മലയാള നടി ആതിര സന്തോഷിനെ സംവിധായകന്‍ ശെല്‍വ കണ്ണന്‍ ലൈംഗികമായി പീഡിപ്പിച്ചെന്ന വ്യാജപ്രചരണത്തിനെതിരെ ബന്ധു ശ്യാമ കൃഷ്ണ രംഗത്ത്. ഫേയ്‌സ്ബുക്ക് പോസ്റ്റിലൂടെയാണ് ശ്യാമ ഇക്കാര്യം വ്യക്തമാക്കിയത്. നമ്മള്‍ എല്ലാവരും ഇപ്പോള്‍ സോഷ്യല്‍ മീഡിയയിലൂടെ ആണല്ലോ വാര്‍ത്തകള്‍ അറിയുന്നത്. ഞാനും ഇപ്പോള്‍ എന്റെ കുടുംബത്തില്‍ ഉളള ഒരു പെണ്‍കുട്ടിയ്ക്ക് സംഭവിച്ചത് അങ്ങനെ അറിഞ്ഞു.

അറ്റവും മുറിയും കേട്ടിട്ട് പ്രത്യേകിച്ചും പെണ്‍കുട്ടികളുടെ കാര്യം ആണെങ്കില്‍ അത് പരമാവധി എഴുതി പിടിപ്പിച്ച് അവളുടെ ഫോട്ടോയും വച്ച് വാര്‍ത്ത പ്രചരിപ്പിക്കും. ന്റെ കസ്സിന്‍ ആതിര സന്തോഷ് (അതിഥി), ഒന്നു രണ്ട് മലയാളം സീരിയലുകളിലും ടിവി പരിപാടികളിലും അഭിനയിച്ചിട്ടുണ്ട്. തമിഴ് സിനിമയില്‍ ഒരു അവസരം കിട്ടിയപ്പോള്‍ അതിനായി പോയി.

ആദ്യ സിനിമ നെടുനല്‍വാടയ് ; ആദ്യ ഷൂട്ടിന് ശേഷം രണ്ടാമത്തെ ഷൂട്ടിനു പോയപ്പോള്‍ മുതല്‍ അതിന്റെ സഹസംവിധായകനു അവളോടു കടുത്ത പ്രണയം. പലതവണ ഒഴിഞ്ഞു മാറിയിട്ടും അയാള്‍ പിന്‍മാറിയില്ല. അവസാനം ഇവള്‍ ആ സിനിമയില്‍ നിന്നു തന്നെ പിന്‍മാറാന്‍ തീരുമാനിച്ചു. അന്ന് സെറ്റില്‍ നിന്നും പോകാന്‍ സാധിക്കാതെ അവള്‍ക്ക് മുറിയില്‍ തന്നെ കഴിയേണ്ടിവന്നു. അന്നും ആ സംവിധായകന്‍ ഈ പറഞ്ഞ സൂക്കേടുമായി സമീപിച്ചെങ്കിലും ആതിരയുടെ ആയ അങ്ങേരെ ഓടിച്ചു.

പിന്നീട് പാതിവഴിയില്‍ ആ സിനിമ ഉപേക്ഷിച്ച് ചെന്നെയില്‍ വന്ന് പട്ടതാരി എന്ന സിനിമ ചെയ്തു. ഇതിനിടെ അയാള്‍ ആയ വഴി എനിക്കും മെസ്സേജ് അയച്ചു അവളെ കാണാന്‍ വേണ്ടി. ഇതെല്ലാം വച്ച് ആതിര നടികര്‍ സംഘത്തിന് പരാതിയും കൊടുത്തിരുന്നു.

ഇപ്പോള്‍ എന്തു സംഭവിച്ചെന്നു വച്ചാല്‍ കഴിഞ്ഞയാഴ്ച ആ നമ്മുടെ സൂക്കേടുകാരന്‍ ഒരു ഷൂട്ടിന്റെ ഇടയ്ക്ക് ചെന്ന് ഇവളെ അങ്ങ് പരസ്യമായി വെല്ലുവിളിച്ച് കളഞ്ഞു. ഇതു മൂലം നാണക്കേടും പേടിയും കാരണം ഈ പൊട്ടിപ്പെണ്ണ് കുറച്ച് ഉറക്ക ഗുളിക അങ്ങ് വിഴുങ്ങി. നേരെ ഐയിയുയില്‍ ആയി. അങ്ങനെ അത് പുറത്ത് എല്ലാവരും അറിഞ്ഞ് മീഡിയാക്കാരും എത്തി. അതൊക്കെ ചില തമിഴ് മാധ്യമങ്ങളില്‍ വന്നു.

അത് പക്ഷേ നമ്മുടെ മലയാളം വാര്‍ത്തകളില്‍ എങ്ങനെയോ ലൈംഗിക പീഢനം ആയി. അതും ഫോട്ടോ സഹിതം. എന്തു കഷ്ടമാണന്ന് നോക്കണേ. ഇങ്ങനെ ഒരു വാര്‍ത്ത കേള്‍ക്കുമ്പോള്‍ സുഖം തോന്നുന്ന ചില നാറികള്‍ ഉണ്ട്. അവന്‍മാരുടെ വക കമന്റും കണ്ടു. പക്ഷേ ഒന്നു ചിന്തിച്ചു നോക്കണം സഹോദരന്‍മാരെ.

നിങ്ങളുടെ വീട്ടില്‍ ഉള്ള അമ്മയും ഭാര്യയും പെങ്ങളും ഒരു ഗോവിന്ദച്ചാമിയുടെയും കയ്യില്‍ പെടാതെ സുരക്ഷിതര്‍ ആണോ എന്ന്. സിനിമ നടി ആയതു കൊണ്ടുമാത്രമല്ല നിങ്ങള്‍ ഇങ്ങനെയൊക്കെ പ്രതികരിച്ചത്, അത് മറ്റൊരു പെണ്‍കുട്ടി ആയാലും അങ്ങനെ തന്നെ അല്ലേ? ഇവള്‍ക്കു താഴെ രണ്ടു അനിയത്തിമാര്‍ ഉണ്ട്. അവരുടെ ഭാവി എന്താകും.

പീഢനം എന്ന വാക്കിനു ആ ഒരു അര്‍ത്ഥം മാത്രമേ ഉള്ളൂ അല്ലേ??? കഷ്ടം! ആരാണോ ഫോട്ടോ സഹിതം ഇങ്ങനെ വാര്‍ത്ത ഇട്ടതെന്ന് എനിക്കറിയില്ല എന്റെ ഈ പോസ്റ്റ് കാണാന്‍ ഇട വന്നാല്‍ അറിഞ്ഞു കൊള്‍ക ആതിരയ്ക്ക് എന്താണു സംഭവിച്ചതെന്ന് ഞങ്ങള്‍ക്ക് വ്യക്തമായിട്ട് അറിയാം, ആദ്യം നീ നിന്റെ വീട്ടില്‍ പോയി ഭാര്യയ്ക്കും മക്കള്‍ക്കും അമ്മയ്ക്കും സംരക്ഷണം കൊടുക്ക്. അല്ലെങ്കില്‍ ചിലപ്പോള്‍ ഒരു കുടുംബത്തിന്റെ ശാപം പാവം അവര്‍ക്കായിരിക്കും ഏല്‍ക്കുന്നത്. ചങ്ക് പൊട്ടിക്കരയുന്ന ഒരു അമ്മയുടെ വാക്കാണ് ഇത്, ഞാന്‍ പറഞ്ഞു എന്നു മാത്രം. നന്ദി സഹോദരന്മാരേ