അഭിപ്രായങ്ങള്‍ തുറന്ന് പറയാന്‍ മടിയില്ലാത്ത നടനാണ് പൃഥ്വിരാജ്. മമ്മൂട്ടിയായാലും മോഹന്‍ലാലായാലും പറയാനുള്ള അഭിപ്രായം പൃഥ്വിരാജ് തുറന്ന് പറയും. പണ്ട് താരസംഘടനയായ അമ്മയെ വെല്ലുവിളിച്ച് മാക്ടയുമായി കരാറൊപ്പിട്ട് വിനയന്‍ ചിത്രത്തില്‍ അഭിനയിച്ചത് തന്നെ ഏറ്റവും വലിയ വെല്ലുവിളിയും ഉറച്ചനിലപാടുമായിരുന്നു. ഇപ്പോള്‍ ന്യൂജനറേഷന്‍ സിനിമകളെ കുറിച്ചാണ് താരം തന്റെ നിലപാട് വ്യക്തമാക്കുന്നത്. എല്ലാ ന്യൂജനറേഷന്‍ സിനിമകളും നല്ലതാണെന്ന് തനിക്ക് അഭിപ്രായമില്ലെന്ന് താരം പറഞ്ഞു. അതേസമയം പുതുതായി ഒരുപാട് ആക്‌ടേഴ്‌സ് ന്യൂജനറേഷന്‍ സിനികളിലൂടെ വരുന്നത് നല്ല കാര്യമാണെന്നും താരം പറഞ്ഞു. 

തന്റെ ചിത്രങ്ങള്‍ പരാജയപ്പെടുമ്പോള്‍ നിരാശതോന്നുമെന്നും താരം പറഞ്ഞു. സിനിമ എത്രപേരെ ബാധിക്കുന്ന കാര്യമാണ്. സിനിമ പരാജയപ്പെടുമ്പോള്‍ അതിന് വേണ്ടി പ്രവര്‍ത്തിച്ച എല്ലാവരും വേദനിക്കും. അടുത്തിടെ കുറേ ചിത്രങ്ങള്‍ തുടര്‍ച്ചയായി വിജയിച്ചു. വിജയപരാജയങ്ങളേക്കാള്‍ നല്ല ചിത്രങ്ങളുടെ ഭാഗമാകാനാണ് ആഗ്രഹമെന്നും താരം പറഞ്ഞു. പലപ്പോഴും മാധ്യമങ്ങളില്‍ നിന്ന് ഒഴിഞ്ഞ് മാറുന്നയാളാണ് പൃഥ്വിരാജെന്ന് ആക്ഷേപമുണ്ട്. തന്നെ കുറിച്ച് ഇന്‍ഡസ്ട്രിയിലുള്ളവര്‍ക്ക് നന്നായി അറിയാം. പുതുതായി എന്തെങ്കിലും പറയാനുണ്ടെങ്കിലല്ലേ മാധ്യമങ്ങളെ കാണേണ്ടതുള്ളൂ. അല്ലാതെ മനപൂര്‍വം ആരെയും ഒഴിവാക്കുന്നതല്ല.

ന്യൂജനറേഷന്‍ ലേബലില്‍ പല സിനിമകളും ഇറങ്ങിയിട്ടുണ്ടെങ്കിലും പൃഥ്വിരാജ് അതിന്റെയൊന്നും ഭാഗമായിരുന്നില്ല. പല ന്യൂജനറേഷന്‍ സിനിമകളിലും അശ്ലീലസംഭാഷണങ്ങളും ദ്വയാര്‍ത്ഥ പ്രയോഗങ്ങളും ഉള്ളതിനാല്‍ വ്യാപകമായ പ്രതിഷേധം ഉണ്ടായിരുന്നു. അവസാനം കുഞ്ചാക്കോബോബന്‍ വരെ ഇതിനെതിരെ രംഗത്തെത്തിയിരുന്നു. പൃഥ്വിരാജിന്റെ സിനിമകളെല്ലാം കുടുംബസമേതം തിയേറ്ററില്‍ പോയി കാണാവുന്നതാണ്. അതിലൊക്കെ താരം പ്രത്യേകം ശ്രദ്ധ ചെലുത്തും.