മലയാളികള്‍ക്ക് ഏറെ പ്രിയപ്പെട്ട പാട്ടുകാരില്‍ ഒരാളാണ് ഗായിക റിമി ടോമി. എപ്പോഴും ഒരു പുഞ്ചിരിയോടെ നടക്കുന്ന താരം ആരോടും എന്തും തുറന്ന് ചോദിക്കുന്ന ഒരാള്‍ കൂടിയാണ്. തന്റെ എല്ലാ വിശേഷങ്ങളും സോഷ്യല്‍ മീഡിയയിലൂടെ റിമി പ്ങ്കുവയ്ക്കാറുമുണ്ട്. ഇപ്പോഴിതാ

ജിമ്മില്‍ നിന്നുള്ള തന്റെ ചിത്രങ്ങള്‍ പങ്കുവച്ചിരിക്കുകയാണ് ഗായിക റിമി ടോമി. ബൈസെപ് മസിലുകള്‍ എടുത്തു കാണിച്ചുകൊണ്ടാണ് റിമിയുടെ ചിത്രങ്ങള്‍. പ്രചോദനാത്മകമായ കുറിപ്പിനൊപ്പമാണ് താരം ചിത്രങ്ങള്‍ പങ്കുവച്ചത്. പരിശ്രമങ്ങളെ നമ്മളിലേക്ക് പ്രതിഫലിപ്പിക്കുന്ന മാജിക് ജിമ്മിനുണ്ടെന്ന് റിമി കുറിച്ചു. ഭൂരിഭാഗം ആളുകള്‍ക്കും ഈ വളര്‍ച്ച അനുഭവിച്ചറിയാന്‍ സാധിച്ചിട്ടില്ലെന്നും റിമി പറഞ്ഞു.

റിമി ടോമി പങ്കുവച്ച കുറിപ്പിന്റെ പൂര്‍ണരൂപം:

'ചില ദിവസങ്ങളില്‍ ശരീരം ഭാരമുള്ളതായി തോന്നും. ശരീരത്തിനേറ്റ പരിക്കുകള്‍ നിങ്ങളെ പരിധികളെക്കുറിച്ച് ഓര്‍മിപ്പിക്കും. ചില ദിവസങ്ങളില്‍ പ്രചോദനം നിശബ്ദമാകും. എന്നാല്‍ നിങ്ങള്‍ കണ്ണാടിയില്‍ നോക്കുന്ന നേരം, നിങ്ങളവിടെ കാണുന്നത് കേവലം മസിലുകളല്ല, മറിച്ച് നിങ്ങളുടെ അച്ചടക്കമാണ്, നിങ്ങളുടെ സ്ഥിരതയാണ്. തോറ്റുകൊടുക്കാന്‍ തയാറല്ലാത്ത നിങ്ങളുടെ കരുത്തുറ്റ പതിപ്പിനെയാണ് നിങ്ങളവിടെ കാണുന്നത്.

ജിമ്മില്‍ ആ 'മാജിക്' ഉണ്ട്, കാരണം അവിടെ നിങ്ങളുടെ പരിശ്രമത്തെ നിങ്ങളിലേക്ക് തന്നെ പ്രതിഫലിപ്പിക്കും. വേദന സഹിച്ചുകൊണ്ട് നിങ്ങള്‍ ചെയ്യുന്ന ഓരോ വ്യായാമവും പരിക്കിനു ശേഷമുള്ള ഓരോ തിരിച്ചുവരവും ഇതിന്റെ ഭാഗമാണ്. പോകാന്‍ ഒട്ടും താല്പര്യമില്ലാത്ത ദിവസങ്ങളില്‍പോലും മടി മാറ്റിവച്ച് നിങ്ങള്‍ ജിമ്മിലെത്തുന്നുണ്ടല്ലോ, അതാണ് യഥാര്‍ത്ഥ വിജയം. ഈ വളര്‍ച്ച അനുഭവിക്കാന്‍ ഭൂരിഭാഗം ആളുകള്‍ക്കും സാധിക്കാറില്ല.'

ഇതിനു മുന്‍പും ഫിറ്റ്‌നസ്സുമായി ബന്ധപ്പെട്ട ധാരാളം വിഡിയോകളും ചിത്രങ്ങളും റിമി തന്റെ ഇന്‍സ്റ്റഗ്രാം അക്കൗണ്ടിലൂടെ പങ്കുവച്ചിട്ടുണ്ട്. അവയൊക്കെ വലിയ രീതിയില്‍ സ്വീകരിക്കപ്പെടുകയും ചെയ്തിട്ടുണ്ട്. റിമിയുടെ ട്രാന്‍സ്ഫര്‍മേഷന്‍ ശരിക്കും പ്രചോദനം നല്‍കുന്നതാണെന്നാണ് ആരാധകര്‍ അഭിപ്രായപ്പെടുന്നത്.

മുന്‍പ്, റിമി സ്ഥിരമായി പോകുന്ന 'ജിമ്മി'ന് എഴുതിയ കത്ത് വൈറലായിരുന്നു. ഏറ്റവും തിരക്കേറിയ ദിവസങ്ങളില്‍ പോലും ജിമ്മില്‍ പോകാറുണ്ടെന്നാണ് റിമി കുറിച്ചത്. ശരീരത്തിന് അപ്പുറത്ത് മനസ്സിനെ ഉണര്‍ത്തുന്ന ഇടമാണ് ജിം എന്നും റിമി ടോമി കത്തില്‍ പറഞ്ഞിരുന്നു. എവിടെയാണെങ്കിലും, എങ്ങനെയാണെങ്കിലും, ഏത് അവസ്ഥയിലാണെങ്കിലും വ്യായാമം ചെയ്യാനുള്ള വഴി എന്തായാലും കണ്ടെത്തുമെന്നും റിമി പറഞ്ഞിരുന്നു.