ഗിന്നസ് പക്രു കര്‍ഷകനായി. ചോറ്റാനിക്കരയില്‍ കുറച്ചു സ്ഥലം മേടിച്ചു, ആ സ്ഥലത്തു ചെറിയ രീതിയില്‍ കൃഷി തുടങ്ങിയിരിക്കുകയാണ് പക്രു. ഭാര്യയും മോളും അച്ഛനും എല്ലാവരും കൂടിയാണ് കൃഷി ചെയ്യുന്നത് ആദ്യ ചുവടു കപ്പ പറിച്ചപ്പോള്‍ തന്നെ സന്തോഷം തോന്നിയെന്ന് പക്രു പറഞ്ഞു.കാരണം എന്നേക്കാള്‍ വലിയ കപ്പയായിരുന്നു. ഭാര്യ വളരെ കഷ്ടപ്പെട്ടാണത് പറിച്ചെടുത്തത്. 15 സെന്റ് സ്ഥലത്ത് കപ്പയും വാഴയും വെണ്ടയും പാവലും കോവലും എല്ലാം ഇടകലര്‍ത്തിയാണ് കൃഷി ചെയ്തത്. മോളും ഭാര്യയും കൂടെയുണ്ടാകും. ചെറിയ ഒരു പരീക്ഷണം എന്ന രീതിയില്‍ ചെയ്തതാണ്. പരീക്ഷണം വിജയമായിരുന്നു. ഇവിടെ അടുത്തു ശ്രീനിയേട്ടനെക്കെ വിഷരഹിതമായ പച്ചക്കറി വലിയ രീതിയില്‍ കൃഷി ചെയ്യുമ്പോള്‍ നമുക്കു പറ്റാവുന്നത് നമ്മളും ചെയ്യുന്നു. എല്ലാവര്‍ക്കും കഴിയുന്നതു പോലെ ശ്രമിച്ചാല്‍ കേരളത്തിനൊരു മുതല്‍ക്കൂട്ടാവുമെന്നാണു ഞാന്‍ വിചാരിക്കുന്നത്.
കൃഷി തുടങ്ങിയിട്ട് ആറ് മാസമായതേയുള്ളു. ക്ലീനിങ്ങിനും മറ്റു ചെറിയ ചെറിയ കാര്യങ്ങള്‍ക്കും മാത്രമെ പുറത്തുനിന്നു ജോലിക്ക് ആളെ വിളിച്ചുള്ളു, ബാക്കി പ്രധാനപ്പെട്ട കാര്യങ്ങളെല്ലാം ഞാനും മോളും ഭാര്യയും അമ്മയും അച്ഛനും മോളും കൂടിയാണു ചെയ്്തത്. രണ്ടാം ക്ലാസില്‍ പഠിക്കുന്ന മോളു വലിയ ഉത്സാഹത്തിലാണ്. എന്റെ കൂടെ കൃഷി സ്ഥലത്തൊക്കെ വരും. നടാനും പറിക്കാനും ഓടി നടക്കും. ഇവിടെ ചോറ്റാനിക്കരയില്‍ നാട്ടുകാര്‍ ചേര്‍ന്നു എട്ടേക്കര്‍ പാടം നെല്‍കൃഷി നടത്തുന്നുണ്ട്. അവര്‍ക്ക് സപ്പോര്‍ട്ട് ആയി ഞാനും ഉണ്ടായിരുന്നു.
സിനിമ മേഖലയിലുള്ള പലര്‍ക്കും കൃഷി ഹോബിയാണ്. എന്റെ കൂട്ടുകാരന്‍ ടിനി ടോം, കെഎസ് പ്രസാദ് തുടങ്ങിയവര്‍ക്കൊക്കെ അത്യാവശ്യം കൃഷിയുണ്ട്. അവനവന്റെ മുറ്റത്തു എന്തുണ്ടായാലും അത് വളരെ സന്തോഷം തരുന്ന കാര്യമാണ്. സിനിമ രംഗത്ത് അധികം പേര്‍ക്കൊന്നും എന്റെ കൃഷിയെക്കുറിച്ച് അറിയില്ല. ഫേസ്ബുക്കിലെ ഫോട്ടോ കാണുമ്പോഴായിരിക്കും ആളുകള്‍ അറിയുന്നത്. നേരത്തെ ചോറ്റാനിക്കരയില്‍ നെല്‍കൃഷിക്ക് വിത്തെറിഞ്ഞ പടം പത്രത്തില്‍ വന്നപ്പോള്‍ ശ്രീനിയേട്ടന്‍ ഒരു കമന്റ് പറഞ്ഞിരുന്നു. നീ അവിടെ ചില പരിപാടികളൊക്കെ നടത്തുന്നതായി ഞാനറിയുന്നുണ്ട് കേട്ടോ എന്നായിരുന്നു ആ കമന്റ്.
പാരമ്പര്യമായി കൃഷിയുമായി വലിയ ബന്ധമൊന്നുമില്ലാത്ത ആളാണ് ഞാന്‍. വീടില്ലാതെ പതിനാറ് വര്‍ഷം വാടകയ്ക്ക് താമസിച്ചയാളാണ് ഞാന്‍. സ്വന്തമായിട്ട് എന്തേലും കുഴിച്ചുവെക്കാനില്ലാത്തതിന്റേയും ബുദ്ധിമൂട്ട് കുറേക്കാലമായി അനുഭവിച്ചയാളാണ് ഞാന്‍. അതുകൊണ്ടാണ് കൃഷിയോടൊക്കെ സ്‌നഹമൊക്കെ തോന്നുന്നത്. '