മലയാള ചലച്ചിത്രപിന്നണിഗാന ലോകത്ത് നിന്നും രാധികാ തിലക് വിട പറഞ്ഞിട്ട് ഇന്ന് ഒരു വര്‍ഷം തികയുന്നു. പ്രിയ ഗായിക വിട പറഞ്ഞെങ്കിലും അവരുടെ മധുര സ്വരത്തിലൂടെ മലയാളികള്‍ അന്നും ഇന്നും എന്നും രാധികാ തിലകിനെ നെഞ്ചിലേറ്റുന്നു.

പറവൂര്‍ ചേന്ദമംഗംലം പി.ജെ. തിലകന്‍ വര്‍മ്മയുടേയും ഗിരിജാദേവിയുടെയും മകളായി 1970ല്‍ എറണാകുളത്ത് ജനിച്ചു. എറണാകുളം ചിന്മയ വിദ്യാലയം, സെന്റ് തെരേസാസ് കോളേജ് എന്നിവിടങ്ങളിലായിരുന്നു വിദ്യാഭ്യാസം. ദൂരദര്‍ശനിലൂടെ മലയാളികള്‍ക്ക് സുപരിചതയായ രാധിക ലളിത ഗാനങ്ങളിലൂടെയാണ് പ്രശസ്തയായത്. 1989ല്‍ ഇറങ്ങിയ സംഘഗാനം ആയിരുന്നു ആദ്യ ചിത്രം. അതിലെ 'പുല്‍ക്കൊടിത്തുമ്പിലും' എന്ന പാട്ടിലൂടെയായിരുന്നു സിനിമയില്‍ അരങ്ങേറ്റം കുറിച്ചത്. എഴുപതുകളില്‍ സംഗീത രംഗത്തത്തെിയ രാധിക എഴുപതോളം സിനിമകളില്‍ പാടിയിട്ടുണ്ട്. 200 ലധികം ലളിതഗാനങ്ങളൂം ഭക്തിഗാനങ്ങളും പാടിയിട്ടുണ്ട്.

അര്‍ബുദബാധ മൂലം 2015 സെപ്റ്റംബര്‍ 20 നാണ് രാധിക അന്തരിച്ചത്. 45 വയസ്സേ അവര്‍ക്കുണ്ടായിരുന്നുള്ളൂ. ഓള്‍ ഇന്ത്യ റേഡിയോയിലും ദൂരദര്‍ശനിലും ലളിതഗാനങ്ങള്‍ പാടിയിരുന്നു. ദൂരദര്‍ശനുള്‍പ്പെടെ വിവിധ ചാനലുകളില്‍ അവതാരകയുമായിരുന്നു. യേശുദാസ്, എം.ജി. ശ്രീകുമാര്‍, എസ്. ജാനകി എന്നിവരുടെ സ്‌റ്റേജ് ഷോകളിലും ഗാനങ്ങള്‍ പാടിയിരുന്നു. ഏഷ്യാനെറ്റ് ടി.വിയുടെ സംഗീത പരിപാടിയായ സരിഗമയുടെ അവതാരികയുമായിരുന്നു.

ഒറ്റയാള്‍ പട്ടാളം എന്ന ചിത്രത്തിലെ 'മായാമഞ്ചലിലേറി' എന്ന ഗാനത്തിലൂടെയാണ് കൂടുതല്‍ ജനപ്രിയമാകുന്നത്.

പ്രശസ്ത ഗാനങ്ങളും സിനിമയും:

പുല്‍ക്കൊടിത്തുമ്പിലും സംഘഗാനം (ഇതാണ് ആദ്യ സിനിമഗാനം),പച്ചിലത്തോണി തുഴഞ്ഞ് പച്ചിലതോണി,മായാമഞ്ചലില്‍ ഒറ്റയാള്‍ പട്ടാളം, ദേവസംഗീതം ഗുരു, എന്റെ ഉള്ളില്‍ ഉടുക്കുംകൊട്ടി ദീപസ്തംഭം മഹാശ്ചര്യം, നിന്റെ കണ്ണില്‍ വിരുന്നു വന്നു ദീപസ്തംഭം മഹാശ്ചര്യം, മഞ്ഞക്കിളിയുടെ കന്മദം,
മനസ്സില്‍ മിഥുന മഴ നന്ദനം, തകില് പുകില് രാവണപ്രഭു, കൈതപ്പൂ മണം സ്‌നേഹം, വെണ്ണക്കല്ലില്‍ പട്ടാളം, ഓമന മലരെ കുഞ്ഞിക്കൂനന്‍, ചന്ദ്രമുഖൂ നദിതന്‍ കരയില്‍ ഉസ്താദ്, മുറ്റത്തെ മുല്ലപ്പെണ്ണിന് കൊച്ചി രാജാവ്, മന്ദാരപ്പൂ ഞാന്‍ സല്‍പ്പേര് രാമന്‍കുട്ടി, തങ്കമനസ്സിന്‍ സുന്ദര പുരുഷന്‍, വെള്ളാരം കുന്നുകളില്‍ കാട്ടുചെമ്പകം, കാനന കുയിലെ മിസ്റ്റര്‍ ബ്രഹ്മചാരി, താമരക്കണ്ണാ ചൂണ്ട, എന്തിനീ പാട്ടിന് അമ്മക്കിളിക്കൂട്, കുന്നിന്‍ മേലെ അഗ്‌നി നക്ഷത്രം, മുത്തണി മണിവിരലാല്‍ ചൊല്ലിയാട്ടം, കാറ്റില്‍ പ്രണയം .

ശരറാന്തല്‍, രക്തസാക്ഷികള്‍ സിന്ദാബാദ്, ദയ, അച്ഛനയാണെനിക്കിഷ്ടം തുടങ്ങിയ ചിത്രങ്ങളിലും ഗാനങ്ങള്‍ ആലപിച്ചു.