ചലച്ചിത്ര- നാടക നടിയും നൃത്താധ്യാപികയുമായിരുന്ന കലാലയം രാധ (79) അന്തരിച്ചു. വെള്ളി പകൽ 12.35ന് അമല ആശുപത്രിയിലായിരുന്നു അന്ത്യം സംഭവിച്ചത്. ഭർത്താവ്‌ അന്തരിച്ച ജോസ് പായമ്മലും നാടകനടനും സംവിധായകനുമായിരുന്നു. രണ്ടുപേരും നാടകരംഗത്ത്‌ ഒന്നിച്ച്‌ പ്രവർത്തിച്ചിരുന്നു. തൃശൂർ പൂരം പ്രദർശനത്തിൽ 50 വർഷം തുടർച്ചയായി ഇവർ രണ്ടായിരത്തോളം തൽസമയ നാടകം അവതരിപ്പിച്ചിട്ടുണ്ട്.

തുടര്‍ച്ചയായി നാലുതവണ സംഗീതനാടക അക്കാദമിയുടെ പ്രൊഫഷണല്‍ നാടകമത്സരത്തില്‍ മികച്ച നടിക്കുള്ള അവാര്‍ഡ് കലാലയം രാധയ്‌ക്ക്‌ ലഭിച്ചു.

സംഗീതനാടക അക്കാദമിയുടെ ഗുരുപൂജ പുരസ്ക്കാരവും ലഭിച്ചിട്ടുണ്ട്. അച്ചുവിന്റെ അമ്മ, സൂര്യദാനം, രാത്രികള്‍ നിനക്കുവേണ്ടി, ഇസബെല്ല, ജമ്നപ്യാരി, ചില്‍ഡ്രന്‍സ് പൊലീസ്, ഒരേ ഭൂമി ഒരേ രക്തം, അരഞ്ഞാണം, ഞാനൊന്ന് പറയട്ടേ, ഇസബെല്ല, മഗ് രീബ്, ലഡ്ഡു, ഭാരതപ്പുഴ തുടങ്ങിയ സിനിമകളിലും നിരവധി ടെലിഫിലുമുകളിലും അഭിനയിച്ചു.

തൃശൂർ വളർക്കാവിലാണ്‌ താമസം. മകൻ: ലോന ബ്രിന്നർ (ഡെപ്യൂട്ടി ഡയറക്ടർ ഓപ്പറേഷൻസ്, എംഎഎൽഎച്ച്‌ ആശുപത്രി അബുദാബി). മരുമകൾ: സുനിത ബ്രിന്നർ. സംസ്‌കാരം ശനി പകൽ മൂന്നിന്‌ നെല്ലിക്കുന്ന്‌ സെന്റ് സെബാസ്റ്റ്യൻ പള്ളി സെമിത്തേരിയിൽ നടക്കും.