കമ്മിറ്റ്‌മെന്റുകള്‍ തന്നെ നിയന്ത്രിക്കുമോ എന്ന ഭയം കാരണമാണ് താന്‍ ഒരു പ്രണയബന്ധത്തിന് മുതിരാത്തതെന്ന് നടിയും ഡബ്ബിങ്ങ് ആര്‍ട്ടിസ്റ്റുമായ ഭാഗ്യലക്ഷ്മി. അടിസ്ഥാനപരമായി താന്‍ ആഗ്രഹിച്ചത് സ്‌നേഹമാണെന്നും എന്നാല്‍ അത് തനിക്ക് എവിടെ നിന്നും ലഭിച്ചില്ലെന്നും ഭാഗ്യലക്ഷ്മി പറയുന്നു.

'അടിസ്ഥാനപരമായി ഞാനാഗ്രഹിച്ചത് സ്‌നേഹമാണ്. അതെനിക്ക് എവിടെ നിന്നും കിട്ടിയിട്ടില്ല. ഇനി കിട്ടില്ല എന്ന് മനസിലായത് കൊണ്ടാണ് ഇനിയൊരു പ്രണയം ഞാന്‍ ആഗ്രഹിക്കാത്തത്. എനിക്ക് രാവിലെ ഒരിടത്തേക്ക് പോകണമെങ്കില്‍ ഞാന്‍ അങ്ങ് പോകും. ചോദിക്കുന്നില്ല. അത് പക്ഷെ നമ്മളെ സ്‌നേഹിക്കുന്ന ആണിന് സഹിക്കാന്‍ പറ്റില്ല. അവരോട് ഒരു വാക്ക് പറയുകയെങ്കിലും വേണം. പക്ഷെ എനിക്കങ്ങനെയില്ല. അങ്ങനെ ആഗ്രഹിച്ച സമയത്ത് അങ്ങനെ അല്ലായിരുന്നു.' ഭാഗ്യലക്ഷ്മി പറയുന്നു.

'ഡബ്ബിംഗിന് പോയാല്‍ എത്ര ലേറ്റ് ആയാലും മുന്‍ഭര്‍ത്താവ് എന്നോടൊന്നും ചോദിക്കാറില്ല. എന്തുകാെണ്ട് വൈകുന്നു, രാത്രി ഡബ്ബിംഗിന് പോകരുത് എന്നൊന്നും പറഞ്ഞിട്ടില്ല. പക്ഷെ ഞാനൊരു ഫ്രണ്ടിനെ കാണാന്‍ പോകുമ്പോള്‍ പുള്ളി എന്നെ റെസ്ട്രിക്റ്റ് ചെയ്യുമായിരുന്നു.

എനിക്ക് ഷോപ്പിംഗിന് പോകാനുള്ള അനുവാദം ഇല്ലായിരുന്നു. പിന്നീട് അതെല്ലാം ഞാന്‍ ചെയ്ത് എന്നെ ആരും ഇനി ചോദ്യം ചെയ്യരുത് എന്ന നിലയിലേക്ക് ഞാന്‍ മാറി. കമ്മിറ്റ്‌മെന്റുകള്‍ എന്നെ നിയന്ത്രിക്കുമോ എന്ന പേടിയുണ്ട്. അതുകൊണ്ടാണ് താന്‍ ഒരു പ്രണയ ബന്ധത്തിന് തയ്യാറാകാത്തത്.' ഭാഗ്യലക്ഷ്മി കൂട്ടിച്ചേര്‍ത്തു.