സിനിമയില്‍ നിന്നെത്തുന്നവര്‍ക്ക് മികച്ച ഭരണം നല്‍കാന്‍ കഴിയില്ലെന്ന് പറയുന്നവര്‍ക്ക് അഞ്ച് വര്‍ഷത്തിനുള്ളില്‍ മനസിലാകുമെന്ന് നടി റോജ
സിനിമയില്‍ നിന്നെത്തുന്നവര്‍ക്ക് മികച്ച ഭരണം നല്‍കാന്‍ കഴിയില്ലെന്ന് പറയുന്നവരോട് യോജിക്കാനാകില്ലെന്ന് നടി റോജ. എം.ജി.ആര്‍, ജയലളിത, കരുണാനിധി തുടങ്ങിയവര്‍ സിനിമയില്‍ നിന്ന് രാഷ്ട്രീയത്തിലെത്തി മികച്ച ഭരണാധികാരികളായി മാറിയവരാണെന്നും റോജ ചൂണ്ടിക്കാട്ടി. നടന്‍ വിജയ്‌യുടെ രാഷ്ട്രീയ പ്രവേശനത്തെക്കുറിച്ചും തമിഴ്‌നാട്ടിലെ പുതിയ രാഷ്ട്രീയ സാഹചര്യത്തെക്കുറിച്ചും സംസാരിക്കുകയായിരുന്നു റോജ.
വിജയ്‌യോട് ജനങ്ങള്‍ക്കുള്ള സ്വീകാര്യതയ്ക്ക് മുന്‍കാലത്ത് എം.ജി.ആറിനോടും ജയലളിതയോടും ഉണ്ടായിരുന്ന ജനപിന്തുണയുമായി സാമ്യമുണ്ടെന്നും അവര്‍ അഭിപ്രായപ്പെട്ടു. സിനിമ എക്‌സ്പ്രസ് എന്ന യൂട്യൂബ് ചാനലിന് നല്‍കിയ അഭിമുഖത്തിലായിരുന്നു റോജയുടെ പരാമര്‍ശങ്ങള്‍.
ജനങ്ങളുടെ മനസറിഞ്ഞ് അവരുടെ ആവശ്യങ്ങള്‍ മനസിലാക്കുകയും അതിനനുസരിച്ച് പ്രവര്‍ത്തിക്കുകയും ചെയ്യുന്നവരാണ് മികച്ച ഭരണാധികാരികളെന്നാണ് റോജയുടെ നിലപാട്. എം.ജി.ആറും ജയലളിതയും അടക്കമുള്ള നേതാക്കള്‍ അത് തെളിയിച്ചിട്ടുണ്ടെന്നും അവര്‍ പറഞ്ഞു.
തെലുങ്ക് രാഷ്ട്രീയത്തിലെ എന്‍.ടി. രാമറാവുവിനെയും റോജ ഉദാഹരണമായി ചൂണ്ടിക്കാട്ടി. ജനങ്ങള്‍ക്കിടയിലേക്ക് ഇറങ്ങിച്ചെന്ന് അവരുടെ ആവശ്യങ്ങള്‍ മനസിലാക്കി അധികാരത്തിലെത്തിയതിന് പിന്നാലെ അവ നടപ്പാക്കാന്‍ ശ്രമിച്ചതാണ് അദ്ദേഹത്തിന് മികച്ച ഭരണാധികാരി എന്ന പേര് നേടിക്കൊടുത്തതെന്നും റോജ പറഞ്ഞു.
സിനിമയിലെ താരപദവിയും ആരാധക പിന്തുണയും ഉപേക്ഷിച്ച് രാഷ്ട്രീയത്തിലേക്ക് ഇറങ്ങുന്നത് ജനങ്ങളോടുള്ള വിശ്വാസത്തിന്റെ ഭാഗമായാണ് മുന്‍കാല താരരാഷ്ട്രീയക്കാര്‍ ചെയ്തതെന്നും അവര്‍ പറഞ്ഞു. എം.ജി.ആറിന്റെയും ജയലളിതയുടെയും എന്‍.ടി.ആറിന്റെയും രാഷ്ട്രീയ യാത്ര താന്‍ നേരിട്ട് കണ്ടിട്ടുണ്ടെന്നും റോജ വ്യക്തമാക്കി.
അതേസമയം, വിജയ്ക്ക് തന്റെ ഭരണശേഷി തെളിയിക്കാനുള്ള സമയമാണിതെന്നും റോജ പറഞ്ഞു. നേരിട്ട് പാര്‍ട്ടി രൂപീകരിച്ച് മുഖ്യമന്ത്രി പദത്തിലെത്തിയതിനാല്‍ ഭരണസംവിധാനവും രാഷ്ട്രീയ പ്രവര്‍ത്തനവും മനസിലാക്കാന്‍ അദ്ദേഹത്തിന് കുറച്ച് സമയം വേണ്ടിവരുമെന്നും അവര്‍ അഭിപ്രായപ്പെട്ടു. അഞ്ച് വര്‍ഷം പൂര്‍ത്തിയാകുമ്പോഴേ വിജയ് സര്‍ക്കാരിന്റെ കഴിവ് ജനങ്ങള്‍ക്ക് മനസിലാക്കാന്‍ സാധിക്കുകയുള്ളൂവെന്നും റോജ പറയുന്നു.
വിജയ്‌യുടെ മുന്‍ഗാമികള്‍ക്ക് രാഷ്ട്രീയത്തിലും ഭരണത്തിലും ദീര്‍ഘകാല പരിചയമുണ്ടായിരുന്നുവെന്നതാണ് പ്രധാന വ്യത്യാസമെന്ന് റോജ ചൂണ്ടിക്കാട്ടി. വിജയ്ക്ക് ആ അനുഭവം നേടാന്‍ സമയം ആവശ്യമാണെന്നും അവര്‍ പറഞ്ഞു. പരിചയസമ്പന്നരായ വിരമിച്ച ഐ.എ.എസ് ഉദ്യോഗസ്ഥരുടെ നിര്‍ദേശങ്ങള്‍ പ്രയോജനപ്പെടുത്തി ഭരണകാര്യങ്ങള്‍ മനസിലാക്കി മുന്നോട്ടുപോയാല്‍ അദ്ദേഹത്തിനും മികച്ച രീതിയില്‍ പ്രവര്‍ത്തിക്കാനാകുമെന്നാണ് റോജയുടെ വിലയിരുത്തല്‍.
https://www.facebook.com/Malayalivartha
