സിനിമയില്‍ നിന്ന് രാഷ്ട്രീയത്തിലേക്കും അവിടെ നിന്ന് ആത്മീയതയിലേക്കും പോയ നടി നഗ്മ വീണ്ടും വെള്ളിത്തിരയിലെത്തുന്നു. അഭിനയം നിര്‍ത്തിയ താരം നേരെ കോണ്‍ഗ്രസ് രാഷട്രീയത്തിലിറങ്ങി. ഉത്തര്‍പ്രദേശ് തെരഞ്ഞെടുപ്പില്‍ പ്രചാരകയായി താരം തിളങ്ങിയിരുന്നു.

2003 കാലത്ത് മല്‍സരിക്കാന്‍ പാര്‍ട്ടി പറഞ്ഞെങ്കിലും സിനിമകളിലെ തിരക്ക് കാരണം നടന്നില്ല. 2006ല്‍ വിലാസ് റാവുദേശ്മുഖ് മരിച്ചതിനെ തുടര്‍ന്ന് മുംബയില്‍ നിന്ന് രാജ്യസഭാ എം.പിയാക്കാമെന്ന് പാര്‍ട്ടി പറഞ്ഞെങ്കിലും അതും നടന്നില്ല. ഒടുവില്‍ മനംനൊന്ത താരം പെന്തക്കോസ്ത് വിശ്വാസിയായി. കോട്ടയത്തടക്കം താരം വചനഘോഷയാത്രയ്ക്ക് വന്നിരുന്നു.

1990 കളില്‍ തെന്നിന്ത്യയില്‍ ആദ്യമായി ബിക്കിനി ധരിച്ച നായികമാരില്‍ ഒരാളായിരുന്നു നഗ്മ. ഹിന്ദിയിലായിരുന്നു തുടക്കം. പിന്നീട് തമിഴിലെയും തെലുങ്കിലെയും ഗ്ലാമര്‍ നായികയായി. കാതലന്‍ ഉള്‍പ്പെടെ നിരവധി ഹിറ്റ് ചിത്രങ്ങള്‍ ഇറങ്ങി. പിന്നീടാണ് സഹോദരി ജ്യോതിക തെന്നിന്ത്യയിലെത്തിയതും ടോപ്പ് നായികയായതും. ഒരു വലിയ ഗ്യാപ്പിനുശേഷമാണ് വീണ്ടും നഗ്മ മടങ്ങിവരുന്നത്. ഇക്കുറി ധനിഷിന്റെ ചേച്ചിയായാണ് വരവ്.

വെട്രിമാരന്‍ സംവിധാനം ചെയ്യുന്ന വട ചൈന്നയില്‍. അമലപോളാണ് നായിക. വിജയ് സേതുപതി മറ്റൊരു പ്രധാന വേഷം ചെയ്യുന്നു. നാല്‍പതിന്റെ തുടക്കത്തിലെത്തിയ താരത്തിന് വലിയമാറ്റമൊന്നുമില്ല.