എത്രവലിയ റിസ്‌ക്കും ഏറ്റെടുക്കാനും, ഗ്ലാമര്‍ വേഷങ്ങള്‍ ചെയ്യാനും, ഐറ്റം ഡാന്‍സ് ചെയ്യാനും തയ്യാറാണ് കാജല്‍ അഗര്‍വാള്‍. പക്ഷെ സ്ത്രീപക്ഷ ചിത്രങ്ങളോട് താത്പര്യമില്ലത്രെ. കോടികള്‍ വാഗ്ദാനം ചെയ്തിട്ടും രണ്ട് ചിത്രങ്ങള്‍ നടി ഉപേക്ഷിച്ചു എന്നാണ് പുതിയ വാര്‍ത്തകള്‍. പി. വാസു സംവിധാനം ചെയ്യുന്ന സ്ത്രീപക്ഷ ചിത്രത്തിലേക്ക് നായികയായി കാജലിനെ വിളിച്ചിരുന്നു. 2.5 കോടി രൂപ പ്രതിഫലവും വാഗ്ദാനം ചെയ്തു. പക്ഷെ അഭിനയിക്കാന്‍ നടി തയ്യാറായില്ലത്രെ.

ബോളിവുഡിലും സാന്നിധ്യം അറിയിക്കാനുള്ള പണിയിലാണ് തെന്നിന്ത്യയിലെ ചില താരങ്ങള്‍. എന്നാല്‍ നല്ലൊരു അവസരം ബോളിവുഡില്‍ കിട്ടിയിട്ടും അഭിനയിക്കില്ലാ എന്നായിരുന്നുവത്രെ കാജലിന്റെ മറുപടി. ബോളിവുഡിലും രണ്ടര കോടി രൂപയ്ക്ക് വാഗ്ദാനം ചെയ്ത സ്ത്രീപക്ഷ ചിത്രം കാജല്‍ നിരസിച്ചു.

ഗ്ലാമര്‍ റോളുകള്‍ക്ക് കണക്ക് പറഞ്ഞ് എണ്ണി വാങ്ങുന്ന നായികമാര്‍ക്ക് അപൂര്‍വ്വമായിട്ടാണ് ഇത്തരം സ്ത്രീപക്ഷ ചിത്രങ്ങള്‍ കിട്ടുന്നത്. നായകന് പിന്നില്‍ നിന്ന് മാറാന്‍ ലഭിയ്ക്കുന്ന ഓരോ അവസരവും ഉപയോഗപ്പെടുത്തുന്ന നായികമാര്‍ക്കിടയില്‍ കാജലിന്റെ പ്രതികരണം ചിലരെ അതിശയിപ്പിക്കുന്നു. ആ കണക്കില്‍ അഞ്ച് കോടിയാണ് കാജലിന് ഗോവിന്ദയായത്.

നായകന് പിന്നില്‍ അടിച്ചമര്‍ത്തപ്പെട്ട നായികമാര്‍ക്ക് ഇപ്പോഴാണ് ഒരു മോചനം ലഭിയ്ക്കുന്നത്. ആ മോചനത്തില്‍ സ്ത്രീപക്ഷ സിനിമകളെ ഏറ്റെടുക്കുന്ന ചില നടിമാരും ഉണ്ട്. അതിന് ആദ്യം കൈയടി നല്‍കേണ്ടത് നയന്‍താരയ്ക്കാണ്. സമീപകാലത്ത് നയന്‍താര ഏറ്റെടുക്കുന്നതില്‍ ഭൂരിഭാഗവും സ്ത്രീപക്ഷ ചിത്രങ്ങളാണ്. പ്രതിഫലവും കുത്തനെ ഉയര്‍ന്നു. വിജയമായാലും പരാജയമായാലും ആ ഉത്തരവാദിത്വം നയന്‍താര സ്വയം ഏറ്റെടുക്കുന്നു. അതേ സമയം, ബോളിവുഡില്‍ സൂപ്പര്‍ഹിറ്റായ ക്വീന്‍ എന്ന ചിത്രത്തിന്റെ റീമേക്കിലാണ് കാജല്‍ അഗര്‍വാള്‍ ഇപ്പോള്‍ അഭിനയിക്കുന്നത്. അതുകൊണ്ട് തന്നെ സ്ത്രീപക്ഷ ചിത്രങ്ങളെ കാജല്‍ പൂര്‍ണമായും അകറ്റി നിര്‍ത്തുന്നു എന്ന് പറയാന്‍ കഴിയില്ല.

അതേ സമയം തുടര്‍ച്ചയായി ബ്ലോക്ബസ്റ്റര്‍ ഹിറ്റ് ചിത്രങ്ങള്‍ നേടുന്നതിലൂടെ കാജലിന് തിരക്കേറുകയാണ്. റാണയ്‌ക്കൊപ്പം അഭിനയിച്ച നേനു രാജ നേനു മന്ത്രിയ്ക്കും അജിത്തിനൊപ്പം അഭിനയിച്ച വിവേഗത്തിനും മികച്ച അഭിപ്രായമാണ് ലഭിയ്ക്കുന്നത്. വിജയ്‌യുടെ മെര്‍സലാണ് പുതിയ ചിത്രം.