വളാഞ്ചേരി വട്ടപ്പാറയില്‍ ബിജു മേനോന്‍ സഞ്ചരിച്ച കാര്‍ അപകടത്തില്‍പ്പെട്ടെന്ന വാര്‍ത്ത കാട്ടുതീ പോലെ പടര്‍ന്നു. വളരെ വേഗം ഈ വാര്‍ത്ത സംയുക്തയുടെ അടുത്തുമെത്തി. ഞെട്ടലോടെ ബിജു മേനോനെ ബന്ധപ്പെടാന്‍ ശ്രമിച്ചിട്ടും നടന്നില്ല. ഇതോടെ ആധിയായി. തുടര്‍ന്നാണറിയുന്നത് ദൈവം ബിജുവിനെ രക്ഷിച്ചെന്ന്. 

അതേസമയം സംഭവത്തിന് പിന്നില്‍ മറ്റാരെങ്കിലുമുണ്ടോയെന്നാണ് പോലീസ് ആദ്യമന്വേഷിച്ചത്. ഇടിച്ചു തെറിപ്പിച്ച വണ്ടിയിലുണ്ടായിരുന്ന ആളെ ചോദ്യം ചെയ്തു. അപകടത്തിന്റെ സാഹചര്യം വിലയിരുത്തി. എല്ലാം സസൂക്ഷ്മം നിരീക്ഷിച്ച പോലീസിന് മനസിലായി ഇതില്‍ 
ദുരൂഹതയൊന്നുമില്ലെന്ന്. 

രാത്രി ഒന്‍പതിനു ബിജു മേനോന്‍ സഞ്ചരിച്ച കാറില്‍ മറ്റൊരു വാഹനം ഇടിച്ചായിരുന്നു അപകടം. കോഴിക്കോട് ഭാഗത്തേക്കു പോകുകയായിരുന്ന കാറില്‍ മറ്റൊരു കാര്‍ തട്ടുകയായിരുന്നു. കാറിനു സാരമായ കേടുപാടുകള്‍ സംഭവിച്ചു. നടന്‍ അടക്കമുള്ളവര്‍ പരുക്കേല്‍ക്കാതെ രക്ഷപ്പെട്ടു. വളാഞ്ചേരി എസ്‌ഐയുടെ നേതൃത്വത്തില്‍ പൊലീസ് എത്തി അപകടത്തില്‍പ്പെട്ട വാഹനങ്ങള്‍ നീക്കി. നടന്റെ കാറ് സ്വാഭാവിക അപകടത്തില്‍പ്പെട്ടതാണെന്ന് പൊലീസ് സ്ഥിരീകരിച്ചിട്ടുണ്ട്. ഈ റൂട്ടിലെ യാത്രയ്ക്കിടെയായിരുന്നു നേരത്തെ ജഗതി ശ്രീകുമാറിന് അപകടമുണ്ടായത്. സാധാരണ അപകട മേഖലയിലാണ് ബിജു മോനോന്റെ കാറും അപകടത്തില്‍പ്പെട്ടത്.

നടി ആക്രമിക്കപ്പെട്ട കേസില്‍ പലപ്പോഴും ചര്‍ച്ചയായ പേരാണ് ബിജു മേനോന്റേത്. ആക്രമത്തിന് ഇരയായ പെണ്‍കുട്ടിക്ക് ആദ്യം മുതല്‍ തന്നെ ഉറച്ച പിന്തുണ നല്‍കിയത് ബിജു മേനോനും ഭാര്യ സംയുക്തമാ വര്‍മ്മയുമായിരുന്നു. ദിലീപുമായി ബന്ധപ്പെട്ട് പല കഥകളും ഉയര്‍ന്നു കേട്ടു. ദിലീപ് മഞ്ജു വിവാഹ മോചനത്തിലും ബിജു മേനോന്‍ മഞ്ജുവിനൊപ്പമായിരുന്നു. പല സിനിമകളില്‍ നിന്നും ദിലീപ്, ബിജുവിനെ ഒതുക്കാന്‍ ശ്രമിച്ചുവെന്നും ഗോസിപ്പുകളെത്തി. എന്നാല്‍ ഇതെല്ലാം ബിജു മേനോന്‍ തന്നെ നിഷേധിക്കുകയും ചെയ്തു. അതുകൊണ്ടാണ് ബിജുവിന്റെ കാര്‍ അപകടത്തില്‍പ്പെട്ടത് അറിഞ്ഞ് സിനിമാ ലോകം ആശങ്കയിലായത്.

എന്നാല്‍ ഇത്തരം പ്രശ്‌നങ്ങളൊന്നും അപകടത്തിന് പിന്നിലില്ലെന്ന് പൊലീസ് പറയുന്നു. ഭാഗ്യം കൊണ്ടാണ് ബിജു അപകടത്തില്‍ നിന്ന് പരിക്കുകള്‍ പോലും ഏല്‍ക്കാതെ രക്ഷപ്പെട്ടത്. ദേശീയപാതയിലെ സ്ഥിരം അപകടമേഖലയാണ് വട്ടപ്പാറ. ഇവിടുത്തെ കൊടുംവളവും കയറ്റിറക്കങ്ങളും കാരണം വലിയ വാഹനങ്ങള്‍ അപകടത്തില്‍പ്പെടുന്നത് പതിവാണ്.

അപകടത്തെ തുടര്‍ന്ന് ദേശീയപാതയില്‍ ഏറെനേരം ഗതാഗതം തടസപ്പെട്ടു. ബിജു മേനോന്റെ കാറാണ് അപകടത്തില്‍പ്പെട്ടതെന്ന വാര്‍ത്ത പരന്നതോടെ കൂടുതല്‍പേര്‍ അപകടസ്ഥലത്തേക്കെത്തി. ഹൈവേ പൊലീസും വളാഞ്ചേരി പൊലീസും ചേര്‍ന്നാണ് അപകടത്തില്‍പ്പെട്ട വാഹനങ്ങള്‍ റോഡില്‍ നിന്ന് നീക്കം ചെയ്ത് ഗതാഗതം പുനഃസ്ഥാപിച്ചത്. സഞ്ചരിച്ചിരുന്ന കാര്‍ അപകടത്തില്‍പ്പെട്ടതിനെ തുടര്‍ന്ന് രാത്രി ഏറെ വൈകി മറ്റൊരു കാറിലാണ് ബിജു മേനോന്‍ യാത്ര തുടര്‍ന്നത്. താരത്തിന് കാര്യമായി പരിക്കേറ്റിട്ടില്ലെങ്കിലും ആദ്യം നടക്കാന്‍ കുറച്ച് പ്രയാസം നേരിട്ടതായാണ് ദൃക്‌സാക്ഷികള്‍ പറഞ്ഞത്.