നടന്‍ വിജയ്‌യും ഭാര്യ സംഗീത സ്വര്‍ണലിംഗവുമായുള്ള വിവാഹമോചനക്കേസിനിടെ പൊതുവേദിയില്‍ നടി തൃഷയ്‌ക്കൊപ്പമെത്തി വിജയ്. നിര്‍മാതാവ് കല്‍പ്പാത്തി എസ്. സുരേഷിന്റെ മകന്റെ വിവാഹ സല്‍ക്കാരത്തില്‍ പങ്കെടുക്കാനാണ് വിജയ്‌യും തൃഷയും ഒന്നിച്ചെത്തിയത്. ഇരുവരും ഒരുകാറില്‍, ഒരേ തരത്തിലുള്ള വസ്ത്രങ്ങള്‍ ധരിച്ചാണ് എത്തിയത്. വധൂവരന്മാര്‍ക്ക് ആശംസകള്‍ നേര്‍ന്ന് കുടുംബാംഗങ്ങള്‍ക്കൊപ്പം ഏറെ നേരം സമയം ചെലവഴിച്ചതിനു ശേഷമാണ് ഇരുവരും വേദി വിട്ടത്.

തൃഷയും വിജയ്‌യും ഒന്നിച്ചെത്തിയ ചിത്രങ്ങളും വിഡിയോകളും സമൂഹ മാധ്യമങ്ങളില്‍ വ്യാപകമായി പ്രചരിക്കുകയാണ്. ഊഹാപോഹങ്ങളും ഇരുവരുമായി ബന്ധപ്പെട്ട വിവാദങ്ങളുമെല്ലാം ശരിയാണെന്ന തരത്തിലാണ് കമന്റുകള്‍. ഇരുവര്‍ക്കുമെതിരെ കടുത്ത വിര്‍മശനവും ഉയരുന്നുണ്ട്.
എന്നാല്‍ ഇരുവരും നല്ല സുഹൃത്തുക്കളാണെന്നും ഇങ്ങനെയൊരു ചടങ്ങില്‍ ഒരുമിച്ചെത്തിയതില്‍ എന്താണ് തെറ്റെന്ന് ചോദിക്കുന്നവരുമുണ്ട്. നേരത്തെ വിജയ്‌യുടെ ദാമ്പത്യം തകരാന്‍ കാരണം തൃഷയാണെന്ന് ആരോപിച്ച് നടന്റെ ആരാധകര്‍ തൃഷയ്ക്കുനേരെ സൈബര്‍ ആക്രമണം നടത്തിയിരുന്നു.

അതേസമയം ചെങ്കല്‍പേട്ട് കുടുംബ കോടതിയില്‍ സംഗീത ഫയല്‍ ചെയ്ത വിവാഹമോചന ഹര്‍ജിയില്‍ ഏപ്രില്‍ 20ന് നേരിട്ട് ഹാജരാകാന്‍ വിജയ്‌യോട് കോടതി നിര്‍ദേശിച്ചിട്ടുണ്ട്.ഗുരുതരമായ ആരോപണങ്ങളാണ് വിജയ്‌യ്‌ക്കെതിരെ സംഗീത ഹര്‍ജിയില്‍ ഉന്നയിച്ചിരിക്കുന്നത്. 2021 മുതല്‍ തങ്ങള്‍ അകന്നു കഴിയുകയാണെന്നും ഒരു പ്രമുഖ നടിയുമായുള്ള വിജയ്‌യുടെ ബന്ധമാണ് ഇതിന് കാരണമെന്നും ഹര്‍ജിയില്‍ സംഗീത ആരോപിച്ചിട്ടുണ്ട്. ഈ ബന്ധം തിരിച്ചറിഞ്ഞ സംഗീതയോട് ബന്ധം അവസാനിപ്പിക്കാമെന്നു വിജയ് ഉറപ്പു നല്‍കിയെന്നും എന്നാല്‍ വീണ്ടും അത് തുടരുകയായിരുന്നുവെന്നും ആരോപിക്കുന്നു.1999 ഓഗസ്റ്റ് 25നാണ് വിജയ്‌യും സംഗീതയും വിവാഹിതരായത്. മകന്‍ ജേസണ്‍ സഞ്ജയ്, മകള്‍ ദിവ്യ സാഷ എന്നിവര്‍ നിലവില്‍ അമ്മയ്‌ക്കൊപ്പമാണ് നില്‍ക്കുന്നതെന്നാണ് സൂചനകള്‍.