ദിലീപിനെതിരെ ആരോപണങ്ങളും അന്വേഷണവും തകര്‍ക്കുമ്പോള്‍ ദിലീപിനെ വെള്ളപൂശാനായി ചില താരങ്ങള്‍ ഇറങ്ങുന്നത് ചോദ്യം ചെയ്യപ്പെടുന്നു. എനിക്കറിയാവുന്ന ദിലീപ് അങ്ങനെയല്ല എന്ന പഞ്ച് ഡയലോഗുമായി എത്തിയത് നിരവധി താരങ്ങളാണ്. അടൂര്‍ ഗോപാലകൃഷ്ണന്‍, അന്‍വര്‍ സാദത്ത് എംഎല്‍എ, ഹരിശ്രീ അശോകന്‍, തെസ്‌നി ഖാന്‍, കെപിഎസി ലളിത എന്നിവര്‍ തങ്ങളുടെ ഇതേ അഭിപ്രായവുമായി രംഗത്തെത്തിയിട്ടുണ്ട്. പി.ആര്‍. വര്‍ക്കിന്റെ ഭാഗമായി ഈ പഞ്ച് ഡയലോഗുമായി ഇനിയും കൂടുതല്‍ പേര്‍ വരാനാണ് സാധ്യത. പക്ഷെ എനിക്കറിയാവുന്ന ദിലീപ് അങ്ങനെയല്ല എന്ന് അമ്മയുടെ മീറ്റിംഗില്‍ പറഞ്ഞ ഇന്നസെന്റിന്റെ അവസ്ഥ ഓര്‍ക്കണം. എന്തൊക്കെയാ പറഞ്ഞത്. എടാ ദിലീപേ നീ അത് ചെയ്‌തോടാ... ഇല്ല ചേട്ടാ... പിന്നെ അത് എന്തായെന്ന് നമ്മള്‍ കണ്ടതാണല്ലോ...

അതേസമയം ദിലീപിനെതിരെ ശക്തമായ അന്വേഷണം നടത്താന്‍ സര്‍ക്കാര്‍ തീരുമാനിച്ചു. ദിലീപിന്റെ ആഡംബര സിനിമാ സമുച്ചയമായ ഡി സിനിമാസ് നിര്‍മിക്കാന്‍ ദിലീപ് ചാലക്കുടിയിലെ ഒരേക്കര്‍ സര്‍ക്കാര്‍ ഭൂമി കയ്യേറിയെന്ന ആരോപണത്തിലാണ് അന്വേഷണത്തിന് ഉത്തരവിറക്കിയത്. റവന്യുമന്ത്രി ഇ.ചന്ദ്രശേഖരന്റെ ഓഫീസ് തൃശൂര്‍ ജില്ലാ കലക്ടര്‍ക്കാണ് നിര്‍ദേശം നല്‍കിയത്. വ്യാജ ആധാരങ്ങള്‍ ചമച്ചാണ് ദിലീപ് സ്ഥലം കയ്യേറിയതെന്നായിരുന്നു ആരോപണം. മുന്‍പ് ഇതില്‍ നടപടിയെടുക്കാന്‍ തുടങ്ങിയ ഭരണകൂടത്തെ ഉന്നതര്‍ തടഞ്ഞതായും ആക്ഷേപമുണ്ട്.

സംസ്ഥാന രൂപീകരണത്തിനു മുന്‍പ് തിരുക്കൊച്ചി മന്ത്രിസഭ ചാലക്കുടി ശ്രീധരമംഗലം ശ്രീകൃഷ്ണ ക്ഷേത്രത്തിന് ഊട്ടുപുര നിര്‍മിക്കാന്‍ കൈമാറിയ ഒരേക്കര്‍ സ്ഥലം 2005ല്‍ എട്ട് ആധാരങ്ങളുണ്ടാക്കി ദിലീപ് കൈവശപ്പെടുത്തിയെന്നാണു ആരോപണം. ഈ ഭൂമിയില്‍ 35 സെന്റ് ചാലക്കുടി തോടു പുറമ്പോക്കും ഉള്‍പ്പെടുന്നതായുള്ള റവന്യു റിപ്പോര്‍ട്ട് മുക്കിയെന്നും ആക്ഷേപമുയര്‍ന്നിരുന്നു.

എന്നാല്‍ ഈ ഭൂമി നേരിട്ടു ദിലീപിന്റെ കൈവശം വന്നതല്ല. സ്ഥലം വിഭജിച്ച് എട്ടു പേരുകളില്‍ ആധാരം ചെയ്ത ശേഷം ഒരുമിച്ചു ദിലീപ് വാങ്ങുകയായിരുന്നു. ഭൂമി പോക്കുവരവു ചെയ്യാന്‍ റവന്യൂ രേഖകളില്‍ ക്രമക്കേടു നടന്നതായും സംശയിക്കുന്നു. പുന:രന്വേഷണത്തിനു ലാന്‍ഡ് റവന്യു കമ്മിഷണര്‍ 2015ല്‍ പുറപ്പെടുവിച്ച ഉത്തരവും ഭരണസ്വാധീനം ഉപയോഗിച്ചു മരവിപ്പിച്ചതായാണ് ആരോപണം.