അന്തരിച്ച ചലച്ചിത്ര താരം കലാഭവന്‍ മണിയ്‌ക്കൊപ്പം അഭിനയിക്കാന്‍ നടിമാര്‍ മടിച്ചിരുന്നതിന്റെ പിന്നിലെ കാരണം വെളിപ്പെടുത്തി സംവിധായകന്‍ വിനയന്‍. കലാഭവന്‍ മണിക്കൊപ്പം അഭിനയിക്കാന്‍ നടിമാര്‍ക്ക് താത്പര്യം കുറവായിരുന്നു. തന്റെ നിറമാണ് അതിന് കാരണമെന്ന് മണി പലപ്പോഴും പറഞ്ഞിരുന്നു. എന്നാല്‍ നിറം മാത്രമായിരുന്നില്ല. താഴ്ന്ന ജാതിക്കാരനാണെന്ന കാരണത്താലാണ് പലരും നോ പറഞ്ഞിരുന്നതെന്നാണ് വിനയന്‍ പറയുന്നത്.

കലാഭവന്‍ മണിയെ നായകന്റെ സ്ഥാനത്തേക്ക് ഉയര്‍ത്തിക്കൊണ്ടു വന്ന സംവിധായകനാണ് വിനയന്‍. അദ്ദേഹം തന്നെയാണ് ഇക്കാര്യം തുറന്ന് പറഞ്ഞിരിക്കുന്നത്. വാസന്തിയും ലക്ഷ്മിയും പിന്നെ ഞാനും എന്ന ചിത്രത്തില്‍ അഭിനയിക്കാന്‍ മലയാളത്തിലെ മുന്‍നിര നടിമാര്‍ താത്പര്യ കുറവ് കാണിച്ചതിനെ കുറിച്ചും കലാഭവന്‍ മണി നേരത്തെ പറഞ്ഞിരുന്നു.

അതേസമയം വാസന്തിയും ലക്ഷ്മിയും പിന്നെ ഞാനും എന്ന ചിത്രം തമിഴിലേക്ക് റീമേക്ക് ചെയ്യാന്‍ തീരുമാനിച്ചിരുന്ന സമയത്ത് വിക്രമിനെയായിരുന്നു നായകനായി ഉദ്ദേശിച്ചിരുന്നത്. ആ സമയത്ത് വിക്രമിനൊപ്പം അഭിനയിക്കാന്‍ അവസരം ചോദിച്ച് നടിമാര്‍ വീട്ടിലേക്ക് വരുമായിരുന്നുവെന്നും സംവിധായകന്‍ സാക്ഷ്യപ്പെടുത്തുന്നു.

കലാഭവന്‍ മണി നേരിട്ടിരുന്നത് മലയാള സിനിമയിലെ ദളിത് വിരുദ്ധതയാണെന്നും അദ്ദേഹം പറയുന്നു. ഹാസ്യ നടനായും സഹനട വേഷങ്ങളും അവതരിപ്പിച്ചുകൊണ്ടിരുന്ന കലാഭവന്‍ മണി വിനയന്റെ ചിത്രത്തിലൂടെയാണ് നായകനാകുന്നത്. കലാഭവന്‍ മണിവിനയന്‍ വാസന്തിയും ലക്ഷ്മിയും പിന്നെ ഞാനും, കല്യാണ സൗഗന്ധികം, രാക്ഷസ രാജാവ്, കരിമാടിക്കുട്ടന്‍, ആകാശഗംഗ തുടങ്ങിയ അനേകം വിനയന്‍ ചിത്രങ്ങളില്‍ നായകനായും സഹനടനായും വില്ലനായും കലാഭവന്‍ മണി വേഷമിട്ടിട്ടുണ്ട്.