വളരെക്കാലമായി നല്ലൊരു മോഹന്‍ലാല്‍ ചിത്രത്തിനായുള്ള കാത്തിരുപ്പിലായിരുന്നു ആരാധകര്‍. പ്രതീക്ഷിച്ച പോലെ പുലിമുരുകന്‍ തീയറ്ററുകളെല്ലാം ഉത്സവപറമ്പുകളായി. അതിരാവിലെയു അര്‍ദ്ധരാത്രിയും ഷോകളുമായി മോഹന്‍ലാല്‍ വൈശാഖ് ചിത്രം മുന്നേറുകയാണ്. മെട്രോ നഗരങ്ങളിലെ മിക്ക തീയറ്ററുകളിലും വ്യാഴാഴ്ച്ച വരെയുള്ള ബുക്കിങ് ഫുള്ളായിക്കഴിഞ്ഞു. ഓണ്‍ലൈനില്‍ ടിക്കറ്റെടുത്ത് സിനിമ കാണണമെങ്കില്‍ ഒരാഴ്ച്ചയെങ്കിലും കാത്തിരിക്കേണ്ട അവസ്ഥയാണുള്ളത്. ഇങ്ങനെ പുലിമുരുകന്‍ ടിക്കറ്റിനായി പ്രേക്ഷകരുടെ നെട്ടോട്ടമോടുന്ന അവസ്ഥയാണ് ഇപ്പോള്‍ കാണുന്നത്. ചൂടപ്പം പോലെയാണ് ഓണ്‍ലൈനിലും തീയറ്ററിലും ടിക്കറ്റ് വിറ്റു പോകുന്നത്.

പല തീയറ്ററുകളും അതിരാവിലെയും പാതിരാത്രിയിലുമൊക്കെ സ്‌പെഷല്‍ ഷോകള്‍ വച്ചിട്ടും പ്രേക്ഷകരെ തൃപ്തരാക്കാന്‍ കഴിയാത്ത അവസ്ഥയിലാണ്. 325 തീയറ്ററുകളില്‍ റിലീസായ ചിത്രം നാലാം ദിവസത്തിലേക്കെത്തുമ്പോഴും ഹൗസ്ഫുള്‍ ഷോകളുമായി നിറഞ്ഞോടുകയാണ്. മലയാളത്തില്‍ ഒരു സിനിമയ്ക്കും ലഭിക്കാത്ത അത്യുജ്ജ്വല സ്വീകരണമാണ് പുലിമുരുകന് ലഭിച്ചിരിക്കുന്നത്. കരിഞ്ചന്തയില്‍ ടിക്കറ്റിന് പൊന്നുംവിലയാണ്. ഇടക്കാലം കൊണ്ട് കരിഞ്ചന്ത മാഫിയ സജീവമായിരുന്നില്ല. എന്നാല്‍ മോഹന്‍ലാല്‍ ചിത്രത്തിന് വേണ്ടി എങ്ങും നെട്ടോട്ടം തുടങ്ങിയതോടെയാണ് കരിഞ്ചന്തയും ശക്തമായത്.
വ്യക്തമായ കണക്കുകള്‍ ഇതുവരെ ലഭ്യമായിട്ടില്ലെങ്കിലും എല്ലാ ബോക്‌സ് ഓഫിസ് റെക്കോര്‍ഡുകളും മുരുകന്‍ കീഴടക്കുമെന്നാണ് സിനിമയോട് അടുത്ത വൃത്തങ്ങള്‍ സൂചിപ്പിക്കുന്നത്. ആദ്യ ദിനങ്ങളിലെ കളക്ഷന്‍ റിപ്പോര്‍ട്ടുകള്‍ പുറത്തുവന്നതോടെ നിരവധി റെക്കോര്‍ഡുകള്‍ സൃഷ്ടിച്ചിരിക്കുകയാണ് ഈ ചിത്രം. മലയാളത്തിലെ ഇതുവരെയുള്ള കളക്ഷന്‍ റെക്കോര്‍ഡുകള്‍ തിരുത്തിയെന്നാണു പുറത്തുവരുന്ന വിവരങ്ങള്‍ സൂചിപ്പിക്കുന്നത്.

മൂന്ന് ദിവസം കൊണ്ട് പുലിമുരുകന്‍ നേടിയതു 12,91,71, 736 രൂപ. മുളകുപ്പാടം ഫിലിംസ് ഔദ്യോഗികമായി പുറത്തുവിട്ടതാണ് ഈ കണക്ക്. മലയാളത്തിലെ ഏറ്റവും ഉയര്‍ന്ന ഇനീഷ്യലും മലയാളത്തില്‍ ഏറ്റവും വേഗത്തില്‍ 10 കോടി പിന്നിട്ട ചിത്രവും മോഹന്‍ലാലിന്റേതായി. നിലവില്‍ ഏറ്റവും വേഗത്തില്‍ 30 കോടി പിന്നിട്ട ചിത്രം മോഹന്‍ലാലിന്റെ ഒപ്പം ആണ്. ഏറ്റവും ഉയര്‍ന്ന കളക്ഷന്‍ നേടിയ മലയാള സിനിമയും മോഹന്‍ലാല്‍ നായകനായ ചിത്രമാണ്. ജീത്തു ജോസഫ് സംവിധാനം ചെയ്ത ദൃശ്യം. 325 തിയറ്ററുകളില്‍ റിലീസ് ചെയ്ത ചിത്രം കേരളത്തിലെ 160 റിലീസ് കേന്ദ്രങ്ങളില് നിന്ന് മാത്രമായി 12,91,71,736 രൂപ മൂന്ന് ദിവസം കൊണ്ട് നേടി.

