തെന്നിന്ത്യയിലെ സൂപ്പര്‍താരങ്ങളായ വിജയ് ദേവരകൊണ്ടയും രശ്മിക മന്ദാനയും ഇന്നലെ വിവാഹിതരായി. രാജസ്ഥാനിലെ ഉദയ്പൂരില്‍ പഞ്ചനക്ഷത്ര റിസോര്‍ട്ടില്‍ നടന്ന പാരമ്പര്യവും ആഡംബരവും നിറഞ്ഞ ചടങ്ങിലായിരുന്നു. ഇരുവരുടെയും വിവാഹം. രാവിലെയും വൈകിട്ടുമായി രണ്ട് ചടങ്ങുകള്‍ നടന്നു. വിവാഹത്തിന് കുടുംബാംഗങ്ങള്‍ക്കും അടുത്ത സുഹൃത്തുക്കള്‍ക്കും മാത്രമായിരുന്നു ക്ഷണം. നൂറിനകത്ത് അതിഥികള്‍ മാത്രമായിരുന്നു വിവാഹത്തിനുണ്ടായിരുന്നത്. വിവാഹ ചിത്രങ്ങള്‍ പുറത്താകാതിരിക്കാന്‍ ചടങ്ങില്‍ മൊബൈല്‍ ഫോണുകള്‍ക്കും ക്യാമറകള്‍ക്കും കര്‍ശന വിലക്കുണ്ടായിരുന്നു. താരങ്ങള്‍ തന്നെയാണ് പിന്നീട് വിവാഹ ചിത്രങ്ങള്‍ പുറത്തുവിട്ടത്.

വിവാഹത്തിന് ക്ഷണിക്കപ്പെട്ട ചുരുക്കം അതിഥികളില്‍ ഒരു മലയാളി സാന്നിദ്ധ്യവും ഉണ്ടായിരുന്നു. മലയാളത്തിന്റെ പ്രിയതാരം കല്യാണി പ്രിയദര്‍ശനായിരുന്നു അത്. രശ്മികയുടെ ഏറ്റവും അടുത്ത സുഹൃത്താണ് കല്യാണി. വിവാഹം നേരില്‍ക്കണ്ടതിന്റെ സന്തോഷം കല്യാണി സോഷ്യല്‍ മീഡിയയില്‍ കുറിച്ചു. രശ്മിക പങ്കുവച്ച ചിത്രങ്ങള്‍ ഇന്‍സ്റ്റഗ്രാം സ്‌റ്റോറിയില്‍ ചേര്‍ത്താണ് കല്യാണിയുടെ ചെറുകുറിപ്പ്.

'വിസ്മയിപ്പിക്കുന്ന പശ്ചാത്തലത്തില്‍. ഏറ്റവും കരുണയുള്ള ഒരു പെണ്‍കുട്ടി, അവളുടെ ആത്മസുഹൃത്തിനെ തീര്‍ത്തും സ്വപ്നതുല്യമായ പശ്ചാത്തലത്തില്‍ വിവാഹം ചെയ്യുന്നതിന് ഞാന്‍ ഇന്ന് സാക്ഷിയായി. പുറംതിരിഞ്ഞ് അവന്‍ അവള്‍ക്കായി കാത്തിരിക്കവെ, അവള്‍ അവന്റെ അടുത്തേക്ക് നടന്നു വരുന്ന ഓരോ ചുവടിന്റെയും ഭാരം നിങ്ങള്‍ക്ക് അനുഭവപ്പെടും. ആ മന്ദഗതിയിലുള്ള നടത്തവും നിറഞ്ഞ കണ്ണുകളും പറയേണ്ടതെല്ലാം പറയുന്നു,' കല്യാണി കുറിച്ചു.