അരനൂറ്റാണ്ട് മുമ്പ് ലാ കോളേജില്‍ തനിക്കൊപ്പം പഠിച്ചവരെ കാണാന്‍ മലയാളത്തിന്റെ സൂപ്പര്‍താരം മമ്മൂട്ടി എത്തി. എറണാകുളം ലാ കോളേജിലെ 1973-76 ബാച്ചിന്റെ സംഗമത്തിലാണ് അപ്രതീക്ഷിതമായി അദ്ദേഹമെത്തിയത്. രാമവര്‍മ്മ ക്ലബ് ഹാളില്‍ ഞായറാഴ്ചയായിരുന്നു ബാച്ചിന്റെ അമ്പതാം വാര്‍ഷിക സംഗമം. മുന്‍കൂട്ടി അറിയിക്കാതെയാണ് ഭാര്യ സുല്‍ഫത്തിനൊപ്പം മമ്മൂട്ടി വന്നത്.

കൂട്ടുകാരുമായി സൗഹൃദം പുതുക്കാനും ഫോട്ടോയ്ക്ക് പോസ് ചെയ്യാനും അദ്ദേഹം സമയം കണ്ടെത്തി. കോളേജ് പഠനകാലം ഓര്‍മ്മിച്ച് സംസാരിക്കുകയും ചെയ്തു. സ്വകാര്യ പരിപാടിയുടെ ദൃശ്യങ്ങള്‍ സുഹൃത്തുക്കള്‍ സമൂഹമാദ്ധ്യമങ്ങളില്‍ പുറത്തുവിട്ടപ്പോഴാണ് പലരും അറിഞ്ഞത്. വീഡിയോദൃശ്യം പലരും പങ്കിട്ടതോടെ വൈറലുമായി.എല്‍എല്‍ബി ബിരുദം നേടി രണ്ടുവര്‍ഷം അഭിഭാഷകനായി പ്രാക്ടീസ് ചെയ്ത ശേഷമാണ് മമ്മൂട്ടി സിനിമയിലേക്കെത്തിയത്.