പുലിമുരുകന്‍ മലയാള സിനിമയിലെ കളക്ഷന്‍ റെക്കോര്‍ഡുകള്‍ ഭേദിച്ചു മുന്നേറുമ്പോള്‍ മോഹന്‍ലാല്‍ പ്രതിഫലം 5 കോടിയാക്കി. നിലവില്‍ മൂന്നു കോടിയാണ് വാങ്ങിയിരുന്നത്. ജനതാ ഗ്യാരേജ്ഒപ്പം എന്നിവ മികച്ച കളക്ഷനാണ് ഇപ്പോഴും നേടുന്നത്. തെലുങ്കില്‍ അടുത്ത കാലത്തിറങ്ങിയ ഏറ്റവും വലിയ ഹിറ്റാണ് ജനതാഗ്യാരേജ്.

മലയാളത്തിലെ ഒരു നടന്‍ വാങ്ങുന്ന ഏറ്റവും ഉയര്‍ന്ന പ്രതിഫലമാണ് 5 കോടി. മുമ്പ് ദിലീപ് മായാമോഹിനിയില്‍ 3 കോടി വാങ്ങിയിരുന്നെങ്കിലും അത് പണമായിട്ടായിരുന്നില്ല, ചിത്രത്തിന്റെ എറണാകുളത്തെ വിതരണാവകാശത്തിലൂടെ കിട്ടിയ പണമായിരുന്നു അത്. മോഹന്‍ലാല്‍ പ്രതിഫലം ഉയര്‍ത്തിയത് നിര്‍മ്മാതാക്കളേയും വിതരണക്കാരെയും ആശങ്കയിലാഴ്ത്തുന്നുണ്ട്.

എന്നാല്‍ സിനിമകള്‍ 20 കോടിയിലധികം കളക്ട് ചെയ്യുകയും 6 കോടിയ്ക്കടുത്ത് സാറ്റ്‌ലൈറ്റ് അവകാശം ലഭിക്കുകയും ചെയ്യുന്നതിനാല്‍ 5 കോടി വാങ്ങുന്നതില്‍ തെറ്റില്ലെന്ന് മോഹന്‍ലാലിന് നിസംശയം പറയാം. പുലിമുരുകനിലൂടെ വിദേശ വിതരണാവകാശം 10 കോടിയുമായി. സിനിമകള്‍ ഓടി നടന്ന് ചെയ്യാതെ നല്ലതു മാത്രം സ്വന്തം കമ്പനിയുടെ ബാനറില്‍ നിര്‍മ്മിക്കാനാണ് നീക്കം. ശക്തമായ കഥയോ വാണിജ്യമൂല്യമുള്ള വിനോദ സിനിമകളോ ആണെങ്കില്‍ തിയറ്റുകളില്‍ തിരയിളക്കം സൃഷ്ടിക്കുമെന്ന് ലാലിനറിയാം.