മലയാളികള്‍ക്ക് പ്രിയപ്പെട്ട നായികയാണ് മമിത ബൈജു. ഇപ്പോള്‍ വളരെ തിരക്കേറിയ യുവനായികമാരില്‍ ഒരാള്‍ കൂടിയാണ് മമിത. എന്നാല്‍ താരത്തിന്റെ കരിയറിലെ നിര്‍ണായകമായൊരു അവസരം ഒരിക്കല്‍ നായകനും നിര്‍മാതാവും ചേര്‍ന്ന് വേണ്ടെന്നുവെച്ചിരുന്നുവെന്ന് വെളിപ്പെടുത്തിയിരിക്കുകയാണ് സംവിധായകന്‍ കമല്‍. അന്ന് മമിതയെ വേണ്ടെന്ന് പറഞ്ഞ നിര്‍മാതാവിന് ഇന്ന് ആ തീരുമാനം ഓര്‍ത്ത് ഖേദം തോന്നുന്നുണ്ടാകാമെന്നും കമല്‍ കൂട്ടിച്ചേര്‍ത്തു. മമിതയെ നായികയാക്കി സിനിമ ചെയ്യാന്‍ താന്‍ ആഗ്രഹിച്ചിരുന്നെങ്കിലും പുതുമുഖ നായിക വേണ്ടെന്ന നിലപാടില്‍ ഇരുവരും ഉറച്ചുനിന്നതോടെ ആ ചിത്രം നടക്കാതെ പോവുകയായിരുന്നു. മമിതയുടെ പ്രകടനം ഏറെ ഇഷ്ടപ്പെട്ടത് 'ഖോ ഖോ' എന്ന ചിത്രത്തിലൂടെയാണെന്ന് കമല്‍ പറയുന്നു.

ആ സിനിമ കണ്ടതോടെ തന്റെ പുതിയ ചിത്രത്തില്‍ മമിതയെ നായികയാക്കാന്‍ തീരുമാനിച്ചു. എന്നാല്‍ അന്ന് താരത്തിന് വലിയ നായികാപദവി ഉണ്ടായിരുന്നില്ലെന്ന കാരണത്താല്‍ നായകനും നിര്‍മാതാവും എതിര്‍പ്പ് പ്രകടിപ്പിച്ചു. ഭാവിയില്‍ ഈ കുട്ടി വലിയ നായികയായി മാറുമെന്ന് താന്‍ അന്നുതന്നെ പറഞ്ഞിരുന്നുവെന്നും കമല്‍ വെളിപ്പെടുത്തി. പിന്നീട് 'സൂപ്പര്‍ ശരണ്യ' കണ്ടതോടെ മമിതയെ തന്നെ നായികയാക്കണമെന്ന തീരുമാനത്തില്‍ കമല്‍ ഉറച്ചുനിന്നു. നിര്‍മാതാവിന്റെ സമ്മതത്തോടെ മമിതയെയും അമ്മയെയും ബന്ധപ്പെട്ട് കഥാപാത്രത്തെക്കുറിച്ച് വിശദീകരിച്ചു. നെഗറ്റീവ് ഷേഡുള്ള കഥാപാത്രമായിരുന്നിട്ടും മമിതയ്ക്കും അമ്മയ്ക്കും അത് ഏറെ ഇഷ്ടമായി. കഥാപാത്രത്തെക്കുറിച്ച് കേട്ടപ്പോള്‍ മമിത പ്രകടിപ്പിച്ച താല്‍പര്യവും പ്രതികരണവും ഇന്നും ഓര്‍മയിലുണ്ടെന്ന് കമല്‍ പറഞ്ഞു.

എന്നാല്‍ വീണ്ടും ചര്‍ച്ചകള്‍ നടന്നതോടെ വലിയ നായിക വേണമെന്ന നിലപാടില്‍ നായകനും നിര്‍മാതാവും ഉറച്ചുനില്‍ക്കുകയും മമിതയെ ഒഴിവാക്കുകയുമായിരുന്നു. ഈ സംഭവം കഴിഞ്ഞ് നാലുമാസത്തിനുള്ളില്‍ 'പ്രേമലു' റിലീസ് ചെയ്ത് വന്‍വിജയം നേടിയതോടെ മമിതയുടെ താരമൂല്യം ഉയര്‍ന്നു.