പ്രശസ്തതാരം ഹരിശ്രീ അശോകന്‍ ബിഎംഡബ്ല്യു എക്‌സ് ത്രീ സ്വന്തമാക്കി. താരം തന്നെ ഫേസ്ബുക്കിലൂടെയാണ് പുതിയ വാഹനം സ്വന്തമാക്കിയ വിവരം ആരാധകരെ അറിയിച്ചത്. വാഹനത്തിനൊപ്പം നില്‍ക്കുന്ന ചിത്രവും ഹരിശ്രീ അശോകന്‍ പങ്കുവച്ചിട്ടുണ്ട്.

ജര്‍മ്മന്‍ വാഹന നിര്‍മ്മാതാക്കളായ ബിഎംഡബ്ല്യുവിന്റെ ലക്ഷ്വറി ക്രോസ്ഓവറാണ് എക്‌സ്ത്രീ. ഡീസല്‍ എന്‍ജിന്‍ മാത്രമുള്ള എക്‌സ് ത്രീയുടെ മൂന്നു വകഭേദങ്ങളാണ് വിപണിയിലുള്ളത്. 1995 സിസി എന്‍ജിനാണ് എക്‌സ്ത്രീക്ക് കരുത്തു പകരുന്നത്. 4000 ആര്‍പിഎമ്മില്‍ 190 എച്ച്പി കരുത്തും 1750 2500 ആര്‍പിഎമ്മില്‍ 400 എന്‍എം ടോര്‍ക്കും നല്‍ക്കും ഈ എന്‍ജിന്‍.

പൂജ്യത്തില്‍ നിന്ന് നൂറു കിലോമീറ്റര്‍ വേഗത കൈവരിക്കാന്‍ 8.1 സെക്കന്റ് മാത്രം മതി ഈ കരുത്തന്‍ എസ് യു വിക്ക്. നേരത്തെ മലയാള സിനിമയിലെ താര ദമ്പതികളായ ആഷിഖ് അബുറിമാ കല്ലിങ്കല്‍ എക്‌സ്ത്രീയുടെ എം സ്‌പോര്‍ട് സ്വന്തമാക്കിയിരുന്നു.

പഞ്ചാബി ഹൗസ് എന്ന ചിത്രത്തിലെ രമണന്‍ എന്ന ഒരൊറ്റ കഥാപാത്രം മതി ഏതു തലമുറയില്‍ പെട്ടവര്‍ക്കും ഹരിശ്രി അശോകന്‍ എന്ന നടനെ ഓര്‍ത്തെടുക്കാന്‍. സോഷ്യല്‍ മീഡിയയും ഓണ്‍ലൈന്‍ തരംഗങ്ങളും ഇല്ലാത്ത കാലത്ത് ഇറങ്ങിയ ചിത്രം. എന്നാല്‍ അടുത്ത കാലത്ത് രമണന്‍ വീണ്ടും സോഷ്യല്‍ മീഡിയയില്‍ ട്രോളുകളായി നിറഞ്ഞു. അങ്ങനെ വീണ്ടും ഹരിശ്രി അശോകന്‍ എന്ന താരം സജീവമാവുകയായിരുന്നു.