ബിഗ് ബോസ് റിയാലിറ്റി ഷോ’ യിലൂടെ വാര്‍ത്തകളില്‍ ഇടംനേടിയ മലയാളി താരം ഓവിയ വിവാദ കോളങ്ങളിലും ഇടം പിടിച്ചിരുന്നു. ഷോയില്‍ നിന്ന് സ്വയം പുറത്തായ ഓവിയ എന്തിന് പുറത്തു പോയി എന്നതായിരുന്നു ചര്‍ച്ച.

റിയാലിറ്റി ഷോയിലെ മറ്റൊരു മത്സരാര്‍ത്ഥിയായ ആരവിനോടുള്ള നിയന്ത്രിക്കാനാകാത്ത പ്രണയമാണ് തന്നെ ബിഗ്‌ബോസ് ഷോ വിടാന്‍ പ്രേരിപ്പിച്ചതെന്ന് ഓവിയ ഒടുവില്‍ തുറന്നു പറഞ്ഞിരുന്നു. ആ തുറന്നു പറച്ചിലുകള്‍ക്ക് ശേഷം ആരവിന്റെ മനസ് എന്താണെന്ന് അറിയാനുള്ള ആകാംഷയിലായിരുന്നു ഓവിയയുടെ ആരാധകര്‍.

വിവാദങ്ങള്‍ക്കൊടുവില്‍ ആരവ് ആ മനസ് തുറന്നു. ഷോയില്‍ തുടരുന്ന ആരവിനോട് മറ്റു മത്സരാര്‍ത്ഥികളാണ് ഇക്കാര്യം ചോദിച്ചത്. തനിക്ക് ഓവിയയെ ഇഷ്ടമാണ്. എന്നാല്‍ പ്രണയമില്ലെന്ന് ആരവ് പറയുന്നു. നല്ല സൗഹൃദമുണ്ട്. ഓവിയയെ മിസ് ചെയ്യുന്നുമുണ്ട്.

പക്ഷെ പ്രണയം, വിവാഹം എന്ന കാര്യങ്ങളൊന്നും ഇതുവരെ ചിന്തിച്ചിട്ടില്ലെന്നും ആരവ് വ്യക്തമാക്കി. മാതാപിതാക്കളുടെ തീരുമാനത്തിന് വില നല്‍കുമെന്നും ആരവ് കൂട്ടിച്ചേര്‍ത്തു.