'തല' എന്ന് വിളിക്കരുത്, ദയവുചെയ്ത് മാന്യമായി പെരുമാറൂ, ഇതൊരു തീയേറ്ററല്ല; ആരാധകരോട് ആവശ്യപ്പെട്ട് അജിത്
മോട്ടോര് സ്പോര്ട്സ് പരിപാടികള്ക്കിടയില് തന്നെ 'തല' എന്ന് വിളിക്കരുതെന്നും ബഹളമുണ്ടാക്കരുതെന്നും ആരാധകരോട് അഭ്യര്ഥിച്ച് അജിത്. അബുദാബിയിലെ യാസ് മറീന സര്ക്യൂട്ടിനിടെ ആണ് സംഭവം ഉണ്ടായത്. സംഭവത്തിന്റെ വീഡിയോ സോഷ്യല് മീഡിയയില് ചര്ച്ചയായി. വീഡിയോയില് തന്നെ 'തല' എന്ന് വിളിക്കരുതെന്നും പരിപാടിക്കിടയില് ബഹളമുണ്ടാക്കാതെ ശാന്തരായിരിക്കണമെന്നും അജിത് ആരാധകരോട് ആവശ്യപ്പെടുന്നത് കാണാം.
'ദയവുചെയ്ത് മാന്യമായി പെരുമാറൂ, ഇതൊരു തീയേറ്ററല്ല. പ്ലീസ്' അജിത് കുമാര് പറഞ്ഞു. മോട്ടോര് സ്പോര്ട്സ് പരിപാടികള്ക്കിടയില് തന്നെ 'തല' എന്ന് വിളിക്കരുതെന്നും ബഹളമുണ്ടാക്കരുതെന്നും അദ്ദേഹം ആരാധകരോട് അഭ്യര്ഥിച്ചു. മത്സരത്തില് ശ്രദ്ധ കേന്ദ്രീകരിക്കാനായി നിശബ്ദത പാലിക്കാന് അദ്ദേഹം ആരാധകരോട് ആവര്ത്തിച്ച് ആവശ്യപ്പെടുന്ന നിരവധി ചിത്രങ്ങളും ദൃശ്യങ്ങളും ഓണ്ലൈനില് ലഭ്യമാണ്. സ്വന്തം ടീമിന്റെ ഡ്രൈവറായും ടീം പ്രിന്സിപ്പലായും അദ്ദേഹം മത്സരത്തില് പങ്കെടുത്തിരുന്നു. റേസര് ജേഴ്സിയും ജീന്സും ധരിച്ചാണ് അദ്ദേഹം ആരാധകരോട് ശാന്തരാകാന് ആവശ്യപ്പെട്ടത്.
ഫെബ്രുവരി 7, 8 തീയതികളിലായി നടന്ന യാസ് സ്പീഡ് ഫെസ്റ്റിവലിനിടെയാണ് സംഭവം. ശിവകാര്ത്തികേയന്, വെങ്കട്ട് പ്രഭു തുടങ്ങിയ പ്രമുഖരും റേസ് കാണാന് എത്തിയിരുന്നു. മുന്പ് ആരാധനാലയങ്ങളിലും റേസിങ് ട്രാക്കുകളിലും അദ്ദേഹം ആരാധകരോട് ഇതേ ആവശ്യങ്ങള് ഉന്നയിച്ചിട്ടുണ്ട്.
https://www.facebook.com/Malayalivartha