ആദ്യ ദിവസത്തെ കളക്ഷന്‍ 4,05,87,933, രണ്ടാം ദിനം 4,02,80,666, മൂന്നാം ദിനം 4,83,03,147 എന്നിങ്ങനെയാണ് കണക്ക്. നേരത്തെ നാല് കോടിക്ക് മുകളിലാണ് ആദ്യ ദിനകളക്ഷന്‍ എന്ന് റിപ്പോര്‍ട്ടുകള്‍ വന്നിരുന്നു. നാല് കോടി അഞ്ച് ലക്ഷത്തിന് മുകളിലാണ് ആദ്യ ദിന നേട്ടം. കേരളത്തില്‍ നിന്ന് ഏറ്റവും ഉയര്‍ന്ന ഇനീഷ്യല്‍ നേടിയ ചിത്രം രജനീകാന്തിന്റെ കബാലിയാണ്. കബാലിക്ക് തൊട്ടുപിന്നിലായാണ് മോഹന്‍ലാല്‍ ചിത്രം ഇനീഷ്യലില്‍ നിലയുറപ്പിച്ചിരിക്കുന്നത്. കേരളത്തില്‍ നിന്ന് മാത്രം ലഭിച്ച കളക്ഷനാണ് ഇത്. ഇതോടെ കേരളത്തിലെ ഏറ്റവും ഉയര്‍ന്ന ആദ്യദിനകളക്ഷന്‍ നേടിയ ചിത്രമായി പുലിമുരുകന്‍ മാറിയിരിക്കുകയാണ്.

കൊച്ചി മള്‍ട്ടിപ്‌ളെക്‌സില്‍ 3 ദിവസത്തെ കളക്ഷനില്‍ ഏറ്റവും ഉയര്‍ന്ന രണ്ടാമത്തെ ഗ്രോസ് കളക്ഷനായി മാറി. കബാലി മൂന്ന് ദിവസം കൊണ്ട് 81.77 ലക്ഷം നേടിയപ്പോള്‍ പുലിമുരുകന്‍ 42.85 ലക്ഷം നേടി. കേരളത്തില്‍ 160 കേന്ദ്രങ്ങളിലും സംസ്ഥാനത്തിന് പുറത്ത് 165 കേന്ദ്രങ്ങളിലുമാണ് പുലിമുരുകന്‍ റിലീസ് ചെയ്തത്. വരുംദിനങ്ങളില്‍ തീയറ്ററുകളുടെ എണ്ണം കൂട്ടാന്‍ സാധ്യതയുണ്ട്. കബാലി പോലും ആദ്യ ദിവസത്തെ രാത്രി ഷോകളോടെ പുറകോട്ടാണെന്നു വ്യക്തമായിരുന്നു. തിയറ്ററുകളിലെ ബുക്കിംങ് രീതി കണ്ടാണ് ഇതു വിലയിരുത്തുന്നത്. എന്നാല്‍ പുലിമുരുകന്‍ അത്തരമൊരു തളര്‍ച്ച ഒരിടത്തുപോലും കാണിക്കുന്നില്ല. ഇത്രയേറെ തിയറ്ററുകളില്‍ ഒരു സിനിമ ഗ്രാഫ് ഉയര്‍ത്തി നിര്‍ത്തുന്നതു മലയാളത്തിലെ ആദ്യ സംഭവമായിരിക്കും.

ഇന്ത്യയ്ക്ക് പുറത്ത് ചിത്രം നിലവില്‍ റിലീസ് ചെയ്തിട്ടില്ല. തമിഴ്,തെലുങ്ക്, ഹിന്ദി പതിപ്പുകളും റിലീസിന് തയ്യാറെടുക്കുകയാണ്. മിക്ക കേന്ദ്രങ്ങളിലും റിലീസ് ദിവസം മുതല്‍ ഹൗസ് ഫുള്‍ പ്രദര്‍ശനമാണ് നടക്കുന്നത്. പുലിമുരുകന്റെ കേരളത്തിന് പുറത്തെ കളക്ഷന്‍ ഉടന്‍ പുറത്തുവിടുമെന്ന് നിര്‍മ്മാതാവ് അറിയിച്ചു. നൂറ് കോടി ക്ലബ്ബിലെത്തുന്ന ആദ്യ മലയാള ചിത്രമായി പുലിമുരുകന്‍ മാറുമെന്നാണ് ചലച്ചിത്ര ലോകത്തിന്റെ വിലയിരുത്തല്‍.