരാഞ്ജലികള്‍. കല്യാണ സൗഗന്ധികം'എന്ന എന്റെ സിനിമയില്‍ ദിലീപിന്റെ വില്ലനായിട്ട് അഭിനയിച്ചിരുന്നു. നടി ഉര്‍വശിയുടെയും കല്‍പ്പനയുടെയും കലാരഞ്ജിനിയുടെയും സഹോദരനാണ് കമല്‍. സുകുമാരിച്ചേച്ചി ആയിരുന്നു അന്ന് കമലിനെക്കുറിച്ച് എന്നോടു പറഞ്ഞതെന്ന കാര്യം ഓര്‍ക്കുന്നു' വിനയന്‍ കുറിച്ചു.