മലര്‍വാടി ആര്‍ട്‌സ് ക്ലബിലൂടെ സിനിമയിലെത്തിയ മാളവിക പക്ഷെ, കുടുംബ പ്രേക്ഷകരുടെ ഇഷ്ടക്കാരിയായത് സീരിയലിലൂടെയാണ്. പൊന്നമ്പിളി എന്ന സീരിയലിലെ മിന്നും താരമാണ്. സീരിയല്‍ നടന്‍ രാഹുലും താനും പ്രണയത്തിലാണെന്ന് പല പ്രേക്ഷകര്‍ക്കും സംശയമാണെന്ന് താരം പറഞ്ഞു. എന്തായാലും തല്‍ക്കാലം പ്രണയത്തെ കുറിച്ചോ, വിവാഹത്തെ കുറിച്ചോ ചിന്തിക്കുന്നില്ലെന്ന് താരം പറഞ്ഞു. അച്ഛന്‍ മരിച്ചു പോയി. അമ്മയാണ് കാര്യങ്ങള്‍ നോക്കുന്നത്. അച്ഛന്റെ കുറവ് അറിയിക്കാതിരിക്കാന്‍ അമ്മ ശ്രമിക്കുന്നുണ്ട്. ചേട്ടനും ഭാര്യ നീലിമയും വളരെ നല്ല പ്രോല്‍സാഹനമാണ് നല്‍കുന്നത്.

മലയാളത്തില്‍ മലര്‍വാടിക്ക് ശേഷം അഭിനയിച്ചില്ലെങ്കിലും കന്നടയില്‍ മൂന്നാല് സിനിമയില്‍ അഭിനയിച്ചു. പക്ഷെ, അതിനിടയ്ക്കാണ് അച്ഛന്‍ മരിച്ചത്. അച്ഛന്‍ മരിച്ചെന്ന് ഇപ്പോഴും വിശ്വസിക്കാനായിട്ടില്ല. ഹാര്‍ട്ട് അറ്റാക്ക് വന്ന ശേഷം ആരോഗ്യകാര്യങ്ങളില്‍ നല്ല ശ്രദ്ധയായിരുന്നു. മരുന്നും ഭക്ഷണവും വ്യായാമവും കൃത്യമായിരുന്നു. ട്രഡ്മില്ലില്‍ കുഴഞ്ഞ് വീണാണ് മരിച്ചത്. അതും മാളവികയുടെയും അമ്മയുടെയും മുന്നില്‍. അച്ഛന്റെ മരണ ശേഷം അഭിനയം തുടരാന്‍ തോന്നിയില്ല.

2009ലെ മിസ് കേരള മല്‍സരത്തില്‍ പങ്കെടുത്തത് അച്ഛന്റെ താല്‍പര്യ പ്രകാരമായിരുന്നു. ഒന്നാമതെത്തിയില്ലെങ്കിലും മിസ് ബ്യൂട്ടിഫുള്‍ ഐ ടൈറ്റില്‍ നേടി. ബാല്യത്തില്‍ ജ്യോതിഷികള്‍ പറഞ്ഞിരുന്നു മാളവികയ്ക്ക് കലയില്‍ നല്ല ഭാവിയുണ്ടെന്ന്. അതാണ് അച്ഛന്‍ ഡാന്‍സിനും മറ്റും താരത്തെ ചെറുപ്പത്തിലേ ചേര്‍ത്തത്. അച്ഛന് തന്നോട് എത്രത്തോളം സ്‌നേഹവും കരുതലും ഉണ്ടായിരുന്നു എന്നതിന് തെളിവായിരുന്നു അതെന്ന് താരം പറഞ്ഞു.