ഫഹദ് ഫാസിലിന്റെ ആദ്യ കാമുകിയായി അഭിനയിച്ച നിഖിത വിവാഹിതയാകുന്നു. ഫാസിലിന്റെ 'കയ്യെത്തും ദൂരത്തിലൂടെ' യാണ് നിഖിത മലയാളത്തിലെത്തുന്നത്. പിന്നീട് മമ്മൂട്ടിയുടെ ബസ് കണ്ടക്ടറിലും ഭാര്‍ഗവചരിതം മൂന്നാം ഖണ്ഡത്തിലും മോഹന്‍ലാലിന്റെ കനലിലും അഭിനയിച്ചു. ഈ നവരാത്രി ദിവസമാണ് വിവാഹം. മുംബൈവാസിയായ ഒരു ബിസിനസ്സുകാരനാണ് വരന്‍ ഗഗന്‍ദീപ്‌സിംഗ്. ഇരുവരും പ്രണയത്തിലായിരുന്നുവെങ്കിലും വീട്ടുകാരുടെ സമ്മതത്തോടെയാണ് വിവാഹം. ആര്‍ഭാടമായ വിവാഹചടങ്ങളുകള്‍ ആരംഭിച്ചു കഴിഞ്ഞു.

2002ല്‍ ഹായ് എന്ന കന്നട സിനിമയിലാണ് ആദ്യം അഭിനയിക്കാന്‍ വിളിച്ചതെങ്കിലും തുടക്കം മലയാളത്തിലായിരുന്നു. കന്നടയിലെ തിരക്കുള്ള നടിയായി താരം പെട്ടെന്ന് മാറി. എന്നാല്‍ നടന്‍ ദര്‍ശനുമായുള്ള ബന്ധത്തെതുടര്‍ന്ന് 2011 മുതല്‍ കന്നട ഫിലിം പ്രൊഡ്യൂസേഴ്‌സ് അസോസിയേഷന്‍ താരത്തെ വിലക്കി. ദര്‍ശന്‍ ഭാര്യയെ മര്‍ദ്ദിക്കുന്നതിന് കാരണം നിഖിതയാണെന്ന് പരാതി നല്‍കിയതിനെ തുടര്‍ന്നായിരുന്നു ഇത്. സംഭവം വിവാദമായതോടെ രക്തസമ്മര്‍ദ്ദം കൂടി നിഖിത ആശുപത്രിയിലായി. ആ സമയം കന്നട താരങ്ങള്‍ ഒപ്പം നിന്നു. താരത്തിനെതിരെയുള്ള വിലക്ക് നീക്കണമെന്ന് ആവശ്യപ്പെട്ടു. അങ്ങനെ വിലക്ക് നീങ്ങി.

പഞ്ചാബിയായ നിഖിത പഠിച്ചതും വളര്‍ന്നതും ഹൈദരാബാദിലാണ്. ജയമാറിന്റെ പുതിയ ചിത്രമായ സത്യയിലും അഭിനയിച്ചു. ട്രാഫിക്കിന്റെ ഹിന്ദി പതിപ്പിലും അഭിനയിച്ചു. മലയാളത്തില്‍ വിരലില്‍ എണ്ണാവുന്ന ചിത്രങ്ങളിലെ അഭിനയിച്ചുള്ളു. തെലുങ്കിലും കന്നടയിലും നിരവധി ചിത്രങ്ങളില്‍ അഭിനയിച്ചു. മലയാളത്തില്‍ നിന്ന് ഫാസിലിനെയും ഫഹദിനെയും വിവാഹത്തിന് ക്ഷണിച്ചിട്ടുണ്ട്.