നടനും തമിഴക വെട്രി കഴകം അദ്ധ്യക്ഷനുമായ വിജയ്‌യുടെ ദാമ്പത്യത്തില്‍ വില്ലത്തി തൃഷയാണെന്ന് ആരോപിച്ച് നടിക്കെതിരെ വലിയ രീതിയില്‍ സൈബര്‍ ആക്രമണം നടക്കുന്നുണ്ട്. അടുത്തിടെ ഇരുവരും വിവാഹ റിസപ്ഷനില്‍ ഒരുമിച്ച് പങ്കെടുത്തതും വിവാദമായിരുന്നു. ഇപ്പോഴിതാ നടന്‍ പാര്‍ഥിപന്‍ തൃഷയെക്കുറിച്ച് നടത്തിയ പരാമര്‍ശമാണ് സോഷ്യല്‍ മീഡിയയില്‍ ചര്‍ച്ചയാകുന്നത്.

ഗലാട്ട അവാര്‍ഡ്‌സ് 2026 വേദിയില്‍ സംസാരിക്കവെ അവതാരകര്‍ ഓരോ താരങ്ങളെക്കുറിച്ചും അവരുടെ കഥാപാത്രങ്ങളെക്കുറിച്ചും പാര്‍ഥിപനോട് ചോദിക്കുന്നു. അതിനിടെ പൊന്നിയിന്‍ സെല്‍വനിലെ തൃഷയുടെ കഥാപാത്രമായ കുന്ദവൈയെക്കുറിച്ചുള്ള ചോദ്യം വന്നത്. ഒപ്പം പിന്നിലെ സ്‌ക്രീനില്‍ തൃഷയുടെ ചിത്രവും തെളിഞ്ഞു. ഇതിന് പാര്‍ഥിപന്‍ നല്‍കിയ മറുപടിയാണ് വിവാദമായത്.

'കുന്ദവൈയോട് വീട്ടില്‍ ഇരിക്കാന്‍ ആവശ്യപ്പെടുന്നതായിരിക്കും നല്ലത്. അവര്‍ വീട്ടില്‍ നിന്ന് പുറത്തിറങ്ങിയില്ലെങ്കില്‍ നല്ലത്. വീടിന് പുറത്തിറങ്ങുന്നത് ഒരുപാട് പ്രശ്‌നങ്ങള്‍ സൃഷ്ടിക്കുന്നുണ്ട്' എന്നാണ് നടന്‍ പറഞ്ഞത്. ഇതിന്റെ വീഡിയോ സോഷ്യല്‍ മീഡിയയില്‍ വൈറലായതോടെ നിരവധിപേര്‍ പാര്‍ഥിപനെ വിമര്‍ശിച്ചും രംഗത്തെത്തുന്നുണ്ട്. ചിലര്‍ തൃഷയെ പരിഹസിച്ചും രംഗത്തെത്തുന്നുണ്ട്. വിജയ്‌ക്കൊപ്പം തൃഷ അടുത്തിടെ വിവാഹ റിസപ്ഷനില്‍ പങ്കെടുത്തതിനെക്കുറിച്ചാണ് പാര്‍ഥിപന്‍ സൂചിപ്പിച്ചതെന്നാണ് വിമര്‍ശകര്‍ പറയുന്നത്.

നേരത്തെ പരസ്പര സമ്മതത്തോടെയുള്ള വിവാഹമോചനത്തിന് സംഗീത ആഗ്രഹിച്ചെങ്കിലും വിജയ് ആദ്യം അതിന് തയ്യാറായില്ല. തന്റെ രാഷ്ട്രീയ ഭാവി തകരുമെന്ന് ഭയന്നാണ് വിജയ് വിവാഹബന്ധം വേര്‍പെടുത്താന്‍ വിസമ്മതിച്ചതെന്നാണ് വിവരം. പിന്നാലെയാണ് സംഗീത കോടതിയെ സമീപിച്ചത്. നിലവില്‍ സംഗീതയ്ക്കും മക്കളായ ജെയ്‌സണ്‍ സഞ്ജയ്, ദിവ്യ സാഷ എന്നിവര്‍ക്കുമായി വിജയ് 250 കോടി രൂപ നഷ്ടപരിഹാരത്തുകയായി വാഗ്ദാനം ചെയ്തതായാണ് റിപ്പോര്‍ട്ട്. ഈ തുക എപ്രകാരമാണ് വിഭജിച്ച് നല്‍കുകയെന്ന് വ്യക്തമല്ല.